જો તમને કહેવામાં આવે કે હવે તમે Netflix પર ટીવી શો, ફિલ્મો અને વેબ સિરીઝ અલગથી સબ્સ્ક્રિપ્શન લીધા વગર જોઈ શકશો, તો કદાચ તમને વિશ્વાસ નહીં આવે. પરંતુ આ વાત સાચી છે. Flipkart એ Netflix સાથે ભાગીદારીની જાહેરાત કરી છે. તેના અંતર્ગત Flipkart Plus સભ્યો હવે સામાન્ય શોપિંગ કરીને દર મહિને Netflix Mobile Plan મેળવી શકશે. આ સુવિધા 1 ઓગસ્ટથી શરૂ થઈ રહી છે અને તેના માટે અલગથી Netflixનું સબ્સ્ક્રિપ્શન ખરીદવાની કે રિચાર્જ કરવાની જરૂર નહીં પડે.
કેવી રીતે મળશે Netflix Mobile Plan?
આ ઓફરનો લાભ લેવા માટે Flipkart Plus સભ્યોએ એક કેલેન્ડર મહિનામાં ઓછામાં ઓછા ₹299 અથવા તેથી વધુ કિંમતના ચાર ક્વોલિફાઇંગ ઓર્ડર પૂર્ણ કરવા પડશે. આ ખરીદી Flipkart, Flipkart Grocery અને Flipkart Minutes પરથી કરી શકાશે. જેમ જ ગ્રાહક પોતાની ચોથી ક્વોલિફાઇંગ ખરીદી પૂર્ણ કરશે, તેમ તેને આગામી 30 દિવસ માટે Netflix Mobile Plan મફતમાં મળશે.
આ પ્લાનને Flipkart એપમાં જ એક્ટિવેટ કરી શકાશે અને તેના માટે કોઈ વધારાની ચૂકવણી કરવાની રહેશે નહીં. જોકે, 30 દિવસની મુદત પૂરી થયા પછી આગામી મહિને ફરી આ લાભ મેળવવા માટે ગ્રાહકે ફરીથી ચાર ક્વોલિફાઇંગ ખરીદી કરવી પડશે.
Flipkart Plus સભ્ય કેવી રીતે બનશો?
જે ગ્રાહકો હાલમાં Flipkart Plusના સભ્ય નથી, તેઓ છેલ્લા 12 મહિનામાં 15 ઓર્ડર પૂર્ણ કરીને Plus સભ્ય બની શકે છે. આ સભ્યપદ માટે કોઈ વધારાની ફી લેવામાં આવતી નથી.
કંપનીઓના જણાવ્યા અનુસાર, આ ભાગીદારીનો હેતુ શોપિંગ રિવોર્ડ અને ડિજિટલ એન્ટરટેઇનમેન્ટને એકસાથે જોડવાનો છે. Flipkartના જણાવ્યા મુજબ, ઘણા ગ્રાહકો દર મહિને ગ્રોસરી, રોજિંદી જરૂરી વસ્તુઓ અને ક્વિક કોમર્સ દ્વારા અનેક ઓર્ડર આપે છે. તેથી તેઓ પોતાની નિયમિત ખરીદી દ્વારા સરળતાથી આ રિવોર્ડ મેળવી શકશે.
આ ઓફર Flipkartના સમગ્ર ઇકોસિસ્ટમ**માં ઉપલબ્ધ રહેશે, જેમાં Flipkart Grocery અને Flipkart Minutes જેવી સેવાઓ પણ સામેલ છે. ઓફર માટે પાત્ર ગ્રાહકો Netflix Mobile Plan દ્વારા ભારતીય તેમજ આંતરરાષ્ટ્રીય ફિલ્મો અને વેબ સિરીઝનો આનંદ માણી શકશે.
આ ભાગીદારી અંગે Flipkartના CFO અને SVP (સ્ટ્રેટેજિક પાર્ટનરશિપ) રવિ અય્યરએ જણાવ્યું કે, આ પહેલ ગ્રાહકોની હાલની ખરીદીની આદતોને ધ્યાનમાં રાખીને તૈયાર કરવામાં આવી છે અને તેમાં ઇનામ તરીકે મનોરંજનને પણ જોડવામાં આવ્યું છે. જ્યારે Netflixના APAC પાર્ટનરશિપ – બિઝનેસ ડેવલપમેન્ટના વાઇસ પ્રેસિડેન્ટ લોરેન્ટ ઉગુએને જણાવ્યું કે, ભારતમાં Netflixની આ પ્રથમ ઈ-કોમર્સ ભાગીદારી છે. તેનો હેતુ રોજિંદી ગ્રાહક આદતો સાથે Netflixને વધુ લોકો સુધી પહોંચાડવાનો છે.
આ ભાગીદારી Flipkart Plus સભ્યો માટે એક નવા લોયલ્ટી લાભ તરીકે રજૂ કરવામાં આવી છે, જેમાં વારંવાર થતી શોપિંગને દર મહિને મળતા સ્ટ્રીમિંગ સબ્સ્ક્રિપ્શન સાથે જોડવામાં આવી છે.
