તલગાજરડા: નેપાળમાં તિબેટ તરફ ગ્લેશિયર તૂટવાના કારણે આવેલા વિનાશક પૂરમાં સેંકડો લોકોનાં કરુણ મોત થયા છે. આ હૃદયદ્રાવક કુદરતી આપત્તિથી પૂજ્ય મોરારી બાપુ પણ વ્યથિત થયા છે. તેમણે નેપાળની જળહોનારતમાં જીવ ગુમાવનાર તમામ લોકોને ભાવભીની શ્રદ્ધાંજલિ અર્પણ કરી તેમના પરિવારજનો પ્રત્યે સંવેદના વ્યક્ત કરી છે.
મોરારી બાપુએ નેપાળના અસરગ્રસ્ત લોકો માટે હનુમંત પ્રસાદ રૂપે કુલ રૂ. 51 લાખની સહાય રાશિ અર્પણ કરી છે. આમાંથી રૂ. 11 લાખ ચિત્રકૂટ ધામ, તલગાજરડા દ્વારા ભારતીય PM ફંડમાં જમા કરાવવામાં આવશે, જ્યારે રૂ. 40 લાખ નેપાળના વડાપ્રધાન રાહત ફંડમાં જમા કરવામાં આવશે.
નેપાળના વડાપ્રધાન રાહત ફંડમાં જમા થનારી રૂ. 40 લાખની રકમની વિત્તીય સેવા મુંબઈ સ્થિત રામકથાના એક શ્રોતા દ્વારા કરવામાં આવશે. નેપાળમાં સર્જાયેલી આ વિનાશક ઘટનાના દૃશ્યો સોશિયલ મીડિયા પર સામે આવ્યા બાદ સમગ્ર વિશ્વમાં લોકોમાં દુઃખની લાગણી જોવા મળી રહી છે. પૂરમાં અનેક લોકોનાં મોત થયા છે, જ્યારે મોટા પાયે જાનમાલનું નુકસાન થયું છે. આપત્તિનું નુકસાન દિવસેને દિવસે વધી રહ્યું છે.
પૂજ્ય મોરારી બાપુએ આ દુર્ઘટનામાં ભારત સહિત વિશ્વના અનેક દેશોના જે નાગરિકોએ પોતાના પ્રાણ ગુમાવ્યા છે, તેમના માટે હનુમાનજીનાં ચરણોમાં પ્રાર્થના કરી છે. તેમણે તમામ દિવંગતોના નિર્વાણ માટે પ્રાર્થના સાથે તેમના પરિવારજનોને આ દુઃખ સહન કરવાની શક્તિ મળે તેવી ભાવના વ્યક્ત કરી છે.
મોરારી બાપુની આ સહાય દ્વારા નેપાળની આ કપરા સમયમાં અસરગ્રસ્ત લોકો સુધી મદદ પહોંચાડવાનો પ્રયાસ કરવામાં આવ્યો છે. સાથે જ તેમણે માનવતાના ધર્મને સર્વોપરી રાખીને દુઃખની આ ઘડીમાં નેપાળના લોકો સાથે ઊભા રહેવાની ભાવના વ્યક્ત કરી છે.
