આદિવાસી વ્યવસાયોને રાષ્ટ્રીય બજાર સાથે જોડવા GeM અને TICCIની પહેલ, તાલીમ, માર્ગદર્શન અને ઓનબોર્ડિંગમાં મળશે સહાય
Ahmedabad : દેશના આદિવાસી ઉદ્યોગસાહસિકો અને વ્યવસાયોને સરકારી ખરીદીની તકો સાથે જોડવા માટે ગવર્નમેન્ટ ઈ-માર્કેટપ્લેસ (GeM) દ્વારા મહત્વપૂર્ણ પહેલ કરવામાં આવી છે. GeM એ 20 નવેમ્બર, 2026ના રોજ ટ્રાઇબલ ઇન્ડિયન ચેમ્બર ઓફ કોમર્સ એન્ડ ઇન્ડસ્ટ્રી (TICCI) સાથે સમજૂતી કરાર (MoU) પર હસ્તાક્ષર કર્યા છે. આ ભાગીદારીનો મુખ્ય ઉદ્દેશ્ય આદિવાસી ઉદ્યોગસાહસિકોને જાહેર ખરીદીની પ્રક્રિયામાં વધુ ભાગીદારી માટે પ્રોત્સાહિત કરવાનો છે.
આ MoU પર GeMના એડિશનલ CEO અજીત બી. ચવ્હાણ અને TICCIના સ્થાપક તથા અધ્યક્ષ સુધાકર ધારાવથ દ્વારા હસ્તાક્ષર કરવામાં આવ્યા હતા. આ પ્રસંગે GeMના CEO મિહિર કુમારે જણાવ્યું હતું કે, TICCI સાથેની આ ભાગીદારી આદિવાસી ઉદ્યોગસાહસિકો માટે જાહેર ખરીદીની તકો વિસ્તૃત કરવા તરફનું મહત્વપૂર્ણ પગલું છે. આ પહેલ દ્વારા તેમની જાગૃતિ વધારવા, ક્ષમતાઓ વિકસાવવા અને GeMના પારદર્શક ખરીદી માળખામાં તેમની ભાગીદારી મજબૂત બનાવવાનો પ્રયાસ કરવામાં આવશે.
સમજૂતી કરાર હેઠળ TICCI આદિવાસી ઉદ્યોગસાહસિકોની ઓળખ કરીને તેમને એકત્રિત કરશે. સાથે જ પ્રાદેશિક અને રાષ્ટ્રીય સ્તરે જાગૃતિ કાર્યક્રમોનું આયોજન, તાલીમ અને માર્ગદર્શનની વ્યવસ્થા કરવામાં આવશે. બીજી તરફ GeM દ્વારા તાલીમ સંસાધનો, પોર્ટલ પર નોંધણી માટે સહાય, ક્ષમતા નિર્માણ અને સમસ્યાઓના નિરાકરણ માટે જરૂરી સમર્થન પૂરું પાડવામાં આવશે.
આ પ્રસંગે GeMના એડિશનલ CEO અજીત બી. ચવ્હાણે જણાવ્યું હતું કે, આ ભાગીદારી કેન્દ્રિત આઉટરીચ, તાલીમ અને સતત માર્ગદર્શન દ્વારા આદિવાસી ઉદ્યોગસાહસિકોને GeMની વધુ નજીક લાવશે. જેના પરિણામે તેમને સરકારી ખરીદીની તકો સુધી પહોંચવામાં સરળતા રહેશે.
ઉલ્લેખનીય છે કે, આ સહયોગથી આદિવાસી ઉદ્યોગસાહસિકોને રાષ્ટ્રીય સ્તરે વ્યવસાય વિસ્તરણ માટે નવી તકો મળશે. સાથે જ દેશની જાહેર ખરીદી વ્યવસ્થાને વધુ સમાવેશી અને પારદર્શક બનાવવાની GeMની પ્રતિબદ્ધતાને પણ વેગ મળશે.

