વાવ-થરાદ: પિતા પોતાના સંતાનો માટે સુરક્ષા અને હૂંફનું પ્રતીક ગણાય છે, પરંતુ વાવ-થરાદ જિલ્લાના સુઈગામમાં એક હૃદયદ્રાવક ઘટના સામે આવી છે. અહીં એક પિતા પર પોતાના જ અઢી વર્ષના પુત્રને પેટ્રોલ છાંટીને સળગાવી દેવાનો ગંભીર આરોપ લાગ્યો છે. બાળકનું મોત થયા બાદ ઘટનાનું સત્ય છુપાવવા માટે તેની લાશ ગામના સ્મશાનમાં દાટી દેવામાં આવી હોવાનો પણ ખુલાસો થયો છે. આ મામલે મૃતક બાળકના કાકાએ ફરિયાદ નોંધાવતા પોલીસે આરોપી પિતાની ધરપકડ કરી છે.
પેટ્રોલ છાંટીને પુત્રને સળગાવ્યાનો આરોપ
પ્રાપ્ત વિગતો અનુસાર, સુઈગામના રાવળવાસમાં રહેતા અશોક જીતાભાઈ રાવળે 13 ઓક્ટોબરના રોજ બપોરે આશરે 1થી 2 વાગ્યાની વચ્ચે પોતાના અઢી વર્ષના પુત્ર નવઘણ પર પેટ્રોલ છાંટીને તેને સળગાવી દીધો હોવાનો આરોપ છે. ત્યારબાદ બાળકને સારવાર માટે હોસ્પિટલ લઈ જવામાં આવ્યો હતો, જ્યાં તેનું મોત થયું હતું.
બાળકના મોત બાદ ઘટનાનું સાચું કારણ છુપાવવા માટે આરોપીએ તેના મૃતદેહને સમાજના સ્મશાનમાં દાટી દીધો હોવાની વિગતો સામે આવી છે. આ અંગે જાણ થતાં બાળકના કાકા બાબુભાઈ રાવળે પોતાના ભત્રીજા અશોક રાવળ વિરુદ્ધ પોલીસ ફરિયાદ નોંધાવી હતી.
સ્મશાનમાંથી મૃતદેહ બહાર કાઢી પોસ્ટમોર્ટમ માટે મોકલ્યો
ફરિયાદના આધારે પોલીસે ગામના સ્મશાનમાં પહોંચી દફનાવવામાં આવેલા બાળકના મૃતદેહને બહાર કાઢ્યો હતો. ત્યારબાદ મૃતદેહને પોસ્ટમોર્ટમ માટે મોકલી આપવામાં આવ્યો હતો.
પોલીસે આરોપી અશોક રાવળ વિરુદ્ધ ભારતીય ન્યાય સંહિતા (BNS)ની કલમ 103(1) હેઠળ હત્યા અને કલમ 238 હેઠળ પુરાવાનો નાશ કરવા બદલ ગુનો નોંધ્યો છે. પોલીસે આરોપીની ધરપકડ કરી છે. પોલીસના જણાવ્યા અનુસાર, ધરપકડ બાદ આરોપીએ પોતાના પુત્રની હત્યા કર્યાની કબૂલાત કરી છે.
પત્ની રિસામણે રહેતી હોવાથી બાળકની સંભાળ રાખવામાં મુશ્કેલી પડતી હોવાનો દાવો
પ્રાથમિક વિગતો મુજબ, અશોક રાવળનાં લગ્ન હિંમતનગર ખાતે થયાં હતાં. જોકે, તેની પત્ની છેલ્લા ઘણા સમયથી રિસામણે રહેતી હતી. પરિણામે અઢી વર્ષના પુત્ર નવઘણની સારસંભાળ અને ઉછેરની જવાબદારી નિભાવવામાં મુશ્કેલી પડતી હોવાની વાત સામે આવી છે.
આરોપીએ બાળકની દેખભાળ રાખવા માટે કોઈ ન હોવાની વાત કહી તેને બોજરૂપ માન્યો હોવાની કબૂલાત કરી હોવાનું જાણવા મળ્યું છે. જોકે, ઘટનાની સંપૂર્ણ હકીકત અને અન્ય વિગતો અંગે પોલીસ તપાસ બાદ વધુ સ્પષ્ટતા થઈ શકશે.
માસૂમ બાળકના મોતથી અરેરાટી
આ ઘટનાએ સમગ્ર વિસ્તારમાં અરેરાટી ફેલાવી છે. જે ઉંમરે બાળકને માતા-પિતાના પ્રેમ અને સુરક્ષાની સૌથી વધુ જરૂર હોય છે, તે જ ઉંમરે પિતા પર પોતાના પુત્રનો જીવ લેવાનો આરોપ લાગ્યો છે.
હાલમાં પોલીસે આરોપીની ધરપકડ કરીને કાયદેસરની કાર્યવાહી હાથ ધરી છે. બાળકના મોત પાછળની સમગ્ર હકીકત જાણવા માટે તપાસ ચાલી રહી છે.
