ભારતની સૌથી મોટી ટૂ-વ્હીલર કંપની હીરો મોટોકોર્પ હવે નવી ટેક્નોલોજી સાથે મોટું પગલું ભરવા જઈ રહી છે. કંપની 3 જૂને ભારતીય બજારમાં પોતાની પ્રથમ Flex-Fuel મોટરસાયકલ લોન્ચ કરશે. આ લોન્ચ માત્ર નવી બાઈકની એન્ટ્રી નહીં પરંતુ ભારતમાં સ્વચ્છ અને વૈકલ્પિક ઇંધણ તરફનું મહત્વપૂર્ણ પગલું માનવામાં આવી રહ્યું છે.
આ ખાસ લોન્ચ ઇવેન્ટમાં કેન્દ્રીય માર્ગ પરિવહન અને હાઈવે મંત્રી નિતિન ગડકરી તથા પેટ્રોલિયમ અને કુદરતી ગેસ મંત્રી હરદીપ સિંહ પુરી પણ હાજર રહેશે. જેના પરથી સ્પષ્ટ થાય છે કે સરકાર પણ Flex-Fuel ટેક્નોલોજીને ઝડપથી પ્રોત્સાહન આપવા માગે છે.
Flex-Fuel વાહનો એવા એન્જિન સાથે આવે છે, જે પેટ્રોલ અને ઇથેનોલના અલગ-અલગ મિશ્રણ પર ચાલી શકે છે. એટલે કે બાઈકમાં માત્ર પેટ્રોલ નહીં પરંતુ વધુ ઇથેનોલવાળું ઇંધણ પણ ઉપયોગ કરી શકાય છે. હાલમાં ભારતમાં મોટાભાગના વાહનો E20 ફ્યુઅલ એટલે કે 20 ટકા ઇથેનોલ મિશ્રિત પેટ્રોલ પર ચાલવા માટે તૈયાર કરવામાં આવી રહ્યા છે. પરંતુ સરકાર ભવિષ્યમાં E85 અને E100 જેવા હાઈ ઇથેનોલ ફ્યુઅલને પણ પ્રોત્સાહન આપવા ઇચ્છે છે. Flex-Fuel ટેક્નોલોજી આ દિશામાં સૌથી મહત્વપૂર્ણ પગલું માનવામાં આવી રહી છે.
આ ટેક્નોલોજીનો સૌથી મોટો ફાયદો એ છે કે તે પેટ્રોલ પરની નિર્ભરતા ઘટાડશે અને પ્રદૂષણમાં પણ ઘટાડો કરશે. સાથે જ ખેડૂતોને ઇથેનોલ ઉત્પાદનથી લાભ થવાની આશા છે.
હીરો મોટોકોર્પે હજુ સુધી પોતાની પ્રથમ Flex-Fuel બાઈકનું નામ જાહેર કર્યું નથી. જોકે મીડિયા રિપોર્ટ મુજબ કંપની આ ટેક્નોલોજી પોતાના સૌથી લોકપ્રિય કમ્યુટર મોડલ Splendor અથવા HF Deluxeમાં લાવી શકે છે. આ બંને બાઈક ભારતીય બજારમાં સૌથી વધુ વેચાતી બાઈક્સમાં સામેલ છે અને ગામડાંથી લઈને શહેર સુધી તેની મજબૂત પકડ છે. તેથી જો Flex-Fuel ટેક્નોલોજી આ મોડલ્સમાં આવે તો તે સામાન્ય લોકો સુધી ઝડપથી પહોંચી શકે છે.
ખાસ વાત એ છે કે Bharat Mobility Global Expo 2025 દરમિયાન હીરોએ જે પ્રથમ Flex-Fuel મોડલ રજૂ કર્યું હતું, તે HF Deluxe આધારિત હતું.
હાલ ભારતીય ટૂ-વ્હીલર માર્કેટમાં Suzukiની Gixxer SF 250 Flex Fuel બાઈક ઉપલબ્ધ છે. તેમાં 249ccનું એન્જિન આપવામાં આવ્યું છે અને તેની શરૂઆતની કિંમત અંદાજે 1.98 લાખ રૂપિયા છે. આ સિવાય Hondaએ પણ CB300F Flex Fuel મોડલ લોન્ચ કર્યું હતું, પરંતુ બાદમાં તેને બંધ કરી દેવામાં આવ્યું હતું. હવે હીરો મોટોકોર્પની એન્ટ્રીથી આ સેગમેન્ટ વધુ ઝડપથી વિકસી શકે છે. કારણ કે નાના શહેરો અને ગ્રામિણ બજારોમાં હીરોની મજબૂત પકડ છે.
માત્ર બાઈક કંપનીઓ જ નહીં પરંતુ કાર ઉત્પાદક કંપનીઓ પણ Flex-Fuel ટેક્નોલોજી પર ઝડપથી કામ કરી રહી છે. મારુતિ સુઝુકી પણ 5 જૂને પોતાની પ્રથમ Flex-Fuel કાર લોન્ચ કરી શકે છે. મીડિયા રિપોર્ટ મુજબ આ WagonRનું Flex-Fuel વર્ઝન હોઈ શકે છે. સરકારનો હેતુ આગામી વર્ષોમાં ઇથેનોલ આધારિત ઇંધણનો વધુ ઉપયોગ વધારવાનો છે જેથી તેલ આયાતમાં ઘટાડો થાય અને પર્યાવરણને લાભ મળે.
જો Flex-Fuel વાહનો મોટા પાયે સફળ થાય તો સામાન્ય લોકોને અનેક ફાયદા મળી શકે છે. તેમાં ઇંધણ ખર્ચમાં ઘટાડો થશે, પ્રદૂષણ ઓછું થશે અને ભારતને પેટ્રોલ આયાત માટે ઓછો ખર્ચ કરવો પડશે. હીરોની આ નવી બાઈક આગામી સમયમાં ભારતીય ટૂ-વ્હીલર માર્કેટમાં મોટો બદલાવ લાવી શકે છે. હવે સૌની નજર 3 જૂનના લોન્ચ ઇવેન્ટ પર ટકેલી છે.
