અમદાવાદ: અણુવ્રત વિશ્વ ભારતી સોસાયટીના તત્વાવધાન હેઠળ અણુવ્રત સમિતિ અમદાવાદ દ્વારા ‘ELEVATE – Experience The Real High’ કાર્યક્રમનું આયોજન 9 ઓગસ્ટ, 2026ના રોજ NCC હેડક્વાર્ટર, અમદાવાદ ખાતે કરવામાં આવ્યું હતું. યુવાનોને ડ્રગ્સથી દૂર રહીને પોતાના જીવનના લક્ષ્યો હાંસલ કરવા અને નશામુક્ત ભારતના નિર્માણમાં યોગદાન આપવા માટે પ્રેરિત કરવાના હેતુથી યોજાયેલા આ કાર્યક્રમમાં NCCના 500 કેડેટ્સ ઉપસ્થિત રહ્યા હતા.
કાર્યક્રમની શરૂઆત અણુવ્રત ગીતથી કરવામાં આવી હતી. ત્યારબાદ અણુવ્રત સમિતિ અમદાવાદના અધ્યક્ષ શ્રીમતી ડિમ્પલ શ્રીમાલ દ્વારા અધ્યક્ષીય ઉદબોધન કરવામાં આવ્યું હતું. તેમણે ઉપસ્થિત તમામ મહેમાનોનું સ્વાગત તથા સન્માન કર્યું હતું.
કાર્યક્રમમાં વિશેષ અતિથિ તરીકે કર્નલ મુનીશ જસરોટિયા ઉપસ્થિત રહ્યા હતા. તેમણે NCC કેડેટ્સને ડ્રગ્સથી દૂર રહીને પોતાના જીવનમાં સફળતા હાંસલ કરવા અને સમાજ તથા દેશના વિકાસમાં યોગદાન આપવા માટે પ્રેરણાદાયી સંદેશ આપ્યો હતો. તેમણે અણુવ્રત સમિતિના ડ્રગ્સ-ફ્રી મિશનની પ્રશંસા કરી અને આગામી NCC કેમ્પોમાં પણ ડ્રગ્સ-ફ્રી અભિયાન અંતર્ગત એક સત્ર યોજવા માટે સહયોગ આપવાનું આશ્વાસન આપ્યું હતું.
અણુવ્રત સમિતિના નેશનલ ટ્રેનર વિવેક સંકલેંચાએ કેડેટ્સને ‘ELEVATE’ અભિયાન વિશે માહિતી આપતાં જણાવ્યું હતું કે યુવાનો જો ડ્રગ્સથી દૂર રહીને પોતાના લક્ષ્ય પર ધ્યાન કેન્દ્રિત કરે તો તેઓ પોતાના પરિવારનું નામ રોશન કરવાની સાથે દેશના નવા અને સશક્ત ભારતના નિર્માણમાં મહત્વપૂર્ણ ભૂમિકા ભજવી શકે છે. તેમણે કેડેટ્સને જીવનભર ડ્રગ્સથી દૂર રહેવાનો સંકલ્પ પણ કરાવ્યો હતો.
આ પ્રસંગે સૂબેદાર અમરજીત સિંહ, અણુવ્રત સમિતિના પરામર્શક લાડ બાફના, ઉપાધ્યક્ષ સુરેન્દ્ર લુણિયા, દિનેશ ધૂપ્યા, સહમંત્રી અંજુ હિરન, પ્રચાર-પ્રસાર મંત્રી દિલસુખ બાંઠિયા, તેરાપંથ સભાના અધ્યક્ષ રાકેશજી સિપાણી, સહમંત્રી આનંદ સંચેતી, સંગઠન મંત્રી વિનોદ પારેખ, મહિલા મંડળ મંત્રી રેખા ધૂપ્યા, યુવક પરિષદના અક્ષય સંકલેંચા, રાહુલ બાલડ અને આનંદ બોથરા સહિતના આગેવાનો અને સભ્યોની ગૌરવપૂર્ણ ઉપસ્થિતિ રહી હતી.
કાર્યક્રમનું સંચાલન મમતા સંકલેંચાએ કર્યું હતું, જ્યારે આભારવિધિ મંત્રી મનીષા દક દ્વારા કરવામાં આવી હતી. અંતે રાષ્ટ્રગીત સાથે કાર્યક્રમનું સમાપન કરવામાં આવ્યું હતું.
‘ELEVATE – Experience The Real High’ અભિયાન દ્વારા યુવાનોમાં નશામુક્ત જીવન, આત્મવિશ્વાસ અને જવાબદારીની ભાવના વિકસાવવાનો સંદેશ આપવામાં આવ્યો હતો. NCCના 500 કેડેટ્સની ઉપસ્થિતિમાં યોજાયેલો આ કાર્યક્રમ યુવાનોને નશાથી દૂર રહીને સ્વસ્થ, સફળ અને જવાબદાર જીવન તરફ આગળ વધવા માટે પ્રેરણાદાયી બન્યો હતો.
