અમદાવાદમાં યોજાનારી IPL 2026ની ફાઈનલ મેચે શહેરના હોટલ અને હૉસ્પિટાલિટી ઉદ્યોગમાં નવી ઉર્જા ભરી દીધી છે. વિશ્વના સૌથી મોટા ક્રિકેટ સ્ટેડિયમ એવા નરેન્દ્ર મોદી સ્ટેડિયમમાં ફાઈનલ યોજાવાની જાહેરાત બાદ અમદાવાદમાં ક્રિકેટપ્રેમીઓનો ધસારો વધવાની શક્યતા વચ્ચે હોટલો, ટ્રાવેલ કંપનીઓ અને રેસ્ટોરન્ટ વ્યવસાયમાં જોરદાર તેજી જોવા મળી રહી છે.
સામાન્ય રીતે મે મહિનાના અંતિમ દિવસો હોટલ ઉદ્યોગ માટે ઓફ-સિઝન ગણાય છે, પરંતુ IPL ફાઈનલના કારણે શહેરની લક્ઝરી અને પ્રીમિયમ હોટલોમાં બુકિંગનો માહોલ ગરમાયો છે. 30 અને 31 મે દરમિયાન શહેરની અનેક ફાઈવ સ્ટાર અને થ્રી સ્ટાર હોટલો સંપૂર્ણપણે બુક થઈ જાય તેવી સંભાવના વ્યક્ત કરવામાં આવી રહી છે.
અમદાવાદમાં અંદાજે 20 હજાર જેટલા હોટલ રૂમ ઉપલબ્ધ છે અને તેમાંના મોટાભાગના રૂમો આગામી દિવસોમાં બુક થઈ જાય તેવી ધારણા છે. ઉદ્યોગના અંદાજ મુજબ માત્ર બે દિવસ દરમિયાન હોટલ સેક્ટરને 200 કરોડ રૂપિયાથી વધુની સીધી આવક થઈ શકે છે.
IPL ફાઈનલનો લાભ માત્ર હોટલ વ્યવસાય પૂરતો મર્યાદિત રહેવાનો નથી. દેશના વિવિધ રાજ્યોમાંથી મોટી સંખ્યામાં ક્રિકેટપ્રેમીઓ અમદાવાદ પહોંચતા એરલાઈન, ટ્રાવેલ એજન્સીઓ, રેસ્ટોરન્ટ, કેબ સર્વિસ, શોપિંગ મોલ અને સ્થાનિક વેપારીઓને પણ નોંધપાત્ર ફાયદો થવાની આશા છે.
ફાઈનલ મેચને લઈને ફ્લાઈટ ભાડામાં પણ અસામાન્ય વધારો નોંધાયો છે. સામાન્ય દિવસોમાં મુંબઈથી અમદાવાદ માટે 4થી 5 હજાર રૂપિયામાં મળતી ટિકિટ હવે 40 હજાર રૂપિયા સુધી પહોંચી ગઈ છે. દિલ્હીથી અમદાવાદનું ભાડું 42 હજાર રૂપિયા સુધી નોંધાયું છે. ઉપરાંત બેંગલોર, ચેન્નઈ, કોલકાતા, જયપુર, હૈદરાબાદ અને પંજાબથી અમદાવાદ આવતી ફ્લાઈટોના ભાડામાં પણ મોટો ઉછાળો જોવા મળી રહ્યો છે.
ખાસ કરીને એસજી હાઈવે, મોટેરા, ચાંદખેડા અને ગાંધીનગર વિસ્તારની હોટલો માટે સૌથી વધુ માંગ જોવા મળી રહી છે. નરેન્દ્ર મોદી સ્ટેડિયમની નજીક આવેલા આ વિસ્તારોમાં ક્રિકેટપ્રેમીઓ ઉપરાંત કોર્પોરેટ મહેમાનો પણ રોકાણ માટે પસંદગી આપી રહ્યા છે.
રૂમ ભાડામાં પણ નોંધપાત્ર વધારો થયો છે. સામાન્ય દિવસોમાં 8થી 10 હજાર રૂપિયામાં ઉપલબ્ધ રૂમો હવે 25થી 30 હજાર રૂપિયા સુધીના ભાડે બુક થઈ રહ્યા છે. અનેક હોટલોમાં પ્રીમિયમ રૂમ અને વી.આઈ.પી. સ્યુટ માટે વેઇટિંગની સ્થિતિ પણ સર્જાઈ છે.
ગુજરાત હોટલ એન્ડ રેસ્ટોરન્ટ એસોસિએશનના પ્રમુખ નરેન્દ્ર સોમાણીના જણાવ્યા અનુસાર, IPL ફાઈનલ જેવી આંતરરાષ્ટ્રીય કક્ષાની રમતગમત ઇવેન્ટ અમદાવાદના હોટલ અને હૉસ્પિટાલિટી ઉદ્યોગ માટે સુવર્ણ તક સમાન છે. સામાન્ય રીતે ઓફ-સિઝન દરમિયાન 40થી 50 ટકા રહેતી ઓક્યુપન્સી હવે 95થી 100 ટકા સુધી પહોંચી શકે છે. તેમના જણાવ્યા પ્રમાણે, સતત બુકિંગ અને પૂછપરછના કારણે સમગ્ર ઉદ્યોગમાં ઉત્સાહનો માહોલ છે અને આ ઇવેન્ટ શહેરના સ્થાનિક અર્થતંત્રને પણ મોટો વેગ આપશે.
