Ahmedabad : ભારતમાં એલાઈડ અને હેલ્થકેર ક્ષેત્રના વ્યવસાયોને વધુ મજબૂત બનાવવા માટે કેન્દ્ર સરકારે મહત્વપૂર્ણ પહેલ કરી છે. આરોગ્ય અને પરિવાર કલ્યાણ મંત્રાલય હેઠળના નેશનલ કમિશન ફોર એલાઈડ એન્ડ હેલ્થકેર પ્રોફેશન્સ (NCAHP) દ્વારા હેલ્થકેર પ્રોફેશનલ્સની નોંધણી માટે નવું નિયમનકારી માળખું પ્રસ્તાવિત કરવામાં આવ્યું છે.
આ પ્રસ્તાવિત માળખાનો મુખ્ય હેતુ હેલ્થકેર ક્ષેત્રમાં નોંધણી પ્રક્રિયાને વધુ પારદર્શક, સરળ અને વ્યવસ્થિત બનાવવાનો છે. સાથે જ લાયકાત ધરાવતા વ્યાવસાયિકોને કૌશલ્ય વિકાસ અને નિયમિત નોંધણી માટેની તકો પૂરી પાડવામાં આવશે.
ડ્રાફ્ટ નિયમો હેઠળ લાયક હેલ્થકેર પ્રોફેશનલ્સને પ્રોવિઝનલ નોંધણી આપવામાં આવશે. ત્યારબાદ તેઓ નિર્ધારિત બ્રિજ કોર્સ, સુપરવાઇઝ્ડ ક્લિનિકલ ટ્રેનિંગ અને ક્વોલિફાઇંગ પરીક્ષાઓ પૂર્ણ કરીને નિયમિત નોંધણી મેળવી શકશે.
આ ઉપરાંત, વ્યાવસાયિકોની લાયકાત અને ક્ષમતાનું મૂલ્યાંકન કરવા માટે ચોક્કસ માપદંડો નક્કી કરવામાં આવશે. આ પહેલથી હેલ્થકેર ક્ષેત્રમાં કુશળ અને તાલીમબદ્ધ કર્મચારીઓની સંખ્યા વધવાની સાથે દર્દીઓની સુરક્ષા અને સારવારની ગુણવત્તામાં પણ સુધારો થવાની અપેક્ષા છે.
નોંધણી પ્રક્રિયાને વધુ સરળ બનાવવા માટે સંકલિત ઓનલાઇન ડિજિટલ સિસ્ટમ પણ વિકસાવવાની દરખાસ્ત છે. તેના દ્વારા ઓનલાઇન અરજી, દસ્તાવેજોની ચકાસણી, પાત્રતા મૂલ્યાંકન અને નોંધણી પ્રમાણપત્રની પ્રક્રિયા હાથ ધરવામાં આવશે. પ્રોવિઝનલ નોંધણી મેળવનારા વ્યાવસાયિકોને PR UID એટલે કે યુનિક આઇડેન્ટિફિકેશન નંબર પણ આપવામાં આવશે.
મહત્વનું છે કે, NCAHP દ્વારા આ ડ્રાફ્ટ નિયમો અંગે હેલ્થકેર પ્રોફેશનલ્સ, શૈક્ષણિક સંસ્થાઓ, વ્યાવસાયિક સંગઠનો અને સામાન્ય જનતા પાસેથી સૂચનો તથા વાંધાઓ મંગાવવામાં આવ્યા છે.
આ માટે 4 ડિસેમ્બર 2026 સુધીમાં [email protected] પર પ્રતિસાદ મોકલી શકાશે. ડ્રાફ્ટ નિયમો NCAHPની અધિકૃત વેબસાઇટ પર ઉપલબ્ધ છે.
આ પ્રસ્તાવિત નિયમોનો હેતુ ભારતમાં એલાઈડ અને હેલ્થકેર ક્ષેત્રને વધુ સંગઠિત બનાવવા, વ્યાવસાયિક કૌશલ્ય વધારવા અને આરોગ્ય સેવાઓના ધોરણોને મજબૂત કરવાનો છે.
