Gandhinagar : ફિટ ઇન્ડિયા મૂવમેન્ટ અંતર્ગત ‘સન્ડેઝ ઑન સાયકલ’ના 99મા સંસ્કરણનું રવિવારે ગાંધીનગરમાં આયોજન કરવામાં આવ્યું હતું. આ કાર્યક્રમમાં કેન્દ્રીય યુવા કાર્યક્રમ અને રમતગમત તથા શ્રમ અને રોજગાર મંત્રી ડૉ. મનસુખ માંડવિયા અને ગુજરાતના નાયબ મુખ્યમંત્રી હર્ષ સંઘવી ઉપસ્થિત રહ્યા હતા. બંને મહાનુભાવોએ નાગરિકો અને આંતરરાષ્ટ્રીય ખેલાડીઓ સાથે સાયકલિંગ કરીને ફિટનેસનો સંદેશ આપ્યો હતો.
ભારતીય રમતગમત પ્રાધિકરણ (SAI)ના પ્રાદેશિક કેન્દ્ર ગાંધીનગર દ્વારા દાંડી કુટીર અને મહાત્મા મંદિર પરિસરમાં કાર્યક્રમનું આયોજન કરવામાં આવ્યું હતું. સંવિધાન દિવસની થીમ પર યોજાયેલા આ કાર્યક્રમમાં શ્રમ અને રોજગાર મંત્રાલયના ચિંતન શિબિરના પ્રતિનિધિઓ પણ જોડાયા હતા.
મનસુખ માંડવિયાએ સાયકલિંગને જીવનશૈલી બનાવવાનું આહ્વાન કર્યું
કેન્દ્રીય મંત્રી ડૉ. મનસુખ માંડવિયાએ જણાવ્યું હતું કે વિકસિત ભારત 2047ના લક્ષ્યને સાકાર કરવા માટે સ્વસ્થ, ફિટ અને નશામુક્ત યુવા પેઢી જરૂરી છે. તેમણે સાયકલિંગને માત્ર સાપ્તાહિક પ્રવૃત્તિ નહીં, પરંતુ રોજિંદા જીવનનો ભાગ બનાવવા અપીલ કરી હતી. તેમના જણાવ્યા અનુસાર સાયકલિંગથી પ્રદૂષણ અને ટ્રાફિકની સમસ્યા ઘટાડવાની સાથે સ્વસ્થ જીવનશૈલીને પ્રોત્સાહન મળી શકે છે.
હર્ષ સંઘવીએ જનભાગીદારીને બિરદાવી
ગુજરાતના નાયબ મુખ્યમંત્રી હર્ષ સંઘવીએ આ અભિયાનમાં નાગરિકોની વધતી ભાગીદારીની પ્રશંસા કરી હતી. તેમણે જણાવ્યું હતું કે ફિટનેસને જીવનશૈલીનો ભાગ બનાવવામાં આ પહેલ મહત્વપૂર્ણ સાબિત થઈ રહી છે.
કાર્યક્રમની શરૂઆત સવારે 6:30 વાગ્યે ઝુમ્બા સેશનથી થઈ હતી. ત્યારબાદ દાંડી કુટીરથી મહાત્મા મંદિર સુધી આશરે 2.5 કિલોમીટરની સાયકલિંગ રેલી યોજાઈ હતી.
29 નવેમ્બરે યોજાશે 100મું સંસ્કરણ
કાર્યક્રમમાં આંતરરાષ્ટ્રીય સોફ્ટ ટેનિસ મેડલ વિજેતા આધ્યા તિવારી, જય મીના અને અનિકેત પટેલ સહિત ફિટ ઇન્ડિયા એમ્બેસેડર્સ અને ચેમ્પિયન્સ જોડાયા હતા. ઉલ્લેખનીય છે કે ડિસેમ્બર 2024માં શરૂ થયેલી આ પહેલ હવે દેશવ્યાપી ફિટનેસ આંદોલન બની છે. સંવિધાન દિવસ પહેલાં દેશભરમાં 26,000 સ્થળોએ કાર્યક્રમો યોજાયા હતા. હવે આગામી 29 નવેમ્બર, 2026ના રોજ ‘સન્ડેઝ ઑન સાયકલ’નું ઐતિહાસિક 100મું સંસ્કરણ યોજાશે.

