57મા IFFIમાં 100 યુવા પ્રતિભાઓને તક, CMOTની છઠ્ઠી આવૃત્તિમાં દેશભરના યુવા ફિલ્મમેકર્સ ભાગ લેશે

Kamlesh
2 Min Read

ભારતના યુવા ફિલ્મ નિર્માતાઓ અને સર્જનાત્મક પ્રતિભાઓને પ્રોત્સાહન આપવા માટે 57મા આંતરરાષ્ટ્રીય ફિલ્મ મહોત્સવ (IFFI)માં ‘ક્રિએટિવ માઇન્ડ્સ ઓફ ટુમોરો’ (CMOT)ની છઠ્ઠી આવૃત્તિનું આયોજન કરવામાં આવશે. ગોવામાં યોજાનારા આ કાર્યક્રમમાં દેશભરમાંથી પસંદ કરાયેલા 100 યુવા સર્જનાત્મક પ્રતિભાઓને ભાગ લેવાની તક મળશે.

માહિતી અને પ્રસારણ મંત્રાલયની પહેલ અને નેશનલ ફિલ્મ ડેવલપમેન્ટ કોર્પોરેશન (NFDC) દ્વારા અમલમાં મૂકવામાં આવતો CMOT યુવા પ્રતિભાઓને ફિલ્મ અને મનોરંજન ઉદ્યોગ સાથે જોડવાનું મહત્વપૂર્ણ પ્લેટફોર્મ છે. વર્ષ 2026ની આ આવૃત્તિમાં ફિલ્મ નિર્માણ સાથે જોડાયેલા વિવિધ ક્ષેત્રોના યુવાનોને એકસાથે લાવવામાં આવશે.

આ કાર્યક્રમમાં દિગ્દર્શન, અભિનય, સિનેમેટોગ્રાફી, એડિટિંગ, સ્ક્રિપ્ટ રાઇટિંગ, પ્લેબેક સિંગિંગ, સંગીત રચના, સાઉન્ડ રેકોર્ડિંગ, કોસ્ચ્યુમ ડિઝાઇન, હેર અને મેકઅપ, આર્ટ ડિરેક્શન, એનિમેશન, VFX, AR, VR તેમજ વોઇસ-ઓવર અને ડબિંગ જેવા ક્ષેત્રોનો સમાવેશ કરવામાં આવ્યો છે.

સહભાગીઓની પસંદગી માટે ત્રણ તબક્કાની પ્રક્રિયા હાથ ધરવામાં આવે છે. પ્રથમ તબક્કામાં ફિલ્મ એન્ડ ટેલિવિઝન ઇન્સ્ટિટ્યૂટ ઓફ ઇન્ડિયા (FTII)ના ફેકલ્ટી સભ્યોની 13 સભ્યોની જ્યુરી અરજીઓનું મૂલ્યાંકન કરે છે. ત્યારબાદ ઉદ્યોગના અનુભવી નિષ્ણાતોની 12 સભ્યોની ગ્રાન્ડ જ્યુરી અંતિમ સહભાગીઓની પસંદગી કરે છે. જ્યારે ફિલ્મ નિર્માણ ચેલેન્જનું મૂલ્યાંકન પાંચ સભ્યોની ગ્રેટ ગ્રાન્ડ જ્યુરી દ્વારા કરવામાં આવે છે.

આ કાર્યક્રમનું મુખ્ય આકર્ષણ 48 કલાકની ફિલ્મમેકિંગ ચેલેન્જ રહેશે. NFDCના સહયોગથી FTII, પુણે દ્વારા આયોજિત આ ચેલેન્જમાં અલગ-અલગ ક્ષેત્રના યુવા સર્જકોની ટીમ માત્ર 48 કલાકમાં ટૂંકી ફિલ્મ તૈયાર કરશે. નિષ્ણાતોનું માર્ગદર્શન મેળવ્યા બાદ તૈયાર થયેલી ફિલ્મોનું IFFIમાં વિશેષ સ્ક્રીનિંગ કરવામાં આવશે અને શ્રેષ્ઠ ફિલ્મોને પુરસ્કારથી સન્માનિત કરવામાં આવશે.

આ ઉપરાંત CMOT ટેલેન્ટ કેમ્પ દ્વારા યુવા સર્જકોને પ્રોડક્શન હાઉસ, ફિલ્મ સ્ટુડિયો, મ્યુઝિક લેબલ્સ, OTT પ્લેટફોર્મ્સ અને બ્રોડકાસ્ટર્સ સાથે જોડાવાની તક મળશે. તેઓ પોતાના સર્જનાત્મક કાર્યને રજૂ કરી શકશે અને ફિલ્મ ઉદ્યોગના પ્રતિનિધિઓ સાથે સીધો સંવાદ કરી શકશે.

ઉલ્લેખનીય છે કે વર્ષ 2021માં શરૂ થયેલો CMOT કાર્યક્રમ અત્યાર સુધીમાં ઉભરતા ફિલ્મમેકર્સ માટે મહત્વપૂર્ણ પ્લેટફોર્મ તરીકે વિકસ્યો છે. તેના ભૂતપૂર્વ સહભાગીઓએ કાન્સ, બર્લિનેલ, ટોરોન્ટો ઇન્ટરનેશનલ ફિલ્મ ફેસ્ટિવલ અને ઇન્ટરનેશનલ એમી એવોર્ડ્સ જેવા આંતરરાષ્ટ્રીય મંચો પર પણ ઓળખ મેળવી છે.

Share This Article