અમદાવાદ: ગુજરાતમાં ચોમાસું વધુ સક્રિય બનતાં રાજ્યના અનેક વિસ્તારોમાં વરસાદી માહોલ જામ્યો છે. દક્ષિણ ગુજરાતમાં સૌથી વધુ વરસાદ નોંધાયો છે, જ્યારે સૌરાષ્ટ્ર અને ઉત્તર ગુજરાતના કેટલાક વિસ્તારોમાં પણ સારો વરસાદ વરસ્યો છે. ભારતીય હવામાન વિભાગ (IMD)એ આગામી 7 જુલાઈ સુધી સમગ્ર રાજ્યમાં વરસાદી માહોલ યથાવત રહેવાની આગાહી કરી છે. સાથે જ કેટલાક જિલ્લાઓ માટે રેડ, ઓરેન્જ અને યલો એલર્ટ જાહેર કરવામાં આવ્યું છે.
IMDના 1 જુલાઈના બુલેટિન અનુસાર દમણમાં એકાદ સ્થળે અત્યંત ભારે વરસાદ નોંધાયો હતો. વલસાડ અને દમણમાં ખૂબ ભારે વરસાદ જ્યારે નવસારી, વલસાડ અને સુરત જિલ્લાના કેટલાક વિસ્તારોમાં ભારે વરસાદ પડ્યો હતો. બીજી તરફ કચ્છમાં હવામાન મુખ્યત્વે સૂકું રહ્યું હતું.
ચોમાસું વધુ આગળ વધશે
હવામાન વિભાગના જણાવ્યા અનુસાર દક્ષિણ-પશ્ચિમ ચોમાસું ગુજરાતના વધુ વિસ્તારોમાં આગળ વધી ગયું છે અને આગામી બે દિવસમાં રાજ્યના બાકીના વિસ્તારોમાં પણ ચોમાસું આગળ વધવા માટે અનુકૂળ પરિસ્થિતિ છે. ઉત્તર બંગાળની ખાડી અને દક્ષિણ બાંગ્લાદેશ નજીક સક્રિય અપર એર સાયક્લોનિક સર્ક્યુલેશનના પ્રભાવ હેઠળ 3 જુલાઈ આસપાસ ઉત્તર-પશ્ચિમ બંગાળની ખાડીમાં લો-પ્રેશર સિસ્ટમ સર્જાય તેવી શક્યતા છે. તેના કારણે ગુજરાત સહિત દેશના અનેક વિસ્તારોમાં વરસાદની ગતિવિધિ વધુ તેજ બની શકે છે.
તાપમાનમાં થશે ઘટાડો
હવામાન વિભાગે આગામી દિવસોમાં રાજ્યના મહત્તમ તાપમાનમાં 2થી 4 ડિગ્રી સેલ્સિયસ સુધી ઘટાડો થવાની શક્યતા વ્યક્ત કરી છે. ત્યારબાદ તાપમાનમાં કોઈ ખાસ ફેરફાર થવાની સંભાવના નથી.
ક્યારે ક્યાં કેટલું એલર્ટ?
2 જુલાઈ
રેડ એલર્ટ: સુરત, નવસારી, ડાંગ અને વલસાડ
દક્ષિણ ગુજરાત અને સૌરાષ્ટ્રના કેટલાક જિલ્લાઓમાં ઓરેન્જ અને યલો એલર્ટ, ભારેથી અતિભારે વરસાદની આગાહી.
3 જુલાઈ
રેડ એલર્ટ: ડાંગ, વલસાડ, નવસારી, તાપી, દમણ, દાદરા અને નગર હવેલી
ઓરેન્જ એલર્ટ: નર્મદા, સુરત, ભરૂચ, અમરેલી અને ભાવનગર
4 જુલાઈ
રેડ એલર્ટ: નર્મદા, તાપી અને ડાંગ
ઓરેન્જ એલર્ટ: અમરેલી, ભાવનગર, ભરૂચ, સુરત, નવસારી, વલસાડ અને છોટાઉદેપુર
5 જુલાઈ
રેડ એલર્ટ: તાપી, ડાંગ, દમણ અને વલસાડ
6 અને 7 જુલાઈ
રાજ્યના વિવિધ જિલ્લાઓમાં ઓરેન્જ અને યલો એલર્ટ જાહેર કરવામાં આવ્યા છે અને ભારેથી અતિભારે વરસાદની શક્યતા વ્યક્ત કરવામાં આવી છે. હવામાન વિભાગે લોકોને ભારે વરસાદ દરમિયાન સાવચેતી રાખવા, નદી-નાળાઓ અને નીચાણવાળા વિસ્તારોમાં જવાનું ટાળવા તેમજ સ્થાનિક તંત્ર દ્વારા આપવામાં આવતી સૂચનાઓનું પાલન કરવાની અપીલ કરી છે. આગામી એક સપ્તાહ દરમિયાન સમગ્ર ગુજરાતમાં ચોમાસું વધુ જોર પકડે તેવી શક્યતા હોવાથી ખેડૂતો સહિત સામાન્ય નાગરિકોને સતર્ક રહેવાની સલાહ આપવામાં આવી છે.
