ઓફિસમાં સાથે કામ કરતાં-કરતાં ક્યારે બે લોકો એકબીજાની નજીક આવી જાય તેની વાતો ઘણીવાર ફિલ્મોમાં જોવા મળે છે. પરંતુ મહારાષ્ટ્રના પિંપરી-ચિંચવડ પોલીસ કમિશનરેટમાં આવી જ એક કહાની હાલ ચર્ચાનો વિષય બની છે. અહીં એક જ પોલીસ સ્ટેશનમાં ફરજ બજાવતી બે મહિલા કોન્સ્ટેબલે એકબીજા સાથે જીવન વિતાવવાનો નિર્ણય લીધો છે. બંને આગામી 30 ઓગસ્ટે વૈદિક રીત-રિવાજ મુજબ લગ્નબંધનમાં બંધાવાની તૈયારી કરી રહી છે.
રસપ્રદ વાત એ છે કે બંને મહિલા કોન્સ્ટેબલે પોતાના લગ્ન માટે પોલીસ વિભાગ પાસેથી સત્તાવાર રીતે રજા પણ માંગી છે. રજાની અરજી સાથે તેમણે લગ્નનું કાર્ડ પણ વરિષ્ઠ અધિકારીઓને મોકલ્યું છે. ત્યારબાદ પોલીસ વિભાગમાં બંનેના સંબંધ અને પ્રસ્તાવિત લગ્નને લઈને ચર્ચાઓ તેજ બની છે.
પુણે મિરરના અહેવાલ મુજબ, બંને મહિલા કોન્સ્ટેબલ મહારાષ્ટ્રના અલગ-અલગ વિસ્તારોની રહેવાસી છે. પોલીસ તાલીમ પૂર્ણ કર્યા બાદ બંનેની પોસ્ટિંગ પોલીસ હેડક્વાર્ટરમાં થઈ હતી. શરૂઆતના દિવસોમાં બંને અન્ય મહિલા કોન્સ્ટેબલો સાથે રહેતી હતી. ત્યારબાદ બંનેની નિમણૂક પિંપરી-ચિંચવડના એક જ પોલીસ સ્ટેશનમાં થઈ હતી. છેલ્લા લગભગ ત્રણ વર્ષથી સાથે ફરજ બજાવતાં-બજાવતાં બંને વચ્ચે નિકટતા વધતી ગઈ. થોડા સમય બાદ બંનેએ સાથે રહેવાનું પણ શરૂ કરી દીધું હતું. તેમના નજીકના લોકોને ધીમે-ધીમે તેમના સંબંધ વિશે જાણ થઈ હતી. હવે બંનેએ પોતાના સંબંધને આગળ વધારવાનો નિર્ણય લેતાં લગ્ન કરવાનો નિર્ણય લીધો છે.
આ મામલો ત્યારે ચર્ચામાં આવ્યો જ્યારે એક મહિલા કોન્સ્ટેબલના પરિવારને બંનેના સંબંધ વિશે જાણ થઈ. પરિવારે આ સંબંધ અને લગ્નના નિર્ણયનો વિરોધ કર્યો હતો. પરિવારના સભ્યો પોલીસ સ્ટેશન પહોંચ્યા હતા અને આ મામલે પોલીસની દખલગીરીની માંગ કરી હતી. જોકે, વરિષ્ઠ અધિકારીઓએ બંને મહિલા કોન્સ્ટેબલને આ અંગત મામલે બિનજરૂરી ચર્ચાથી દૂર રહેવાની સલાહ આપી હતી. દરમિયાન, બંને મહિલા કોન્સ્ટેબલે પોતાના લગ્ન માટે પોલીસ વિભાગ પાસેથી સત્તાવાર રજા માંગી છે અને રજાની અરજી સાથે લગ્નનું આમંત્રણ કાર્ડ પણ અધિકારીઓને મોકલ્યું છે. જેના કારણે પોલીસ વિભાગમાં તેમના સંબંધ અને આગામી લગ્નને લઈને ચર્ચા વધુ તેજ બની છે.
