ભારતીય વાયુસેના દ્વારા જામનગર એરફોર્સ સ્ટેશન ખાતે 17થી 19 નવેમ્બર દરમિયાન બહુ-રાષ્ટ્રીય માનવતાવાદી સહાય અને આપત્તિ રાહત કવાયત ‘સહાયતા સેતુ’નું આયોજન કરવામાં આવશે. ભારતીય સંરક્ષણ દળો, હેડક્વાર્ટર ઇન્ટિગ્રેટેડ ડિફેન્સ સ્ટાફ અને સાઉથ વેસ્ટર્ન એર કમાન્ડના માર્ગદર્શન હેઠળ આ કવાયત યોજાશે.
આ કવાયતમાં વિવિધ રાષ્ટ્રીય એજન્સીઓ અને મિત્ર વિદેશી દેશો ભાગ લેશે. કવાયતનો મુખ્ય ઉદ્દેશ્ય ટેકનોલોજીના ઉપયોગથી આપત્તિ સમયે સામૂહિક તૈયારીઓને મજબૂત બનાવવાનો, વિવિધ એજન્સીઓ વચ્ચે સંકલન વધારવાનો અને ઝડપી રાહત કામગીરીને પ્રોત્સાહન આપવાનો છે.
આપત્તિ સમયે અસરગ્રસ્ત લોકોને સમયસર સહાય પહોંચાડવા અને બચાવ કામગીરી વધુ અસરકારક બનાવવા માટે આ કવાયત મહત્વપૂર્ણ સાબિત થશે. ભારતીય વાયુસેના પોતાની એરલિફ્ટ ક્ષમતા અને ઝડપી પ્રતિભાવ દ્વારા આપત્તિ દરમિયાન માનવતાવાદી સહાય પૂરી પાડવામાં મહત્વની ભૂમિકા ભજવશે.
આ કવાયતમાં ભારતના પ્રધાનમંત્રી, કેન્દ્રીય મંત્રીઓ, ગુજરાતના મહાનુભાવો, ચીફ ઓફ ડિફેન્સ સ્ટાફ (CDS), ત્રણેય સંરક્ષણ દળોના વડાઓ સહિતના મહાનુભાવો ઉપસ્થિત રહે તેવી અપેક્ષા છે. આ કવાયત દ્વારા આંતરરાષ્ટ્રીય સહયોગ, મિત્રતા અને આપત્તિ વ્યવસ્થાપન ક્ષેત્રે સંયુક્ત તૈયારીઓને વધુ મજબૂત બનાવવાનો પ્રયાસ કરવામાં આવશે.
