શું એક રસગુલ્લાની કિંમત કોઈની જિંદગીથી વધારે હોઈ શકે? શું બાળકોથી ભૂલ નથી થતી? શું 11 વર્ષના બાળકને સાચા ખોટાની સમજ હોય? આવા ઘણા પ્રશ્નો ઉભા કરે એવી એક હચમચાવી દેતી ઘટનાથી જે ઉત્તર પ્રદેશના બસ્તી જિલ્લામાં સામે આવી છે.
અહીં એક લગ્ન પ્રસંગ દરમિયાન માત્ર રસગુલ્લા ખાવાના કારણે 11 વર્ષના માસૂમ બાળકને ધધકતા તંદૂરમાં ફેંકી દેવામાં આવ્યો. આ બાળકનું નામ ચમન છે, જે હાલ ગંભીર હાલતમાં હોસ્પિટલમાં જીવન માટે સંઘર્ષ કરી રહ્યો છે.
ઘટના બસ્તીના છાવણી પોલીસ સ્ટેશન વિસ્તારમાં આવેલા મલૌલી ગોસાઈ ગામની છે. અહીં એક લગ્ન પ્રસંગમાં કેટરિંગ કરારદાર દ્વારા માનવતાની તમામ હદો પાર કરવામાં આવી. ચમન, જે પોતાના નાનાના ઘરે રહેતો હતો, તે લગ્નમાં હાજર હતો. રમતા રમતા તે ખાવાની જગ્યાએ પહોંચ્યો અને ત્યાં રાખેલા રસગુલ્લા જોઈને એક ખાઈ લીધો.
આ નાની બાબત પર કેટરિંગ કરારદાર ગુસ્સે થઈ ગયો. કહેવામાં આવે છે કે તેણે પહેલા બાળકને ડરાવ્યો અને પછી ગુસ્સામાં તેને ઉંચકીને ધધકતા તંદૂર ઉપર બેસાડ્યો. આ દરમિયાન સંતુલન ગુમાવતા બાળક સીધો તંદૂરની અંદર પડી ગયો. પરિવારનો આરોપ છે કે તેને જાણે જોઈને તંદૂરમાં ફેંકવામાં આવ્યો હતો, જ્યારે આરોપીનું કહેવું છે કે તે માત્ર ડરાવી રહ્યો હતો અને અકસ્માતે બાળક પડી ગયો.
તંદૂરની આગમાં ચમનનું શરીર ચહેરાથી લઈને કમર સુધી ગંભીર રીતે બળી ગયું. તેની ચીસોથી સમગ્ર લગ્ન પ્રસંગમાં હાહાકાર મચી ગયો. તરત જ તેને બહાર કાઢી પહેલા અયોધ્યા મેડિકલ કોલેજમાં ખસેડવામાં આવ્યો, જ્યાંથી તેની ગંભીર સ્થિતિને ધ્યાનમાં રાખીને તેને લખનૌ રેફર કરવામાં આવ્યો છે.
ચમન મૂળ ગોંડા જિલ્લાના નવાબગંજ વિસ્તારમાંનો રહેવાસી છે અને માતાના અવસાન પછીથી તે બસ્તીમાં પોતાના મોસાળ રહેતો હતો. આ ઘટનાના બાદ આરોપી સ્થળ પરથી ફરાર થઈ ગયો છે. બાળકના મામાએ આરોપી વિરુદ્ધ પોલીસમાં ફરિયાદ નોંધાવી છે.
આ ઘટના સમાજ સામે મોટો પ્રશ્ન ઉભો કરે છે—શું આપણે એટલા અસંવેદનશીલ બની ગયા છીએ કે બાળકની નાની ભૂલને પણ માફ નથી કરી શકતા? માત્ર એક રસગુલ્લો ખાવા માટે કોઈ માસૂમને આવી ભયાનક સજા આપવી, માનવતા પર મોટો કલંક છે.