તાજેતરમાં વિશ્વભરમાં આબોહવામાં અસામાન્ય ફેરફારો અને કુદરતી આફતોની વધતી ઘટનાઓને કારણે બાબા વેંગાની વર્ષ 2026 અંગેની આગાહીઓ ફરી ચર્ચામાં આવી છે. વિશ્વના વિવિધ વિસ્તારોમાં અતિશય ગરમી, જંગલોમાં લાગતી આગ, ભારે વરસાદ, પૂરની સ્થિતિ, ભૂકંપ અને આર્થિક અનિશ્ચિતતા જેવી પરિસ્થિતિઓ જોવા મળી રહી છે.
બાબા વેંગાએ પોતાની આગાહીઓમાં દાવો કર્યો હતો કે વર્ષ 2026 કુદરતી આફતો માટે પડકારજનક સાબિત થઈ શકે છે. તેમની આગાહી મુજબ ભૂકંપ, જ્વાળામુખી વિસ્ફોટ, અતિવૃષ્ટિ અને દુષ્કાળ જેવી ઘટનાઓ વિશ્વના અનેક વિસ્તારોને અસર કરી શકે છે, જેના કારણે પર્યાવરણને પણ ભારે નુકસાન પહોંચવાની શક્યતા વ્યક્ત કરવામાં આવી હતી.
વિશ્વના ઘણા દેશોમાં હાલ બિનમોસમી વરસાદ અને તોફાની હવામાનની સ્થિતિ જોવા મળી રહી છે. ભારતમાં પણ તાજેતરમાં વાવાઝોડા અને વરસાદના કારણે જાનમાલનું નુકસાન નોંધાયું છે. અનેક રાજ્યોમાં બિનમોસમી વરસાદ અને આંધીના કારણે અનેક લોકોના મોત થયા હોવાના અહેવાલો સામે આવ્યા છે. ભારતીય હવામાન વિભાગે પણ વિવિધ રાજ્યો માટે વરસાદ અને વાવાઝોડાની ચેતવણી જાહેર કરી છે.
ચીન સહિતના કેટલાક દેશોમાં ભારે વરસાદને કારણે પૂરની સ્થિતિ સર્જાઈ છે. બીજી તરફ વૈજ્ઞાનિકોનું માનવું છે કે વિશ્વને 2026 દરમિયાન સુપર અલ નીનોની અસરનો સામનો કરવો પડી શકે છે. નિષ્ણાતોના જણાવ્યા મુજબ, જો અલ નીનોની અસર વધુ તીવ્ર બને તો 1877-78 દરમિયાન જોવા મળેલી ગંભીર પરિસ્થિતિ જેવી સ્થિતિ સર્જાઈ શકે છે.
અલ નીનોની અસર સામાન્ય રીતે વૈશ્વિક હવામાન ચક્રને પ્રભાવિત કરે છે. તેના કારણે કેટલાક વિસ્તારોમાં દુષ્કાળ પડે છે તો કેટલાક વિસ્તારોમાં અતિભારે વરસાદ અને પૂર જેવી પરિસ્થિતિઓ સર્જાય છે. આ કારણે કૃષિ, જળસંચય અને પર્યાવરણ પર પણ વ્યાપક અસર પડી શકે છે.
ભારત, યુરોપ અને વિશ્વના અન્ય ઘણા દેશોમાં હાલ અસહ્ય ગરમીનો અનુભવ થઈ રહ્યો છે. હવામાન નિષ્ણાતોના જણાવ્યા અનુસાર, આ વર્ષે ચોમાસું પણ સામાન્ય કરતાં મોડું પહોંચવાની શક્યતા છે. યુકે, ફ્રાન્સ, સ્પેન સહિત યુરોપના અનેક દેશોમાં પણ તાપમાનના નવા રેકોર્ડ નોંધાઈ રહ્યા છે.
જોકે બાબા વેંગાની આગાહીઓ અંગે કોઈ વૈજ્ઞાનિક પુરાવા ઉપલબ્ધ નથી, તેમ છતાં વિશ્વમાં વધી રહેલી આબોહવા સંબંધિત સમસ્યાઓ અને કુદરતી આફતોને કારણે લોકોમાં તેમની આગાહીઓને લઈને ચર્ચા અને ઉત્સુકતા વધી રહી છે. વૈજ્ઞાનિકો સતત ભાર મૂકી રહ્યા છે કે આબોહવા પરિવર્તન અને માનવસર્જિત પર્યાવરણીય અસરોથી આવી પરિસ્થિતિઓ વધુ ગંભીર બની રહી છે.
