વર્લ્ડ હેલ્થ ઓર્ગેનાઈઝેશન અને યુરોપિયન સેન્ટર ફોર ડિસીઝ પ્રિવેન્શન એન્ડ કંટ્રોલ (ECDC) એ જણાવ્યું હતું કે સમગ્ર યુરોપમાં કોવિડ-૧૯ ચેપની બીજી લહેર શરૂ થઈ શકે છે. યુરોપના ઘણા ભાગોમાં કોરોનાના કેસ દેખાવા લાગ્યા છે. એક સંયુક્ત નિવેદનમાં, WHOના યુરોપના ડિરેક્ટર હંસ ક્લુગે અને ECDC ડિરેક્ટર એન્ડ્રીયા એમોને કહ્યું, COVID-19 રોગચાળો હજી સમાપ્ત થયો નથી. જોકે સદભાગ્યે આપણે એક વર્ષ પહેલાં જ્યાં હતા ત્યાં નથી. તેમણે જણાવ્યું કે “દુર્ભાગ્યે અમે યુરોપમાં ફરીથી સૂચકાંકો વધતા જોઈએ છીએ. અમે સૂચવીએ છીએ કે ચેપનું બીજું મોજું શરૂ થયું છે.’ WHOના પ્રદેશ મુજબના ડેટા દર્શાવે છે કે માત્ર યુરોપમાં જ ૨ ઓક્ટોબરના રોજ પૂરા થતા સપ્તાહમાં કોવિડ-૧૯ કેસમાં વધારો નોંધાયો છે, જે અગાઉના સપ્તાહ કરતા ૮% વધારે છે.
જાહેર આરોગ્ય નિષ્ણાતોએ ચેતવણી આપી છે કે યુરોપમાં ઉપલબ્ધ રસીની સંખ્યા અંગે મૂંઝવણ છે. WHO અને ECDC એ નોંધ્યું છે કે સમગ્ર યુરોપમાં લાખો લોકોને હજુ પણ COVID-19 રસી મળી નથી. વર્લ્ડ હેલ્થ ઓર્ગેનાઈઝેશન અને યુરોપિયન સેન્ટર ફોર ડિસીઝ પ્રિવેન્શન એન્ડ કંટ્રોલે યુરોપિયન દેશોને મોસમી ઈન્ફલ્યુએન્ઝાના કેસોમાં અપેક્ષિત વધારો થાય તે પહેલાં ફ્લૂ અને COVID-19 બંને રસી મેળવવા વિનંતી કરી છે. WHO અને ECDCએ કહ્યું, ‘૬૦ વર્ષથી વધુ ઉંમરના લોકો, સગર્ભા સ્ત્રીઓ અને સહ-રોગવાળા લોકો સહિત સંવેદનશીલ જૂથોને ઈન્ફલ્યુએન્ઝા અને COVID-19 બંને સામે રસી આપવી જોઈએ.’
