Ahmedabad : ભારતીય નૌકાદળની તાકાત વધારવા માટે સંરક્ષણ મંત્રાલયે મહત્વપૂર્ણ નિર્ણય લીધો છે. ભારતીય નૌકાદળના યુદ્ધજહાજ INS બેતવાની રીફિટ અને રી-પાવરિંગ માટે કોચિન શિપયાર્ડ લિમિટેડ સાથે ₹498.58 કરોડના કરાર પર હસ્તાક્ષર કરવામાં આવ્યા છે.
11 નવેમ્બર 2026ના રોજ નવી દિલ્હીમાં સંરક્ષણ સચિવ રાજેશ કુમાર સિંહની ઉપસ્થિતિમાં આ કરાર કરવામાં આવ્યો હતો.
આ કરાર હેઠળ બ્રહ્મપુત્રા ક્લાસ ફ્રિગેટ INS બેતવાની હાલની સ્ટીમ આધારિત પ્રોપલ્શન સિસ્ટમને બદલીને આધુનિક ડીઝલ એન્જિન આધારિત પ્રોપલ્શન સિસ્ટમ લગાવવામાં આવશે. આ ઉપરાંત જહાજની યુદ્ધ ક્ષમતામાં વધારો કરવા માટે આધુનિક વેપન સિસ્ટમ પણ સ્થાપિત કરવામાં આવશે.
આ આધુનિકીકરણથી INS બેતવાની ઓપરેશનલ ક્ષમતામાં વધારો થવાની સાથે તેની કાર્યક્ષમતા પણ વધુ મજબૂત બનશે. ખાસ વાત એ છે કે આ પ્રોજેક્ટ ભારતીય શિપ રિપેર અને મેન્ટેનન્સ ક્ષેત્રની સ્વદેશી ક્ષમતાઓને પણ નવી દિશા આપશે.
આ પ્રોજેક્ટમાં 50થી વધુ MSME એકમો સામેલ થવાની શક્યતા છે. જેના કારણે ભારતીય શિપબિલ્ડિંગ અને તેની સાથે સંકળાયેલા ઉદ્યોગોમાં રોજગારીની નવી તકો ઊભી થશે.
આમ, ₹498.58 કરોડનો આ પ્રોજેક્ટ કેન્દ્ર સરકારના આત્મનિર્ભર ભારત અને મેક ઇન ઇન્ડિયાના વિઝનને વધુ મજબૂત બનાવશે. સાથે જ ભારતીય નૌકાદળનાં જહાજોના આધુનિકીકરણ અને સ્વદેશી મેન્ટેનન્સ ક્ષમતાને પ્રોત્સાહન મળશે.
