ઓવલ : વર્લ્ડ કપની રોમાંચક મેચમાં ભારતે ગઇકાલે મોડી રાત્રે વર્તમાન વર્લ્ડ ચેમ્પિયન ઓસ્ટ્રેલિયા પર ૩૬ રને જીત મેળવી હતી. આની સાથે જ ભારતે તેની સતત બીજી જીત મેળવી હતી. હવે ભારત તેની આગામી મેચ ન્યુઝીલેન્ડ સામે રમાનાર છે. ભારતના તમામ ખેલાડી ફોર્મમાં ચાલી રહ્યા છે. જેથી ચાહકો ખુશ છે ભારત હવે વર્લ્ડ કપના તાજ માટે સૌથી પ્રબળ દાવેદાર દેખાય છે.આ મેચના લીધે સુપર સન્ડેની મજા લોકોએ માણી હતી. એકબાજુ રવિવાર હોવાથી મોટાભાગે રજાનો માહોલ હતો. બીજી બાજુ મેચ હોવાના કારણે પણ રોમાંચ વધી ગયો હતો જેથી રવિવારનો દિવસ સુપર સન્ડે બની ગયો હતો.
બપોરના ગાળાથી જ અમદાવાદ સહિતના રાજ્યભરમાં ક્રિકેટ ચાહકો સમયસર ટીવી ઉપર ગોઠવાઈ ગયા હતા અને મેચની રોમાંચકતા માણી હતી. ભારતીય ચાહકો મુજબ જ ભારતીય બેટ્સમેનોએ છગ્ગા ચોગ્ગાની રમઝટ બોલાવી હતી અને જંગી જુમલો ખડકી દીધો હતો. આ મેચમાં ભારત તરફથી તમામ બેટ્સમેનો આક્રમક બેટિંગ કરીને સ્કોરને ૩૫૦થી પણ ઉપર લઇ ગયા હતા. શિખર ધવને શાનદાર સદી ફટકારી હતી જ્યારે વિરાટ કોહલીએ ૮૨ રન કરીને આઉટ થયો હતો. પૂર્વ કેપ્ટન મહેન્દ્રસિંહ ધોનીએ અતિ ઝડપથી બેટિંગ કરીને ૧૪ બોલમાં ૨૭ રન ફટકાર્યા હતા જેમાં એક છગ્ગાનો પણ સમાવેશ થાય છે. રોહિત શર્મા પણ અડધી સદીને આઉટ થયો હતો.
