અમદાવાદ:કેન્સરની સારવાર પૂર્ણ થયા બાદનું જીવન પણ એટલું જ મહત્વપૂર્ણ છે તે સંદેશ સાથે ‘ઊર્જા – કૅન્સર વેલનેસ મીટ 2026’નું આયોજન અમદાવાદની કૃષ્ણા શેલ્બી હોસ્પિટલ ખાતે કરવામાં આવ્યું હતું. શેલ્બી કેન્સર એન્ડ રિસર્ચ ઇન્સ્ટિટ્યૂટ (SCRI) અને શેલ્બી મલ્ટિસ્પેશિયાલિટી હોસ્પિટલ્સ દ્વારા આયોજિત આ કાર્યક્રમમાં 100થી વધુ કેન્સર વોરિયર્સ અને તેમના પરિવારજનો ઉપસ્થિત રહ્યા હતા.
કાર્યક્રમમાં કેન્સર સર્વાઇવર્સ, કેરગિવર્સ, ઓન્કોલોજિસ્ટ્સ તેમજ આરોગ્ય અને વેલનેસ ક્ષેત્રના નિષ્ણાતોએ ભાગ લીધો હતો. કેન્સરના નિદાન અને સારવારથી આગળ વધીને સારવાર બાદના જીવન, શારીરિક અને માનસિક સ્વાસ્થ્ય તેમજ સર્વાઇવરશિપ જેવા મહત્વપૂર્ણ વિષયો પર ચર્ચા કરવામાં આવી હતી.
કાર્યક્રમના ભાગરૂપે સ્ટેન્ડ-અપ કોમેડિયન ચિરાયુ મિસ્ત્રી દ્વારા હાસ્ય થેરાપી સત્ર યોજાયું હતું, જેણે ઉપસ્થિતોમાં હકારાત્મકતા અને ઉત્સાહનો સંચાર કર્યો હતો. ઉપરાંત, પોષણ નિષ્ણાત સોહિની શાહે ‘રિકવરી અને વેલનેસ માટેનું પોષણ’ વિષય પર માર્ગદર્શન આપતાં કેન્સરની સારવાર બાદ યોગ્ય આહાર અને સ્વસ્થ જીવનશૈલીના મહત્વ અંગે માહિતી આપી હતી.
કાર્યક્રમ દરમિયાન અનેક કેન્સર સર્વાઇવર્સે પોતાના સંઘર્ષ, જીત અને જીવનના નવા હેતુઓ વિશે અનુભવ વહેંચ્યા હતા. આ પ્રસંગે લેખિકા અને કેન્સર સર્વાઇવર મલ્લિકા મુખર્જીના પુસ્તક ‘કૅન્સર સે મેરા સામના’નું વિમોચન પણ કરવામાં આવ્યું હતું.
SCRIના ડિરેક્ટર ડૉ. વિરાજ લવિંગિયાએ જણાવ્યું હતું કે, “કેન્સરની સારવાર પૂર્ણ થયા પછી પણ દર્દીઓને સતત માર્ગદર્શન અને સહયોગની જરૂર રહે છે. ‘ઊર્જા’ દ્વારા અમે સંપૂર્ણ કેન્સર કેરના અભિગમને આગળ વધારી રહ્યા છીએ, જેમાં તબીબી સારવારની સાથે ભાવનાત્મક સહયોગ, શિક્ષણ અને સામાજિક જોડાણને પણ સમાન મહત્વ આપવામાં આવે છે.”
શેલ્બી હોસ્પિટલ્સ, અમદાવાદના મેડિકલ ઓન્કોલોજિસ્ટ ડૉ. માનસી શાહે જણાવ્યું હતું કે, “આધુનિક સારવાર પદ્ધતિઓના કારણે કેન્સર સર્વાઇવર્સની સંખ્યા સતત વધી રહી છે. જોકે, સારવાર બાદ પોષણ, માનસિક સ્વાસ્થ્ય, કેન્સર ફરી થવાનો ભય અને સમાજમાં પુનઃસમાવેશ જેવા પડકારો સામે દર્દીઓને માર્ગદર્શનની જરૂર રહે છે. ‘ઊર્જા’ આવા મુદ્દાઓ માટે એક અસરકારક સહયોગી મંચ છે.”
લેખિકા અને કેન્સર સર્વાઇવર મલ્લિકા મુખર્જીએ જણાવ્યું હતું કે, “કેન્સરે મારા જીવનમાં મોટો બદલાવ લાવ્યો, પરંતુ સાથે સાથે તેણે મને આશા, હિંમત અને જીવનને નવી દૃષ્ટિથી જોવાનું પણ શીખવ્યું. મારા પુસ્તક દ્વારા મેં મારા અનુભવો શેર કર્યા છે જેથી અન્ય દર્દીઓને પણ પ્રેરણા અને આત્મવિશ્વાસ મળી રહે.”
પોતાના નામને સાર્થક કરતાં ‘ઊર્જા 2026’નો મુખ્ય હેતુ કેન્સર સર્વાઇવર્સને સ્વાસ્થ્યની પુનઃપ્રાપ્તિ, મજબૂત મનોબળ અને જીવનના નવા હેતુ સાથે આગળ વધવા માટે પ્રેરિત કરવાનો હતો. કાર્યક્રમ દ્વારા કેન્સર પછીના જીવન સાથે જોડાયેલા મુદ્દાઓ અંગે જાગૃતિ ફેલાવવા અને ખુલ્લી ચર્ચાને પ્રોત્સાહન આપવા પર પણ ભાર મૂકવામાં આવ્યો હતો.
