અમદાવાદ: ગુજરાતમાં છેલ્લા 24 કલાક દરમિયાન હવામાન સંપૂર્ણપણે સૂકું રહ્યું હતું. હવામાન વિભાગના જણાવ્યા અનુસાર ગુજરાત રીજીયન, સૌરાષ્ટ્ર-કચ્છ તેમજ દીવ, દમણ અને દાદરા-નગર હવેલીમાં ક્યાંય નોંધપાત્ર વરસાદ નોંધાયો નથી.
રાજ્યમાં મહત્તમ તાપમાનમાં પણ કોઈ મોટો ફેરફાર જોવા મળ્યો નથી. જોકે ઉત્તર ગુજરાત અને કચ્છના કેટલાક વિસ્તારોમાં તાપમાન સામાન્ય કરતાં થોડું વધુ નોંધાયું હતું, જ્યારે રાજ્યના બાકીના વિસ્તારોમાં તાપમાન સામાન્ય સ્તરે રહ્યું હતું.
હાલ રાજ્યમાં નીચલા સ્તરે સામાન્ય રીતે દક્ષિણ-પશ્ચિમ દિશાના પવનો ફૂંકાઈ રહ્યા છે. આ વચ્ચે હવામાન વિભાગે ગુજરાતના નાગરિકો માટે રાહતના સમાચાર આપ્યા છે. વિભાગના અનુમાન મુજબ રાજ્યના કેટલાક વિસ્તારોમાં 13 જૂન સુધી ગાજવીજ સાથે છૂટાછવાયા વરસાદની શક્યતા છે.
આ સાથે જ આગામી 13 જૂન સુધી રાજ્યમાં મહત્તમ તાપમાનમાં નોંધપાત્ર વધારો થવાની કોઈ શક્યતા નથી. જેના કારણે ગરમીથી લોકોને આંશિક રાહત મળી શકે છે.
આજે 8 જૂનના રોજ દક્ષિણ ગુજરાતના તાપી, ડાંગ, વલસાડ અને નવસારી જિલ્લામાં કેટલાક સ્થળોએ ગાજવીજ સાથે હળવાથી મધ્યમ વરસાદ વરસી શકે છે. હવામાન વિભાગે ખેડૂતો અને નાગરિકોને બદલાતા હવામાનને ધ્યાનમાં રાખીને જરૂરી સાવચેતી રાખવાની સલાહ આપી છે.
રાજ્યમાં ચોમાસા પૂર્વેના વાતાવરણને કારણે આગામી દિવસોમાં વાદળછાયું વાતાવરણ અને સ્થાનિક સ્તરે વરસાદી ઝાપટાં જોવા મળી શકે છે.
