મહારાષ્ટ્રના નાગપુરમાંથી એક એવી ઘટના સામે આવી છે, જેણે પવિત્ર પારિવારિક સંબંધોને શરમમાં મૂકી દીધા છે. નાગપુરના પાંચપાવલી વિસ્તારમાં 45 વર્ષીય એક વ્યક્તિ પર પોતાની જ 10 વર્ષની દીકરીનું વારંવાર બળાત્કાર અને જાતીય શોષણ કરવાનો આરોપ છે. મંગળવારે પોલીસે તેની ધરપકડ કરી હતી. કોર્ટે આરોપીને ત્રણ દિવસની પોલીસ કસ્ટડીમાં મોકલી આપ્યો છે.
પીડિત બાળકી ધોરણ 4માં અભ્યાસ કરે છે. બાળકીની માતાની સતર્કતાને કારણે આ શરમજનક ઘટનાનો ખુલાસો થયો હતો. મળતી માહિતી મુજબ, બાળકીના શરીર પર શંકાસ્પદ નિશાન જોવા મળ્યાં હતાં. આ ઉપરાંત વ્યવસાયે JCB ઓપરેટર એવા પતિના વર્તન પર પણ મહિલાને શંકા હતી. આથી તેણે ઘરની ગતિવિધિઓ પર નજર રાખવા માટે ગુપ્ત રીતે CCTV કેમેરો લગાવ્યો હતો. આ કેમેરાની મદદથી સમગ્ર ઘટનાનો પર્દાફાશ થયો હતો.
આ ગુપ્ત કેમેરો ઘરમાં ટીવીની પાછળ લગાવવામાં આવ્યો હતો. ફરિયાદી 32 વર્ષીય મહિલાએ પોલીસને જણાવ્યું કે તેને પોતાની 10 વર્ષની દીકરીના શરીર પર ઇન્ફેક્શન જોવા મળ્યું હતું. આથી તેને બાળકીના જાતીય શોષણની શંકા ગઈ હતી.
તેણે આ અંગે પોતાની કેટલીક સહેલીઓ સાથે વાતચીત કરી હતી અને ત્યારબાદ ઘરમાં CCTV કેમેરો લગાવવાનો નિર્ણય કર્યો હતો. મળતી માહિતી મુજબ, આ કેમેરો લગભગ એક વર્ષથી ઘરની ગતિવિધિઓ રેકોર્ડ કરી રહ્યો હતો. CCTVનું લાઇવ ફીડ મહિલાની એક સહેલીના મોબાઇલ ફોન પર પણ ઉપલબ્ધ હતું.
મહિલાની સહેલી CCTV ફૂટેજ પર નજર રાખતી હતી. આ દરમિયાન તેણે એક એવો વીડિયો સેવ કર્યો હતો, જેમાં આરોપી પોતાની જ દીકરીનું કથિત રીતે જાતીય શોષણ કરતો જોવા મળ્યો હતો.
બાદમાં આ ફૂટેજ બાળકીની માતાએ જોયું હતું. આ દૃશ્ય જોઈને માતા આઘાતમાં સરી પડી હતી. ત્યારબાદ તેણે પોતાની દીકરી સાથે વાત કરી હતી. ત્યારે 10 વર્ષની બાળકીએ જણાવ્યું કે તેના પિતાએ તેની ઇચ્છા વિરુદ્ધ ઘણી વખત તેની સાથે જાતીય દુર્વ્યવહાર કર્યો હતો.
બાળકીએ એમ પણ જણાવ્યું કે પિતાએ તેને ધમકી આપી હતી કે જો તે આ અંગે કોઈને કહેશે તો તેને મારી નાખશે. આ ડરના કારણે તે અત્યાર સુધી ચૂપ રહેવા મજબૂર હતી. સમગ્ર હકીકત સામે આવ્યા બાદ માતાએ તાત્કાલિક પોલીસ સ્ટેશનમાં જઈને ફરિયાદ નોંધાવી હતી.
પોલીસે આરોપી વિરુદ્ધ બળાત્કાર, ગંભીર જાતીય હુમલો, ગુનાહિત ધમકી અને પોક્સો એક્ટની સંબંધિત કલમો હેઠળ ગુનો નોંધ્યો છે. પોલીસના જણાવ્યા અનુસાર, કથિત ગુનાની શરૂઆત 26 ઓગસ્ટથી થઈ હતી અને છેલ્લી ઘટના 9 નવેમ્બરે બની હોવાનું સામે આવ્યું છે.
હવે આ કેસની તપાસમાં CCTVનું રેકોર્ડિંગ અત્યંત મહત્ત્વનો પુરાવો સાબિત થઈ શકે છે. પોલીસ સૂત્રોના જણાવ્યા અનુસાર, ફરિયાદ નોંધાયા બાદ સોમવારે જ આરોપીની ધરપકડ કરવામાં આવી હતી.
કથિત શોષણની સમગ્ર હકીકત અને ઘટનાની ગંભીરતા સમજવા માટે તપાસ અધિકારીઓ હવે CCTV ફૂટેજ સહિત અન્ય પુરાવાઓની ઝીણવટભરી તપાસ કરી રહ્યા છે.
