રાંચી: ભારતીય ટી-20 ટીમે વર્ષ 2026માં પોતાની આક્રમક બેટિંગના દમ પર નવો ઇતિહાસ રચ્યો છે. ભારતીય ટીમના બેટ્સમેનોએ ચાલુ વર્ષે એવો રેકોર્ડ બનાવ્યો છે, જે આ પહેલાં કોઈ પણ ફુલ મેમ્બર ટીમ કરી શકી નથી. વેસ્ટ ઇન્ડીઝ સામેની શ્રેણી દરમિયાન ટીમ ઇન્ડિયાએ એક વર્ષમાં 300 છગ્ગા ફટકારવાનો આંકડો પાર કરી લીધો છે.
ફુલ મેમ્બર ટીમોમાં એક કેલેન્ડર વર્ષમાં સૌથી વધુ છગ્ગા ફટકારવાનો રેકોર્ડ અગાઉથી જ ટીમ ઇન્ડિયાના નામે હતો. હવે ભારતીય ટીમે વર્ષ 2026માં પોતાના આ રેકોર્ડમાં વધુ સુધારો કર્યો છે. વર્ષ 2022માં ભારતીય બેટ્સમેનોએ કુલ 289 છગ્ગા ફટકાર્યા હતા. જ્યારે વર્ષ 2026માં સમાચાર લખાય છે ત્યાં સુધીમાં ભારતીય ટીમના ખાતામાં કુલ 311 છગ્ગા નોંધાઈ ચૂક્યા છે.
ભારતીય બેટ્સમેનોએ વર્ષ 2026માં ખૂબ જ ઝડપથી છગ્ગા ફટકાર્યા છે. ટીમ ઇન્ડિયાના બેટ્સમેનોએ દર 11મા બોલે છગ્ગો ફટકાર્યો છે. ઓછામાં ઓછી 15 મેચ રમનારા ફુલ મેમ્બર દેશોમાં બોલ અને છગ્ગાના આંકડાનો આ ગુણોત્તર સૌથી વધુ છે. રાંચીમાં શાનદાર બેટિંગ કરતાં ટીમ ઇન્ડિયાએ વેસ્ટ ઇન્ડીઝ સામે 20 ઓવરમાં 5 વિકેટ ગુમાવીને 249 રનનો વિશાળ સ્કોર બનાવ્યો હતો. આંતરરાષ્ટ્રીય ટી-20 ક્રિકેટમાં વેસ્ટ ઇન્ડીઝ સામે ભારતીય ટીમનો આ અત્યાર સુધીનો સૌથી મોટો સ્કોર છે.
ભારત તરફથી સંજુ સેમસને સૌથી વધુ 82 રન (41 બોલમાં) બનાવ્યા હતા. જ્યારે તિલક વર્માએ 44 રન (18 બોલમાં) અને ઈશાન કિશને 43 રન (22 બોલમાં)ની ઇનિંગ રમી હતી. આ મેચમાં ભારતીય બેટ્સમેનોએ કુલ 13 છગ્ગા ફટકાર્યા હતા. સંજુ સેમસને ચાર છગ્ગા ફટકાર્યા હતા. જ્યારે શ્રેયસ અય્યર અને તિલક વર્માએ 3-3 છગ્ગા, ઈશાન કિશને 2 છગ્ગા અને અભિષેક શર્માએ એક છગ્ગો ફટકાર્યો હતો.
