સુરત–બીલીમોરા વચ્ચેના 50 કિમીના સેક્શનમાં OHE સિસ્ટમ થશે સક્રિય, 2 × 25 kV આધુનિક ટ્રેક્શન સિસ્ટમનો ઉપયોગ
Ahmedabad : મુંબઈ–અમદાવાદ બુલેટ ટ્રેન પ્રોજેક્ટને લઈને મહત્વપૂર્ણ અપડેટ સામે આવ્યું છે. પ્રોજેક્ટ અંતર્ગત સુરત અને બીલીમોરા વચ્ચેના પ્રથમ સેક્શનમાં 20 નવેમ્બર 2026થી ઓવરહેડ ઇક્વિપમેન્ટ (OHE) સિસ્ટમને વીજળી પુરવઠો શરૂ કરવામાં આવશે. આ કામગીરી બુલેટ ટ્રેન પ્રોજેક્ટની પ્રગતિમાં મહત્વપૂર્ણ સીમાચિહ્ન સાબિત થશે.
મુંબઈ–અમદાવાદ બુલેટ ટ્રેન કોરિડોરમાં આધુનિક 2 × 25 kV ઓવરહેડ ટ્રેક્શન સિસ્ટમનો ઉપયોગ કરવામાં આવી રહ્યો છે. સુરત અને બીલીમોરા વચ્ચેનો આ સેક્શન આશરે 50 કિલોમીટર લાંબો છે, જેમાં એલિવેટેડ ટ્રેક પર અપ અને ડાઉન એમ બંને લાઇનોનો સમાવેશ થાય છે.
508 કિલોમીટર લાંબા સમગ્ર કોરિડોરમાં વીજળી પુરવઠા માટે કુલ 14 ટ્રેક્શન સબ-સ્ટેશન (TSS) બનાવવામાં આવી રહ્યાં છે. આ સબ-સ્ટેશન ગ્રીડમાંથી વીજળી મેળવીને ઓવરહેડ ટ્રેક્શન સિસ્ટમ સુધી પહોંચાડશે. સમગ્ર વીજ પુરવઠા વ્યવસ્થાનું મોનિટરિંગ કેન્દ્રીયકૃત નિયંત્રણ કેન્દ્ર (Centralised Control Centre) દ્વારા કરવામાં આવશે, જેથી સુરક્ષિત અને અવિરત કામગીરી સુનિશ્ચિત કરી શકાય.
જાહેર સુરક્ષાને લઈને ખાસ સૂચના
OHE સિસ્ટમને વીજળીથી સક્રિય કર્યા બાદ સંબંધિત સેક્શનમાં લગાવવામાં આવેલા વીજળીના તાર હંમેશાં વીજપ્રવાહિત રહેશે. આથી કોરિડોરની આસપાસ રહેતા નાગરિકો, મુસાફરો, બાંધકામ શ્રમિકો અને અન્ય લોકોને વીજળીના તાર તથા સંબંધિત ઉપકરણોથી દૂર રહેવા સૂચના આપવામાં આવી છે.
તેમજ વીજળીના તારને સ્પર્શ કરવાનો પ્રયાસ ન કરવા અને તેની આસપાસ કોઈપણ પ્રકારનું અનધિકૃત કાર્ય ન કરવા ખાસ અપીલ કરવામાં આવી છે.

