જૂનાગઢ: સામાજિક ન્યાય અધિકારીતા વિભાગ હસ્તકની ગુજરાત સ્ટેટ ચાઇલ્ડ પ્રોટેકશન સોસાયટી દ્વારા બાળકોની સલામતી-સુરક્ષા માટેની કામગીરી કરવામાં આવે છે, જેના ભાગરૂપે તાજેતરમાં સૌરાષ્ટ્રના માંગરોળ ખાતેથી મળેલી બાંગ્લાદેશની દીકરીને તેના માદરે વતન પહોંચાડીને તેના માતા-પિતા સાથે મિલન કરાવવાની પ્રશંસનીય કામગીરી કરવામાં આવી છે.
ગુજરાત સ્ટેટ ચાઇલ્ડ પ્રોટેકશન સોસાયટીની યાદીમાં જણાવ્યાનુસાર માર્ચ-૨૦૧૭માં જૂનાગઢ જિલ્લાના માંગરોળમાંથી એક સગીર દીકરી રડતી હાલતમાં પોલીસને મળી આવી હતી. પોલીસ કાર્યવાહી દરમિયાના આ દીકરીને બાંગ્લાદેશથી મુંબઇ, મુંબઇથી અમદાવાદ અને અમદાવાદથી માંગરોળ લવાઇ હોવાનું કનેકશન ખુલ્યું હતું. માંગરોળ પોલીસ દ્વારા આ દીકરીને શિશુમંગલ સંસ્થામાં સોંપાઇ હતી.
સંસ્થાકીય સંભાળ હેઠળ જિલ્લા બાળ સુરક્ષા એકમ, બાળ કલ્યાણ સમીતીએ પરામર્શ કરીને ગુજરાત સ્ટેટ ચાઇલ્ડ પ્રોટેકશન સોસાયટીનો સંપર્ક કર્યો હતો તેના માર્ગદર્શન મુજબ આ બાંગ્લાદેશી દીકરીને માદરે વતન મોકલીને તેના માતા-પિતાને મળાવવાનું શ્રેષ્ઠત્તમ કામ કર્યું છે.
