બોલિવૂડની ધક-ધક ગર્લ માધુરી દીક્ષિત અને તેના પરિવારની તસવીરો હાલમાં ચર્ચામાં છે. તાજેતરમાં માધુરી અને તેમના પતિ ડૉ. શ્રીરામ નેને ફેશન ડિઝાઇનર મનીષ મલ્હોત્રાની ભવ્ય દિવાળી પાર્ટીમાં સામેલ થયાં હતાં. આ ઇવેન્ટમાં માધુરી અને શ્રીરામ નેને સાથે તેમનો મોટો દીકરો અરિન નેને પણ પહોંચ્યો હતો. જોકે, આખી પાર્ટીમાં સૌથી વધુ ચર્ચા અરિનની રુમર્ડ ગર્લફ્રેન્ડ ખુશીની થઈ હતી.
મનીષ મલ્હોત્રાની પાર્ટીના સામે આવેલા વીડિયો અને તસવીરોમાં અરિન પોતાની ગર્લફ્રેન્ડ સાથે જોવા મળ્યો હતો. આ દરમિયાન તે ખુશીને પ્રેમથી નિહાળતો પણ જોવા મળ્યો હતો.
રેડ કાર્પેટથી લઈને પાર્ટીની અંદરની તસવીરોમાં બંને એકબીજા સાથે હસતાં-મુસ્કુરાતાં પોઝ આપતાં જોવા મળ્યાં હતાં. એટલું જ નહીં, અરિન અને ખુશીએ માધુરી દીક્ષિત તથા ડૉ. શ્રીરામ નેને સાથે ફેમિલી ફોટો પણ પડાવ્યા હતા. આ તસવીરો પરથી બંનેના સંબંધોને પરિવારની મંજૂરી મળી હોવાના સંકેત મળી રહ્યા છે. હવે ડૉ. શ્રીરામ નેનેએ પોતાના સોશિયલ મીડિયા એકાઉન્ટ પર દિવાળી પાર્ટીની કેટલીક તસવીરો શેર કરી છે. આવો જાણીએ અરિનની રુમર્ડ ગર્લફ્રેન્ડ ખુશી કોણ છે.
શ્રીરામ નેનેએ શેર કરી ખાસ તસવીરો
શ્રીરામ નેનેએ શેર કરેલી તસવીરોમાં ખુશી પણ નેને પરિવાર સાથે ખૂબ ખુશ અને હળીમળી ગયેલી જોવા મળે છે. પાર્ટી માટે માધુરી દીક્ષિતે ગુલાબી રંગની ડિઝાઇનર સાડી પસંદ કરી હતી, જ્યારે અરિન અને તેની રુમર્ડ ગર્લફ્રેન્ડ ખુશી પણ પરંપરાગત પોશાકમાં ખૂબ સુંદર લાગી રહ્યાં હતાં.
સોશિયલ મીડિયા પર હાલમાં ખુશીને લઈને લોકોમાં ભારે ઉત્સુકતા જોવા મળી રહી છે. જોકે, ખુશીની પૃષ્ઠભૂમિ અને વ્યવસાયિક જીવન વિશે હજુ વધારે વિગતો સામે આવી નથી. પરંતુ મનીષ મલ્હોત્રાની આટલી મોટી સ્ટાર-સ્ટડેડ પાર્ટીમાં નેને પરિવાર સાથે તેની હાજરી ચર્ચાનો વિષય બની છે.
સોશિયલ મીડિયા પર તસવીરો અને પોસ્ટ્સ સામે આવ્યા બાદ બંનેના અફેરની ચર્ચાઓ તેજ થઈ છે. કેટલાક લોકો આને અરિન તરફથી પોતાના સંબંધોનું ‘સોફ્ટ લોન્ચ’ પણ માની રહ્યા છે.
અરિન અને ખુશી અમેરિકામાં સાથે કરે છે અભ્યાસ
મળતી માહિતી મુજબ, ખુશી અને અરિન બંને અમેરિકામાં સાથે અભ્યાસ કરે છે. બંનેએ સાથે વિતાવેલી પળોની ઘણી તસવીરો પણ સોશિયલ મીડિયા પર શેર કરી છે.
ઉલ્લેખનીય છે કે અરિન, માધુરી દીક્ષિત અને ડૉ. શ્રીરામ નેનેનો મોટો દીકરો છે. આ પહેલાં તેણે કરણ જોહરની ફિલ્મ ‘રોકી ઔર રાની કી પ્રેમ કહાની’માં આસિસ્ટન્ટ ડિરેક્ટર તરીકે કામ કર્યું હતું. અરહાન ખાન અને ઇબ્રાહિમ અલી ખાન પણ આ ફિલ્મ સાથે જોડાયેલા હતા.
માધુરી દીક્ષિત અને ડૉ. શ્રીરામ નેનેને બે દીકરા છે. તેમના મોટા દીકરાનું નામ અરિન નેને છે, જ્યારે નાના દીકરાનું નામ રેયાન નેને છે. અરિન સામાન્ય રીતે લાઇમલાઇટથી દૂર રહેવાનું પસંદ કરે છે. જોકે, મનીષ મલ્હોત્રાની દિવાળી પાર્ટીમાં તેની હાજરી અને ખુશી સાથેની તસવીરોએ તેને ફરી ચર્ચામાં લાવી દીધો છે.
