રક્ષામંત્રી રાજનાથ સિંહે વિશાખાપટ્ટનમમાં પૂર્વી નૌકાદળ કમાન્ડ દ્વારા આયોજિત ‘બારાખાના’ કાર્યક્રમમાં ભારતીય નૌકાદળની વધતી ક્ષમતા અને દેશની સમુદ્રી સુરક્ષામાં તેની મહત્વપૂર્ણ ભૂમિકાની પ્રશંસા કરી હતી. તેમણે નૌકાદળના જવાનો તેમજ તેમના પરિવારજનો સાથે સંવાદ કરીને તેમની સેવા, સાહસ અને યોગદાનને બિરદાવ્યું હતું.
રાજનાથ સિંહે કહ્યું કે ભારતીય નૌકાદળ આજે એક શક્તિશાળી સમુદ્રી શક્તિ તરીકે ઉભરી રહ્યું છે. હિંદ-પ્રશાંત ક્ષેત્રમાં નૌકાદળની ક્ષમતાને આંતરરાષ્ટ્રીય સ્તરે માન્યતા મળી રહી છે. તેમણે ભારપૂર્વક જણાવ્યું કે નૌકાદળ દેશના સમુદ્રી હિતો અને સરહદોની સુરક્ષા માટે દરેક પરિસ્થિતિમાં તૈયાર છે.
રક્ષામંત્રીએ 1971ના યુદ્ધ દરમિયાન ભારતીય નૌકાદળના ઐતિહાસિક ‘ઓપરેશન ટ્રાઇડન્ટ’ને પણ યાદ કર્યું હતું. તેમણે કહ્યું કે આ ઓપરેશને નૌકાદળની રક્ષણાત્મક તેમજ જરૂરિયાત સમયે આક્રમક કાર્યવાહી કરવાની ક્ષમતા દર્શાવી હતી.
તેમણે ભારતની વધતી સ્વદેશી સંરક્ષણ ક્ષમતાનો ઉલ્લેખ કરતાં જણાવ્યું કે દેશમાં આધુનિક વિમાનવાહક જહાજો, પરમાણુ સબમરીન, સ્ટીલ્થ ફ્રિગેટ્સ અને સ્કોર્પિન શ્રેણીની સબમરીન સહિત વિવિધ પ્લેટફોર્મનું નિર્માણ થઈ રહ્યું છે. નૌકાદળની તાકાત માત્ર આધુનિક યુદ્ધજહાજો અને ટેક્નોલોજી પૂરતી મર્યાદિત નથી, પરંતુ જવાનોની કુશળતા, દેશભક્તિ, સાહસ અને પ્રતિબદ્ધતા પણ તેની મુખ્ય શક્તિ છે.
રાજનાથ સિંહે ભારતની સમુદ્રી ક્ષમતાનો ઉપયોગ આર્થિક વિકાસ અને રાષ્ટ્રીય સમૃદ્ધિ માટે કરવાની જરૂરિયાત પર પણ ભાર મૂક્યો હતો. સાથે જ તેમણે નૌકાદળના પરિવારજનોના યોગદાનને રાષ્ટ્રીય સેવા સાથે જોડાયેલું મહત્વપૂર્ણ યોગદાન ગણાવ્યું હતું.
