વિશ્વભરમાં સનાતન ધર્મ અને જગત જનની માં ઉમિયા આસ્થાને ઉજાગર કરવાના ઉદ્દેશ્ય સાથે કામ કરતી સંસ્થા વિશ્વ ઉમિયા ફાઉન્ડેશન અમદાવાદ દ્વારા આગામી જાન્યુઆરી મહિનામાં સનાતન પર્વની ઉજવણી કરાઈ રહી છે. જેમાં વિશ્વપ્રસિદ્ધ બાબા બાગેશ્વરધામના મહંત શ્રી ધીરેન્દ્ર કૃષ્ણશાસ્ત્રીજી અમદાવાદના જાસપુર ખાતે આવેલા વિશ્વઉમિયાધામ મંદિરમાં દિવ્ય હનુંમત કથાનું રસપાન કરાવશે. વિશ્વઉમિયાધામ દ્વારા આયોજિત દિવ્ય હનુમંત કથાના આયોજનના ભાગ રૂપે બેઠકનું આયોજન કરાયું હતું. જેમાં 1000થી વધુ ઉમાસેવકો પધાર્યા હતા. આ બેઠકમાં વિશ્વ ઉમિયા ધામના ટ્રસ્ટીશ્રીઓ તમામ કમિટીના હોદ્દેદારશ્રીઓ એવમ ઉમા સેવક મિત્રો હાજર રહ્યા હતા.
બાબા બાગેશ્વરની દિવ્ય હનુમંત કથા અંગે વાત કરતા વિશ્વ ઉમિયા ધામના પ્રણેતા એવમ પ્રમુખશ્રી આર પી પટેલ સાહેબ જણાવે છે કે ત્રણ થી છ જાન્યુઆરીએ યોજાનાર દિવ્ય હનુમંત કથા એ સમગ્ર સનાતન સમાજ માટે ખૂબ જ મહત્વનો કાર્યક્રમ છે. આ કાર્યક્રમમાં તમામ લોકો સહભાગી થઈ જગતજનની માં ઉમિયા આસ્થાને વિશ્વભરમાં ઉજાગર કરવાની છે. 29 ડિસેમ્બર 2024 ના રોજ એક ભવ્ય બાઈક અને કાર રેલી અમદાવાદ શહેરમાં નીકળશે જેમાં પણ તમામ લોકોને પધારવા હું હાર્દિક આમંત્રણ આપું છું.
