ફિલ્મની વાર્તા જેવી લાગતી એક અજીબોગરીબ ઘટના ઉત્તર પ્રદેશના સીતાપુરમાંથી સામે આવી છે. અહીં એક પતિએ 17 વર્ષ જૂનાં લગ્નજીવનનો અંત લાવીને પત્નીની ઇચ્છા મુજબ તેનાં લગ્ન તેના ફેસબુક પ્રેમી સાથે કરાવી દીધાં. એટલું જ નહીં, પતિએ પોતે જ પત્નીને ગાડીમાં બેસાડીને વિદાય આપી હતી.
શું છે સમગ્ર મામલો?
ઉત્તર પ્રદેશના સીતાપુર જિલ્લાના મિશ્રિખ તાલુકા વિસ્તારમાં રહેતા વિપિન ભાર્ગવનાં લગ્ન 12 માર્ચ, 2009ના રોજ થયાં હતાં. બંનેનું 17 વર્ષનું લગ્નજીવન સુખી રહ્યું હતું અને તેમને બે સંતાનો પણ છે. અહેવાલ મુજબ, તેમનો એક દીકરો 16 વર્ષનો અને બીજો 14 વર્ષનો છે.
આ દરમિયાન મહિલાની સોશિયલ મીડિયા પ્લેટફોર્મ ફેસબુક દ્વારા અંબેડકરનગરના રહેવાસી રાહુલ ઉપાધ્યાય સાથે મિત્રતા થઈ હતી. સમય જતાં આ મિત્રતા પ્રેમસંબંધમાં બદલાઈ ગઈ.
લગભગ 22 દિવસ પહેલાં મહિલા કોઈને જાણ કર્યા વિના ઘરેથી નીકળી ગઈ હતી. ત્યારબાદ પતિ વિપિન ભાર્ગવે પોલીસ સ્ટેશનમાં તેની ગુમ થયાની ફરિયાદ નોંધાવી હતી. જોકે, મહિલા પાછી આવી ત્યારે તેણે પરિવાર સાથે રહેવાની સ્પષ્ટ ના પાડી દીધી હતી. તે પોતાના પ્રેમી રાહુલ સાથે જ જીવન વિતાવવા માટે મક્કમ હતી.
મંદિરમાં એકબીજાને વરમાળા પહેરાવી, પતિએ આપી વિદાય
પરિવારજનો અને સંબંધીઓએ મહિલાને સમજાવવાનો પ્રયાસ કર્યો હતો, પરંતુ તે પોતાની વાત પર અડગ રહી હતી. આખરે પતિ વિપિન ભાર્ગવે એક મોટો અને આશ્ચર્યજનક નિર્ણય લીધો.
તાલુકા કચેરીના પરિસરમાં જરૂરી કાગળની કાર્યવાહી પૂર્ણ કર્યા બાદ, કચેરીની પાછળ આવેલા હનુમાન મંદિરની સામે મહિલા અને તેના પ્રેમી રાહુલ ઉપાધ્યાયે એકબીજાને વરમાળા પહેરાવી હતી.
લગ્નવિધિ બાદ પતિ વિપિન પોતે જ પત્નીને ગાડીમાં બેસાડીને તેના પ્રેમી સાથે વિદાય આપવા પહોંચ્યો હતો. આ સાથે તેણે બંનેના સુખી જીવનની કામના પણ કરી હતી.
આ સમગ્ર ઘટના વિસ્તારમાં ચર્ચાનો વિષય બની છે. 17 વર્ષના લગ્નજીવન અને બે સંતાનો હોવા છતાં પતિએ પત્નીની ઇચ્છાને સ્વીકારીને તેને પ્રેમી સાથે જવા દીધી હોવાની આ ઘટના લોકોને આશ્ચર્યમાં મૂકી રહી છે.
