બાળકોની શૈક્ષણિક સિદ્ધિઓને પ્રોત્સાહન આપવા અને તેમનાં સપનાંને સાકાર કરવાની દિશામાં પહેલ; દેશભરમાં 2 લાખથી વધુ વિદ્યાર્થીઓને શિષ્યવૃત્તિનો લાભ
Ahmedabad : બાળકોની શૈક્ષણિક સિદ્ધિઓને બિરદાવવા અને તેમને ઉજ્જવળ ભવિષ્ય માટે પ્રોત્સાહિત કરવાના ઉદ્દેશ્ય સાથે શ્રીરામ સેવા સંકલ્પની ‘નવગતિ’ પહેલ હેઠળ અમદાવાદમાં વિશેષ કાર્યક્રમનું આયોજન કરવામાં આવ્યું હતું. આ કાર્યક્રમમાં 1,000થી વધુ બાળકો અને તેમના પરિવારો જોડાયાં હતાં. આ પહેલનો મુખ્ય ઉદ્દેશ્ય યુવા પ્રતિભાઓને ઓળખ આપવી, શિક્ષણ પ્રત્યે પ્રોત્સાહિત કરવાં અને બાળકોને આત્મવિશ્વાસ સાથે પોતાનાં સપનાં સાકાર કરવા માટે પ્રેરણા આપવાનો છે.
આ પ્રસંગે દસક્રોઈના ધારાસભ્ય બાબુભાઈ જમનાદાસ પટેલ અને શ્રીરામ ફાઇનાન્સના સીઓઓ તથા જેએમડી સુદર્શન હોલા બાલન્દ ઉપસ્થિત રહ્યા હતા. તેમણે યુવાનોની આકાંક્ષાઓને પ્રોત્સાહન આપવા, શિક્ષણ માટે વધુ તકો ઊભી કરવા અને બાળકોના ભવિષ્યને ઉજ્જવળ બનાવવા માટે સામૂહિક પ્રયાસોના મહત્ત્વ પર ભાર મૂક્યો હતો.
દેશભરમાં 2 લાખથી વધુ વિદ્યાર્થીઓને શિષ્યવૃત્તિ
‘નવગતિ’ પહેલ બાળકોની શૈક્ષણિક સિદ્ધિઓની ઉજવણી કરવા ઉપરાંત તેમને આગળ વધવા માટે પ્રોત્સાહિત કરતું મંચ પૂરું પાડે છે. આ પહેલ દ્વારા શિક્ષણમાં પ્રગતિ, બાળકોનો આત્મવિશ્વાસ અને સમુદાયના સહયોગને મહત્ત્વ આપવામાં આવે છે.
આયોજકોના જણાવ્યા અનુસાર, એક દાયકાથી વધુ સમયથી કાર્યરત આ પહેલ હેઠળ દેશભરમાં 2 લાખથી વધુ વિદ્યાર્થીઓને શિષ્યવૃત્તિ આપવામાં આવી છે. અમદાવાદમાં યોજાયેલી આ આવૃત્તિમાં વિદ્યાર્થીઓ અને વાલીઓની ભાગીદારીએ શિક્ષણ તથા બાળકોના સર્વાંગી વિકાસ પ્રત્યેની સામૂહિક પ્રતિબદ્ધતાને ઉજાગર કરી હતી.
બાળકોનાં સપનાંને સાકાર કરવાની દિશામાં પ્રયાસ
શ્રીરામ સેવા સંકલ્પની ‘નવગતિ’ પહેલનો ઉદ્દેશ્ય બાળકોને મોટાં સપનાં જોવા, પોતાની ક્ષમતાઓ ઓળખવા અને શૈક્ષણિક તથા વ્યક્તિગત વિકાસ માટે સતત આગળ વધવા પ્રેરિત કરવાનો છે. આ પહેલ દ્વારા પરિવારો અને સમુદાયોને પણ બાળકોના શિક્ષણ અને ભવિષ્યના ઘડતરમાં સક્રિય ભાગીદાર બનવા પ્રોત્સાહિત કરવામાં આવે છે.
આવી પહેલો દ્વારા શ્રીરામ સેવા સંકલ્પ સામાજિક જોડાણને મજબૂત બનાવવા અને શિક્ષણના માધ્યમથી યુવા પેઢી માટે વધુ સારી તકો ઊભી કરવાના પ્રયાસો આગળ ધપાવી રહ્યું છે. ‘નવગતિ’નો આ કાર્યક્રમ બાળકોની પ્રતિભાને પ્રોત્સાહન આપવા અને સંભાવનાઓથી ભરપૂર ભવિષ્યના નિર્માણ તરફનો એક પ્રયાસ બન્યો હતો.
