આ મહોત્સવમાં કારીગરો, NIFTના ભૂતપૂર્વ વિદ્યાર્થીઓ, વર્તમાન વિદ્યાર્થીઓ, ડિઝાઇનર્સ અને કલા-સંસ્કૃતિના રસિયાઓ એક મંચ પર આવશે. કાર્યક્રમમાં 100થી વધુ કારીગરો અને NIFTના ભૂતપૂર્વ વિદ્યાર્થીઓના સ્ટોલ્સ ઉપરાંત NIFT થીમ પેવેલિયન, ક્રાફ્ટ ક્લસ્ટર ઇનિશિયેટિવ, હસ્તકલા પ્રદર્શનો, લાઇવ ડેમોન્સ્ટ્રેશન, વર્કશોપ, માસ્ટરક્લાસ, પેનલ ચર્ચા અને સાંસ્કૃતિક કાર્યક્રમો યોજાશે.
ભારતીય હસ્તકલાની વિવિધ ઝલક જોવા મળશે
‘CHHAAP@Sabarmati 2026’માં મુલાકાતીઓને દેશની પરંપરાગત હસ્તકલા અને હેન્ડલૂમ ઉત્પાદનોને નિહાળવાની તેમજ સીધા કારીગરો પાસેથી ખરીદી કરવાની તક મળશે. સૌદાગીરી બ્લોક પ્રિન્ટિંગ, બ્લુ પોટરી, માટીકામ, પેપર મેશી અને લાખની બંગડીઓ બનાવવા જેવી પરંપરાગત કળાઓનું જીવંત નિદર્શન પણ કરવામાં આવશે. આ ઉપરાંત, વર્ચ્યુઅલ રિયાલિટી આધારિત અનુભવો દ્વારા મુલાકાતીઓ ટેક્નોલોજીના માધ્યમથી ભારતના હસ્તકલા વારસાને જાણી શકશે.
મહોત્સવમાં ‘કલા સંધ્યા’, ‘કલા પ્રદર્શન’, ‘કલા પ્રત્યક્ષમ’, ‘કલા વિવેચના’, ‘કલા દર્શન’, ‘કલા વાર્તા’, ‘કલા કુંભ’, ‘કલા ગુરુકુલ’, ‘કલા નવોનાક્ષમ’ અને ‘કલા સમાગમ’ સહિતના દસ વિશેષ કાર્યક્રમોનું આયોજન કરવામાં આવશે. આ કાર્યક્રમો દ્વારા હસ્તકલા પ્રદર્શન, કારીગરો સાથે સંવાદ, નિષ્ણાતોની ચર્ચા, માસ્ટરક્લાસ અને ડિઝાઇનના નવા અભિગમોને રજૂ કરવામાં આવશે.
ઉદ્ઘાટન સમારોહમાં સાંસ્કૃતિક કાર્યક્રમોની રંગત
23 ઑક્ટોબરની સાંજે યોજાનારી ‘કલા સંધ્યા’ ઉદ્ઘાટન સમારોહનું મુખ્ય આકર્ષણ રહેશે. તેમાં ગુજરાત પોલીસ બેન્ડ દ્વારા ‘વંદે માતરમ્’ની રજૂઆત, સાબરમતી આરતી, ભારતની વસ્ત્ર પરંપરાથી પ્રેરિત ફેશન શો અને ડ્રોન શો સહિતના કાર્યક્રમો યોજાશે.
આઠ દિવસ દરમિયાન ગુજરાતના ગરબા અને ડાંડિયા, રાજસ્થાની કાલબેલિયા નૃત્ય, રાજસ્થાની લોકસંગીત, પંજાબી ભાંગડા અને ગિદ્ધા તેમજ અમદાવાદ આધારિત ઓર્કેસ્ટ્રાની લાઇવ રજૂઆત પણ થશે. 30 ઑક્ટોબરે ‘કલા સમાગમ’ સાથે આ મહોત્સવનું સમાપન કરવામાં આવશે.
પરંપરા અને આધુનિક ડિઝાઇન વચ્ચે સેતુ બનશે
NIFT ગાંધીનગરના ડિરેક્ટર ડૉ. સમીર સૂદે જણાવ્યું હતું કે, ‘સ્વર્ણિમ ભારત – વિરાસત અને વિકાસ’ થીમ ભારતના સમૃદ્ધ સાંસ્કૃતિક વારસા અને ભવિષ્યની આકાંક્ષાઓ વચ્ચે અર્થપૂર્ણ સંવાદ સ્થાપિત કરવાની દિશા દર્શાવે છે. સાબરમતી રિવરફ્રન્ટ અને અટલ બ્રિજની પૃષ્ઠભૂમિમાં યોજાનારો આ કાર્યક્રમ ભારતની જીવંત હસ્તકલા પરંપરાઓને પ્રદર્શિત કરવા, કારીગર સમુદાયોને પ્રોત્સાહન આપવા અને પરંપરાગત જ્ઞાનને આધુનિક ડિઝાઇન સાથે જોડવા માટે મંચ પૂરો પાડશે.
આ પહેલનો મુખ્ય ઉદ્દેશ પરંપરાગત હસ્તકલાને વધુ ઓળખ અપાવવાનો, કારીગરો અને ગ્રાહકો વચ્ચે સીધો સંપર્ક વધારવાનો તથા હસ્તકલા ક્ષેત્રમાં નવીનતા, ઉદ્યોગસાહસિકતા અને ડિઝાઇન આધારિત વિકાસને પ્રોત્સાહન આપવાનો છે. સાથે જ, પરંપરાગત કૌશલ્યોનું જતન કરીને બદલાતા સમયની જરૂરિયાતો અનુસાર તેને નવી તકો સાથે જોડવાનો પ્રયાસ કરવામાં આવશે.
જાહેર જનતા અને મીડિયા માટે આમંત્રણ
NIFT ગાંધીનગર દ્વારા મીડિયા સંસ્થાઓ, હસ્તકલાપ્રેમીઓ, ડિઝાઇન ક્ષેત્રના વ્યાવસાયિકો, વિદ્યાર્થીઓ, પરિવારો અને સામાન્ય નાગરિકોને આ મહોત્સવમાં ભાગ લેવા આમંત્રણ આપવામાં આવ્યું છે.
રજિસ્ટ્રેશન અને ઈ-પાસ માટેની લિંક:
https://register.chhaap.tech/register
મીડિયા સંપર્ક:
- ડૉ. ભાસ્કર બેનરજી, એસોસિયેટ પ્રોફેસર (FMS): 8980074681
- ડૉ. સંજીવ જૈન, હેડ (રિસોર્સ સેન્ટર): 9974290011
