પંજાબના મોહાલીના સેક્ટર-66માં આવેલી એક ખાનગી કંપનીમાં કામ કરતી 30 વર્ષની મહિલા ડિમ્પલની તેના જ સહકર્મચારી દ્વારા ચાકૂના ઘા મારીને હત્યા કરવામાં આવી હતી. ડિમ્પલ મૂળ પટિયાલાની રહેવાસી હતી અને થોડા જ દિવસોમાં તેના લગ્ન થવાના હતા. જ્યાં પરિવારમાં લગ્નની તૈયારીઓ ચાલી રહી હતી, ત્યાં અચાનક શોકનું વાતાવરણ છવાઈ ગયું. પરિવારે લગ્નની તમામ તૈયારીઓ પૂર્ણ કરી લીધી હતી, પરંતુ હવે સમગ્ર પરિવાર દુઃખમાં ડૂબી ગયો છે.
કથિત પૂર્વ પ્રેમી (એક્સ બોયફ્રેન્ડ) હરવિંદર માને ડિમ્પલના ગળા પર ઓછામાં ઓછા 34 વખત ચાકૂના ઘા ઝીંક્યા હતા, જેના કારણે તેમનું ઘટનાસ્થળે જ મોત નીપજ્યું હતું. ડિમ્પલને બચાવવા માટે સહકર્મચારીઓ દોડી આવ્યા હતા, પરંતુ આરોપીના હાથમાં ચાકૂ જોઈ તેઓ ગભરાઈ ગયા અને પાછળ હટી ગયા. ઘટનાના સમયે ઓફિસમાં શિફ્ટ બદલાઈ રહી હતી.
ડિમ્પલ છેલ્લા ત્રણ વર્ષથી આ ફ્રેટ બ્રોકરેજ કંપનીમાં કામ કરતી હતી. 34 વર્ષીય હરવિંદર માને અચાનક તેના પર હુમલો કર્યો હતો. તબીબી તપાસમાં ડિમ્પલના શરીર પર 34 ચાકૂના ઘા હોવાનું સામે આવ્યું છે. સહકર્મચારીઓ તેમને બચાવી શક્યા નહોતા અને આરોપી સતત હુમલો કરતો રહ્યો હતો.
હરવિંદરે એ જ ચાકૂ વડે પોતાના ગળા પર પણ 10થી 11 વખત ઘા માર્યા હતા. હાલ તે ગંભીર હાલતમાં હોસ્પિટલમાં સારવાર હેઠળ છે અને પોલીસ તેની ઉપર નજર રાખી રહી છે. સીસીટીવી ફૂટેજમાં સ્પષ્ટ જોવા મળ્યું હતું કે હરવિંદર ડિમ્પલની પાછળથી આવ્યો અને અચાનક હુમલો કર્યો. ડિમ્પલ બચવા માટે ભાગવાનો પ્રયાસ કરતી હતી ત્યારે તેણે તેના વાળ પકડીને ખેંચી હતી.
જ્યારે અન્ય કર્મચારીઓ મદદ માટે આગળ આવ્યા ત્યારે આરોપીએ તેમને ચાકૂ બતાવીને દૂર રાખ્યા અને હુમલો ચાલુ રાખ્યો. પોલીસના જણાવ્યા અનુસાર બંને લગભગ છ મહિના પહેલા સુધી સારા મિત્રો હતા. ત્યારબાદ તેમના રસ્તા અલગ થઈ ગયા હતા. હરવિંદર અનેક વખત ડિમ્પલ સાથે સંબંધ ફરીથી સ્થાપિત કરવાનો પ્રયાસ કરી ચૂક્યો હતો, પરંતુ ડિમ્પલે દરેક વખતે ઇનકાર કર્યો હતો. હરવિંદરનું અગાઉ પણ એક બ્રેકઅપ થયું હતું, જેના કારણે તે ડિપ્રેશનમાં હતો.
ડિમ્પલ અને હરવિંદર બંને પટિયાલાના રહેવાસી હતા અને ચંડીગઢ નજીક અલગ-અલગ પેઇંગ ગેસ્ટ હાઉસમાં રહેતા હતા. તેઓ વીકએન્ડ દરમિયાન પોતાના ઘરે જતા હતા. પોલીસે હરવિંદર માન વિરુદ્ધ હત્યાનો ગુનો નોંધ્યો છે. ડિમ્પલના પરિવારજનો અને ઘટનાના સાક્ષીઓના નિવેદનો લેવામાં આવી રહ્યા છે. આરોપીની તબિયત સુધરે ત્યારબાદ તેની સત્તાવાર ધરપકડ કરીને પૂછપરછ કરવામાં આવશે.
