અમદાવાદ, : અમદાવાદ સ્થિત ‘ઉદગમ ચેરિટેબલ ટ્રસ્ટ’ના મેનેજિંગ ટ્રસ્ટી ડૉ. મયુર જોષીને જળ સંચય, પર્યાવરણ જાગૃતિ, સામાજિક કલ્યાણ અને લોકભાગીદારી આધારિત કાર્યોમાં તેમના ઉત્કૃષ્ટ યોગદાન બદલ ઉત્તરાખંડના દેહરાદૂનમાં ‘ગંગા સમગ્ર’ દ્વારા ‘ગંગા અલંકરણ 2026’ સન્માનથી નવાજવામાં આવ્યા છે. દેહરાદૂનમાં યોજાયેલા વિશેષ કાર્યક્રમમાં ‘ગંગા સમગ્ર’ના રાષ્ટ્રીય સંગઠન મંત્રી શ્રી રામાશિષજીની ઉપસ્થિતિમાં ઉત્તરાખંડના પર્યાવરણ સંરક્ષણ અને જળવાયુ પરિવર્તન મંત્રી શ્રી રામસિંહ કેડાના હસ્તે ડૉ. મયુર જોષીને આ સન્માન અર્પણ કરવામાં આવ્યું હતું. આ સન્માન ડૉ. જોષી અને ઉદગમ ચેરિટેબલ ટ્રસ્ટ દ્વારા છેલ્લા ત્રણ દાયકાથી કરવામાં આવી રહેલા લોકકલ્યાણ, સામાજિક સશક્તિકરણ, જળ સંરક્ષણ અને પર્યાવરણ જાગૃતિના પ્રયાસોની રાષ્ટ્રીય સ્તરે લેવાયેલી નોંધ તરીકે જોવામાં આવી રહ્યું છે.
અમદાવાદથી રાષ્ટ્રીય જળ સંવાદ સુધી
ઉદગમ ચેરિટેબલ ટ્રસ્ટના પ્રયાસો હવે માત્ર ગુજરાત પૂરતા સીમિત રહ્યા નથી. તાજેતરમાં ટ્રસ્ટ દ્વારા અમદાવાદમાં બે દિવસીય ‘Bharat Discourses on Water @2047’ કાર્યક્રમનું આયોજન કરવામાં આવ્યું હતું. તેમાં પાંચ પદ્મ પુરસ્કાર વિજેતાઓ ઉપરાંત નીતિ ઘડનારાઓ, સંશોધકો, વૈજ્ઞાનિકો, જળ નિષ્ણાતો અને ગ્રામ્ય વિસ્તારોમાં કાર્યરત સામાજિક કાર્યકરો એક મંચ પર એકત્ર થયા હતા. સંમેલનનો મુખ્ય ઉદ્દેશ્ય ‘Bharat by 2047’ સુધીમાં ભારતને જળ સુરક્ષિત બનાવવા માટે જળ સંચય, પરંપરાગત જળ વ્યવસ્થાઓ અને લોકભાગીદારી આધારિત ઉકેલો અંગે રાષ્ટ્રીય સ્તરે ચર્ચા અને વિચારવિમર્શ કરવાનો હતો.
આ રાષ્ટ્રીય જળ સંવાદને અમદાવાદમાં લાવવામાં ડૉ. મયુર જોષીએ મહત્વપૂર્ણ ભૂમિકા ભજવી હતી. આ પહેલ દ્વારા અમદાવાદને દેશભરમાં પાણીની સમસ્યાઓના વ્યવહારુ અને જનભાગીદારી આધારિત ઉકેલો શોધવાના વ્યાપક અભિયાન સાથે જોડવાનો પ્રયાસ કરવામાં આવ્યો હતો.
ત્રણ દાયકાથી સમાજ અને પર્યાવરણ માટે કાર્ય
ડૉ. મયુર જોષીના માર્ગદર્શન હેઠળ ઉદગમ ચેરિટેબલ ટ્રસ્ટ છેલ્લા ત્રણ દાયકાથી લોકકલ્યાણ, સામાજિક સશક્તિકરણ અને પર્યાવરણ સંરક્ષણ ક્ષેત્રે વિવિધ પ્રયાસો કરી રહ્યું છે. આ કામગીરીમાં લોકોના સહયોગ, સામૂહિક જવાબદારી અને લાંબા ગાળાના સામાજિક પ્રભાવ પર વિશેષ ભાર મૂકવામાં આવે છે. ‘ગંગા અલંકરણ 2026’ સન્માન આ સતત પ્રયાસોને વધુ વ્યાપક સ્તરે આગળ વધારવા માટે પ્રેરણારૂપ બન્યું છે.
સન્માન અંગે ખુશી વ્યક્ત કરતાં ડૉ. મયુર જોષીએ જણાવ્યું હતું, “આ સન્માન અમારા કામને વધુ ઉત્સાહથી આગળ વધારવા માટે પ્રેરણા પૂરું પાડે છે. અમદાવાદ હંમેશાં સમૂહ ભાવનામાં માનનારું શહેર રહ્યું છે. પાણી, પર્યાવરણ અને સમાજ ઉત્કર્ષના પડકારોને પહોંચી વળવા અમે લોકો, નિષ્ણાતો અને સંસ્થાઓને સાથે જોડીને આ ભાવનાને વધુ મજબૂત કરવા માંગીએ છીએ.”
દેહરાદૂનમાં મળેલું આ સન્માન અમદાવાદમાંથી શરૂ થયેલા જળ સુરક્ષા, પર્યાવરણ સંરક્ષણ અને ટકાઉ વિકાસના પ્રયાસોને રાષ્ટ્રીય સ્તરે મળેલી માન્યતા તરીકે મહત્વપૂર્ણ છે. તે દર્શાવે છે કે સ્થાનિક સ્તરે શરૂ થયેલી જનભાગીદારી આધારિત પહેલો દેશના મોટા પર્યાવરણીય અને સામાજિક પડકારોના ઉકેલમાં મહત્વપૂર્ણ ભૂમિકા ભજવી શકે છે.
