Ahmedabad : શાહપુર પોલીસ સ્ટેશનની SHE ટીમ અને ભયમુક્ત ફાઉન્ડેશનના સંયુક્ત ઉપક્રમે ખાનપુર સ્થિત ઓલ ઇન્ડિયા ઇન્સ્ટિટ્યૂટ ઑફ લોકલ સેલ્ફ ગવર્નમેન્ટ ખાતે દીકરીઓ માટે સ્વરક્ષણ તાલીમ અને મહિલા સુરક્ષા જાગૃતિ સેમિનારનું આયોજન કરવામાં આવ્યું હતું.
કાર્યક્રમમાં આંતરરાષ્ટ્રીય વુશુ ચેમ્પિયન, સ્વરક્ષણ નિષ્ણાત અને પ્રધાનમંત્રી પુરસ્કાર વિજેતા અમનદીપ સિંહ ગોતરાએ દીકરીઓને સ્વરક્ષણની વિવિધ ટેકનિક્સ અંગે પ્રાયોગિક તાલીમ આપી હતી.
તાલીમ દરમિયાન અપહરણના પ્રયાસો સામે બચાવ, છરી જેવા ધારદાર હથિયાર અથવા લાકડી વડે થતા હુમલાની પરિસ્થિતિમાં સ્વબચાવના ઉપાયો, છેડતી અને અયોગ્ય સ્પર્શ સામે પ્રતિકાર કરવાની રીતો તેમજ જોખમી પરિસ્થિતિમાંથી સુરક્ષિત રીતે બહાર નીકળવા અંગે માર્ગદર્શન આપવામાં આવ્યું હતું.
આ ઉપરાંત, ગુડ ટચ અને બેડ ટચ વચ્ચેનો તફાવત, 181 મહિલા હેલ્પલાઇન, POCSO કાયદો, સાયબર ક્રાઇમ અને જાહેર સ્થળો તથા જાહેર પરિવહનમાં સુરક્ષિત રહેવા માટે જરૂરી સાવચેતીઓ અંગે પણ જાગૃતિ ફેલાવવામાં આવી હતી.
કાર્યક્રમનો મુખ્ય ઉદ્દેશ દીકરીઓમાં આત્મવિશ્વાસ વધારવો, તેમને સ્વરક્ષણ માટે સક્ષમ બનાવવી અને મહિલા સુરક્ષા અંગે જાગૃતિ કેળવવાનો હતો. આવા કાર્યક્રમો દીકરીઓને મુશ્કેલ પરિસ્થિતિઓનો સામનો કરવા માટે માનસિક રીતે તૈયાર કરવામાં તેમજ સુરક્ષિત સમાજના નિર્માણમાં મહત્વપૂર્ણ ભૂમિકા ભજવે છે.
