Retail Inflation: મોંઘવારીનો માર સહન કરી રહેલા સામાન્ય લોકોને વધુ એક મોટો ઝટકો લાગ્યો છે. દેશનો છૂટક મોંઘવારી દર ઓક્ટોબર મહિનામાં વધીને 6.09 ટકા (પ્રોવિઝનલ) પર પહોંચી ગયો છે. આ આંકડો ભારતીય રિઝર્વ બેંક (RBI) દ્વારા નક્કી કરવામાં આવેલી 6 ટકાની ઉપલી મર્યાદા કરતાં પણ વધારે છે. ગુરુવારે જાહેર કરવામાં આવેલા સરકારી આંકડાઓમાં આ માહિતી સામે આવી છે. સતત 12મા મહિને છૂટક મોંઘવારી દરમાં વધારો નોંધાયો છે. સપ્ટેમ્બર 2026માં છૂટક મોંઘવારી દર 5.54 ટકા હતો, જ્યારે ઓક્ટોબર 2025માં તે માત્ર 0.25 ટકા નોંધાયો હતો.
સતત 12મા મહિને મોંઘવારીમાં વધારો
સરકારી આંકડાઓ અનુસાર, છૂટક મોંઘવારી દરમાં સતત 12મા મહિને વધારો નોંધાયો છે. ગ્રામીણ અને શહેરી વિસ્તારોમાં મોંઘવારીના આંકડા અલગ-અલગ રહ્યા છે. દેશના ગ્રામીણ વિસ્તારોમાં મોંઘવારીની અસર વધુ જોવા મળી રહી છે. ઓક્ટોબરમાં ગ્રામીણ વિસ્તારોમાં છૂટક મોંઘવારી દર 6.63 ટકા રહ્યો હતો, જ્યારે શહેરી વિસ્તારોમાં તે 5.41 ટકા નોંધાયો હતો.
ખાદ્ય ચીજવસ્તુઓના ભાવમાં વધારો
ઓક્ટોબર મહિનામાં ખાદ્ય મોંઘવારી દરમાં પણ તેજી જોવા મળી છે. સરકારી આંકડાઓ અનુસાર, ખાદ્ય મોંઘવારી વધીને 8.94 ટકા પર પહોંચી ગઈ છે, જ્યારે સપ્ટેમ્બર મહિનામાં તે 7.74 ટકા હતી. એટલે કે, માત્ર એક મહિનામાં ખાદ્ય મોંઘવારીમાં 1.20 ટકાનો વધારો થયો છે.
ડુંગળી, લસણ અને આદુ મોંઘાં થયાં
મંત્રાલય દ્વારા જાહેર કરવામાં આવેલા આંકડાઓ અનુસાર, ઓક્ટોબરમાં વાર્ષિક ધોરણે જે 5 વસ્તુઓના ભાવમાં સૌથી વધુ વધારો જોવા મળ્યો છે, તેમાં ડુંગળી (116.22 ટકા), લસણ (60.74 ટકા), ચાંદીના ઘરેણાં (52.39 ટકા), આદુ (48.32 ટકા) અને લીંબુ (47.30 ટકા)નો સમાવેશ થાય છે.
બીજી તરફ, આ સમયગાળા દરમિયાન વાર્ષિક ધોરણે જે 5 વસ્તુઓના ભાવમાં સૌથી વધુ ઘટાડો નોંધાયો છે, તેમાં બટાકા (-14.24 ટકા), ફૂલકોબી (-10.57 ટકા), નારિયેળ (-5.60 ટકા), રીંગણ (-3.34 ટકા) અને કોબીજ (-1.92 ટકા)નો સમાવેશ થાય છે.
આ ઉપરાંત, ઓક્ટોબર મહિનામાં છૂટક મોંઘવારીના મામલે તમિલનાડુ (7.29 ટકા), તેલંગાણા (7.26 ટકા), આંધ્રપ્રદેશ (7.25 ટકા), મધ્યપ્રદેશ (7.19 ટકા) અને ઓડિશા (7.17 ટકા) દેશનાં ટોચનાં પાંચ રાજ્યોમાં સામેલ રહ્યાં હતાં.
મોંઘવારી મામલે RBIની સહનશીલતાની મર્યાદા તૂટી
ઉલ્લેખનીય છે કે, સરકારે ભારતીય રિઝર્વ બેંક (RBI)ને છૂટક મોંઘવારી દર 4 ટકાની આસપાસ નિયંત્રિત રાખવાની જવાબદારી સોંપી છે. જોકે, તેમાં 2 ટકાની વધઘટની છૂટ આપવામાં આવી છે. તેનો સીધો અર્થ એ છે કે જો મોંઘવારીનો દર 2 ટકાથી 6 ટકાની વચ્ચે રહે છે, તો તેને સ્વીકાર્ય મર્યાદામાં ગણવામાં આવે છે. પરંતુ ઓક્ટોબરમાં મોંઘવારી દર 6.09 ટકા પર પહોંચતાં આ મર્યાદા વટાવી ગઈ છે.
