નવી દિલ્હી : દેશમાં ટ્રાફિકના નવા નિયમો પહેલી સપ્ટેમ્બરથી અમલી કરવામાં આવ્યા બાદ તેના ઘેરા પ્રત્યાઘાત પડી રહ્યા છે. આજે દેશના જુદા જુદા ભાગોમાં લોકોની ટ્રાફિક નિયમોને લઇને પોલીસ સાથે બોલાચાલી થઇ હતી. પોલીસ સાથે કેટલીક જગ્યાએ તો ઝપાઝપી થઇ હતી. ગુજરાત, રાજસ્થાન, હરિયાણા, પંજાબ અને મધ્યપ્રદેશમાં લોકોમાં નારાજગી જોવા મળી રહી છે. દેશના મોટા બાગના રાજ્યોમાં ટ્રાફિકના કઠોર નિયમો અમલી કરવામા આવ્યા બાદ લોકો નારાજ છે.
તેમાં સુધારા કરવાની માંગ પણ ઉઠી રહી છે. સરકારને આમાં સુધારા કરવા પડે તેવા સંકેત દેખાઇ રહ્યા છે.મોટર વ્હીકલ એક્ટ(એમેન્ડમેન્ટ)-૨૦૧૯ના નવા નિયમો અને જોગવાઇઓનો ૧લી સપ્ટેમ્બરથી અમદાવાદ શહેર સહિત સમગ્ર ગુજરાત રાજય અને દેશભરમાં એકસાથે અમલ શરૂ થઇ ગયા બાદ આજે નિયમો અમલી બન્યાના બીજા દિવસે લોકોમાં નારાજગી જોવા મળી હતી. મોટર વ્હીકલ એકટના અમેન્ડમેન્ટમાં નવા નિયમો અને જોગવાઇઓ વધુ આકરા બનાવવામાં આવ્યા છે. ખાસ કરીને દંડનીય જોગવાઇ વધુ પડતી અને એકદમ આકરી હોઇ વાહનચાલકોમાં પહેલા જ દિવસથી ફફડાટની લાગણી ફેલાઇ ગઇ છે. બીજીબાજુ, ટ્રાફિક પોલીસ અને આરટીઓ તંત્ર દ્વારા નવા નિયમો અને જોગવાઇ મુજબ, દંડનીય વસૂલાત સહિતની અમલવારી શરૂ કરી દીધી છે. જેને લઇને પણ વાહનચાલકોમાં એક રીતે ભારે નારાજગીની લાગણી જોવા મળતી હતી.
કારણ કે, હવે હેલ્મેટ નહી પહેરવા બદલ રૂ.એક હજાર, સીટ બેલ્ટ નહી પહેરવા બદલ રૂ.એક હજાર અને લાઇસન્સ વિના ડ્રાઇવીંગ કરવા બદલ રૂ.પાંચ હજાર સુધીના આકરા દંડની જાગવાઇઓ લાગુ થઇ ગઇ છે. તો, હવે દારૂ પીને ગાડી ચલાવવા પર ૧૦ હજારનો દંડ થશે અને વાહનનો વીમો ન હોવા પર રૂ.૨,૦૦૦ રૂપિયા પેનલ્ટી લાગશે. નવા નિયમો અને જોગવાઇઓની ટ્રાફિક પોલીસ અને આરટીઓ તંત્ર દ્વારા પહેલા દિવસથી જ અમલવારી શરૂ કરી દીધી હતી. જો કે, આજે રવિવાર હોવાથી તંત્રની ઝુંબેશ થોડી હળવી રહી હતી પરંતુ નવીજોગવાઇઓની અમલવારી કડકાઇથી શરૂ કરવામાં આવે તેવી પૂરી શકયતા છે.
બીજીબાજુ, અમદાવાદ મોટર ડ્રાઇવીંગ સ્કૂલ ઓનર્સ એસોસીએશનના મહામંત્રી રમેશભાઇ ગીડવાણીએ જણાવ્યું હતું કે, મોટર વ્હીકલ એકટની નવી જોગવાઇઓ અને નિયમો વધુ પડતા આકરા અને અસહનીય છે. સામાન્ય કે ગરીબ માણસોને આટલી પેનલ્ટી કે દંડ પોષાય તેમ નથી. નિયમ કે જોગવાઇ હોય તે સારૂં છે પરંતુ તે વ્યવહારિક અને નાગરિકોને પોષાય તેવા દર હોવા જોઇએ. આટલી આકરી જાગવાઇઓના કારણે આમજનતા ખાસ કરીને સામાન્ય વાહનચાલકો-લોકોમાં એક પ્રકારે ડર અને ફફડાટની લાગણી જોવા મળી રહી છે. ટ્રાફિક નિયમોના મામલે કેટલીક જગ્યાઐએ મારામારાના બનાવો બન્યા છે.
