ભારતીય વાયુસેના (IAF) અને નવી દિલ્હીની કેન્દ્રીય સંસ્કૃત યુનિવર્સિટી (CSU) વચ્ચે યોગ ક્ષેત્રે શિક્ષણ અને પ્રમાણપત્ર માટે સમજૂતી કરાર (MOU) કરવામાં આવ્યો છે. આ કરાર હેઠળ અગ્નિવીરવાયુને યોગના ક્ષેત્રમાં વ્યવસ્થિત શિક્ષણ અને પ્રમાણપત્ર મેળવવાની તકો ઉપલબ્ધ કરાવવામાં આવશે.
આ સમજૂતી કરાર પર હસ્તાક્ષર સમારોહ એર હેડક્વાર્ટર ખાતે યોજાયો હતો. સમારોહની અધ્યક્ષતા એર ઓફિસર-ઇન-ચાર્જ પર્સનલ દ્વારા કરવામાં આવી હતી. ભારતીય વાયુસેના વતી સહાયક વાયુસેના પ્રમુખ (શિક્ષણ) અને કેન્દ્રીય સંસ્કૃત યુનિવર્સિટી વતી યુનિવર્સિટીના કુલપતિએ કરાર પર હસ્તાક્ષર કર્યા હતા.
આ સહયોગનો મુખ્ય ઉદ્દેશ અગ્નિવીરવાયુની ક્ષમતા નિર્માણ, કૌશલ્ય વિકાસ અને શૈક્ષણિક તકોને વધુ વિસ્તૃત કરવાનો છે. ઉચ્ચ શિક્ષણ સંસ્થાઓ સાથે ભાગીદારી કરીને અગ્નિવીરવાયુને વ્યાવસાયિક અને શૈક્ષણિક વિકાસની વધુ તકો પૂરી પાડવાના ભારતીય વાયુસેનાના પ્રયાસોમાં આ કરાર મહત્વપૂર્ણ પગલું સાબિત થશે.

