આસામના કાઝીરંગા સહિત માર્ગ અકસ્માતમાં મૃત્યુ પામેલા લોકોને મોરારિબાપુની શ્રદ્ધાંજલિ, પરિવારોને આર્થિક સહાય અર્પણ

Kamlesh
1 Min Read

Asham : કાઝીરંગા ખાતે થયેલા ગમખ્વાર માર્ગ અકસ્માત સહિત ગુજરાતમાં માર્ગ દુર્ઘટનામાં જીવ ગુમાવનાર લોકોને પૂજ્ય મોરારિબાપુએ ભાવભીની શ્રદ્ધાંજલિ પાઠવી છે. સાથે જ મૃતકોના પરિવારજનોને હનુમંત સંવેદના રૂપે આર્થિક સહાય અર્પણ કરી છે.

પ્રાપ્ત માહિતી અનુસાર, આસામના કાઝીરંગા ખાતે પેસેન્જરોથી ભરેલું પ્રવાસી વાહન કન્ટેનર ટ્રક સાથે ધડાકાભેર અથડાતાં સર્જાયેલા ભયાનક અકસ્માતમાં 26 લોકોનાં કરુણ મોત નિપજ્યાં હતાં. મૃતકોમાં 14 બહેનો અને 12 યુવાનોનો સમાવેશ થાય છે.

આ દુઃખદ ઘટનાને પગલે પૂજ્ય મોરારિબાપુએ મૃતકોને શ્રદ્ધાંજલિ અર્પણ કરી તેમના પરિવારજનો પ્રત્યે સંવેદના વ્યક્ત કરી હતી. આ ઉપરાંત મૃતકોના પરિવારજનોને વ્યક્તિદીઠ રૂ. 15 હજાર લેખે કુલ રૂ. 3.90 લાખની હનુમંત સંવેદના રાશિ અર્પણ કરવાનો નિર્ણય લીધો છે. આ સહાયની રકમ રામકથાના મુંબઈ સ્થિત શ્રોતા દ્વારા મુખ્યમંત્રી રાહત ફંડમાં જમા કરાવવામાં આવશે.

બીજી તરફ, જૂનાગઢ જિલ્લાના વિસાવદર તાલુકાના કુબા રાવણી ગામના બે આશાસ્પદ યુવાનોના માર્ગ અકસ્માતમાં થયેલા નિધનથી પણ શોકની લાગણી ફેલાઈ છે. આ બંને યુવાનોના પરિવારજનોને પણ પૂજ્ય મોરારિબાપુ દ્વારા રૂ. 30 હજારની સહાય અર્પણ કરવામાં આવી છે.

પૂજ્ય મોરારિબાપુએ તમામ દિવંગત આત્માઓના નિર્વાણ માટે હનુમાનજીના ચરણોમાં પ્રાર્થના કરી હતી અને શોકસંતપ્ત પરિવારજનોને હૃદયપૂર્વક સાંત્વના પાઠવી હતી.

Share This Article