નવી દિલ્હી : ભારતીય સેના પર મોટા હુમલા કરવાની આઇએસઆઇની યોજનાને નિષ્ફળ કરી દેવામાં આવી છે. હાલમાં જ દિલ્હી અને ઉત્તરપ્રદેશમાં ત્રાસવાદી નેટવર્કનો પર્દાફાશ કર્યા બાદ હવે હૈદરાબાદમાં ગેરકાયદે રીતે ચાલી રહેલા ઇન્ટરનેટ ટેલિફોન એક્સચેંજનો પર્દાફાશ કરવામાં આવ્યો છે. હકીકતમાં જમ્ કાશ્મીરમાં એક સૈન્ય ગુપ્તચર યુનિટ દ્વારા પુરી પાડવામાં આવેલી માહિતીના આધાર પર તેલંગણા પોલીસે આ નેટવર્કનો પર્દાફાશ કરવામાં આવ્યો છે. અત્રે ઉલ્લેખનીય છે કે હાલમાં એનઆઇએ અને ઉત્તરપ્રદેશ એટીએસની ટીમને મોટી સફળતા હાથ લાગી હતી.
દિલ્હી અને ઉત્તરપ્રદેશના જુદા જુદા સ્થળ પર બાતમી બાદ દરોડાની કાર્યવાહી કરવામાં આવી હતી. આ કાર્યવાહ દરમિયાન એનઆઈએ દ્વારા ૧૦ આતંકવાદીઓની ધરપકડ કરવામાં આવી હતી. ધરપકડ કરવામાં આવેલાઓમાં મૌલવીથી લઇને સિવિલ એન્જિનિયર સુધીના ખતરનાક શખ્સોનો સમાવેશ થાય છે. આત્મઘાતી હુમલાની ઘાતક યોજના તૈયાર કરવામાં આવી રહી હતી. સ્વદેશી બનાવટની ૧૨ પિસ્તોલ, ૧૨૦ એલાર્મ ક્લોક, ૧૦૦ મોબાઇલ ફોન, ૧૩૫ સિમકાર્ડ અને લેપટોપ કબજે કરવામાં સફળતા મળી હતી. નેશનલ ઇન્વેસ્ટીગેશન એજન્સીએ વ્યાપક દરોડા અને તપાસ બાદ આઈએસઆઈએસ પ્રાયોજિત આતંકવાદી માળખાનો પર્દાફાશ કર્યો હતો.
એનઆઈએ દ્વારા ઉત્તરપ્રદેશ અને દિલ્હીમાં ૧૭થી વધુ સ્થળો દરોડા વ્યાપક કાર્યવાહી હાથ ધરી હતી. હરકત ઉલ હર્બે ઇસ્લામ નામથી નવા મોડ્યુઅલમાં તપાસ ચાલી રહી છે. ૧૬ શકમંદોની પુછપરછ કરવામાં આવી રહી છે. આ પુછપરછ બાદ ૧૦ની ધરપકડ કરાઈ હતી જેમાં મૌલવીથી લઇને સિવિલ એન્જિનિયરોનો સમાવેશ થાય છે. આ કાર્યવાહી રાષ્ટ્રીય તપાસ સંસ્થા અને યુપી એટીએસે મળીને કરી હતી. ઝડપાયેલા લોકોમાં પાંચ ઉત્તરપ્રદેશના અને પાંચ દિલ્હીના છે. આઈએસઆઈએસથી સંચાલિત મોડ્યુઅલમાં એમીટી યુનિવર્સિટીમાં સિવિલ એન્જિનિયરિંગ કરનાર વિદ્યાર્થી, ઓટો ડ્રાઇવર, મૌલવી, ગારમેન્ટ કારોબારી સામેલ છે. તમામની વય ૨૦થી ૩૦ વર્ષની છે. શકમંદોમાં એક મહિલા પણ સામેલ છે.
દિલ્હી અને ઉત્તરપ્રદેશમાં આઇએસ મોડ્યુલનો પર્દાફાશ કરીને મોટી સફળતા હાંસલ કર્યા બાદ હવે હૈદરાબાદમાં ગેરકાયદે ટેલિફોન એક્સચેંજનો પર્દાફાશ કરવામાં આવ્યો છે. ઇનપુટના આધાર પર તેલંગણા પોલીસે કેટલાક ગેરકાયદે સીમકાર્ડ અને મુખ્ય શકમંદની ધરપકડ કરી લેવામાં આવી છે. પોલીસની તપાસ ચાલી રહી છે. ટુંક સમયમાં જ વધુ કેટલાકની ધરપકડ કરવામાં આવી શકે છે. તેલંગણા પોલીસના એક વરિષ્ઠ અધિકારીએ કહ્યુ હતુ કે આ મહિનાની શરૂઆતમાં એમઆઇની એક યુનિટે હૈદરાબાદમાં ચાલી રહેલી એક ગેરકાયદે એક્સચેંજની માહિતી આપી હતી. એવી માહિતી મળી છે કે આ એક્સચેંજ મારફતે તમામ માહિતી પાકિસ્તાન સુધી પહોંચી રહી હતી.
