ભારત અને વેસ્ટ ઈન્ડિઝ વચ્ચે બેંગલુરુના એમ. ચિન્નાસ્વામી સ્ટેડિયમમાં રમાનારી પાંચમી T20 મેચ સતત વરસાદને કારણે અનિર્ણિત રહી હતી. જોકે, આ સિરીઝ ભારતીય ટીમ માટે મોટો ઝટકો પણ સાબિત થઈ, કારણ કે આ સાથે જ ઘરઆંગણે સતત 12 T20 શ્રેણી જીતવાનો ભારતનો ચાર વર્ષ જૂનો વિજયરથ આખરે અટકી ગયો.
ચિન્નાસ્વામી સ્ટેડિયમની ઉત્તમ ડ્રેનેજ વ્યવસ્થાને કારણે વરસાદ અટકતાં જ મેચને 9-9 ઓવરની કરી દેવામાં આવી હતી. વેસ્ટ ઈન્ડિઝે ટોસ જીતીને પહેલાં બોલિંગ કરવાનો નિર્ણય લીધો હતો, પરંતુ મેદાન પર માત્ર 7.4 ઓવરનો જ ખેલ શક્ય બન્યો હતો.
આટલા ઓછા સમયમાં પણ ભારતીય બેટ્સમેનોએ ધમાલ મચાવી દીધી હતી. ઈશાન કિશન અને યુવા ખેલાડી નમન ધીરની તોફાની બેટિંગના જોરે ભારતે 5 વિકેટ ગુમાવીને 118 રન ફટકાર્યા હતા. ઈશાન કિશને માત્ર 10 બોલમાં 2 છગ્ગાની મદદથી 30 રનની આક્રમક ઇનિંગ રમી હતી. જ્યારે નમન ધીરે માત્ર 6 બોલમાં ત્રણ ગગનચુંબી છગ્ગા ફટકારીને અણનમ 24 રન બનાવ્યા હતા.
નમન ધીરે યુવરાજ સિંહનો રેકોર્ડ તોડ્યો
નમન ધીરે પોતાની ટૂંકી પરંતુ તોફાની અણનમ ઇનિંગના જોરે ટીમ ઈન્ડિયાના પૂર્વ દિગ્ગજ ખેલાડી યુવરાજ સિંહનો 19 વર્ષ જૂનો રેકોર્ડ તોડી નાખ્યો. યુવરાજે વર્ષ 2007ના T20 વર્લ્ડ કપમાં ઈંગ્લેન્ડ સામે છ છગ્ગા ફટકારીને એક મોટો રેકોર્ડ બનાવ્યો હતો.
મેચ દરમિયાન વરસાદને કારણે રમત 9-9 ઓવરની કરવામાં આવી હતી. ભારતીય ઇનિંગની સાતમી ઓવરમાં કેપ્ટન શ્રેયસ અય્યર આઉટ થયા બાદ નમન ધીર ક્રીઝ પર આવ્યો હતો. તેણે કેરેબિયન બોલરો સામે આક્રમક બેટિંગ કરતાં ચોગ્ગા-છગ્ગાનો વરસાદ કર્યો હતો. નમને માત્ર 6 બોલમાં 3 છગ્ગા અને 1 ચોગ્ગાની મદદથી અણનમ 24 રન ફટકાર્યા હતા.
T20 આંતરરાષ્ટ્રીય ક્રિકેટમાં ઓછામાં ઓછા 5 કે તેથી વધુ બોલ રમનારા ભારતીય બેટ્સમેનોની યાદીમાં નમન ધીર હવે પ્રથમ સ્થાને પહોંચી ગયો છે. અગાઉ આ રેકોર્ડ યુવરાજ સિંહ અને દિનેશ કાર્તિકના નામે સંયુક્ત રીતે હતો.
વર્ષ 2007માં ઈંગ્લેન્ડ સામે ડરબનમાં રમાયેલી T20 વર્લ્ડ કપની મેચમાં યુવરાજે 16 બોલમાં 58 રન બનાવ્યા હતા. આ દરમિયાન તેનો સ્ટ્રાઈક રેટ 362.5 રહ્યો હતો. જ્યારે વર્ષ 2018માં બાંગ્લાદેશ સામે નિદહાસ ટ્રોફીની ફાઇનલમાં દિનેશ કાર્તિકે માત્ર 8 બોલમાં 29 રન બનાવ્યા હતા અને તેનો સ્ટ્રાઈક રેટ પણ 362.5 રહ્યો હતો.
નમન ધીર હવે ટેસ્ટ રમતા દેશોના એવા પસંદગીના બેટ્સમેનોમાં પણ સામેલ થઈ ગયો છે, જેમણે ઓછામાં ઓછા 6 બોલ રમીને 400 કે તેથી વધુના સ્ટ્રાઈક રેટથી રન બનાવ્યા છે. તેની આ વિસ્ફોટક ઇનિંગે ટૂંકા ફોર્મેટમાં તેની આક્રમક બેટિંગ ક્ષમતાનો પરિચય કરાવ્યો છે.
