નવી દિલ્હી: આજના સમયમાં શહેર હોય કે હાઇવે, મોટરસાઇકલ પરિવહનનું સૌથી લોકપ્રિય સાધન બની ગઈ છે. વધતી પેટ્રોલની કિંમતો અને પર્યાવરણ પ્રત્યેની ચિંતાઓ વચ્ચે બાઇકની સારું માઇલેજ માત્ર તમારા ખર્ચમાં બચત જ નથી કરતું, પરંતુ એન્જિનની કામગીરી પણ લાંબા સમય સુધી જાળવી રાખે છે. સામાન્ય રીતે 40થી 60 કિલોમીટર પ્રતિ લિટર માઇલેજ આપતી બાઇકને યોગ્ય રીતે ચલાવવાથી 10થી 20 ટકા સુધી વધુ માઇલેજ મેળવી શકાય છે.
બાઇકની માઇલેજ વધારવા માટે નિયમિત મેન્ટેનન્સ, યોગ્ય રાઇડિંગ સ્ટાઇલ અને કેટલીક સરળ આદતો અપનાવવી જરૂરી છે. તેનાથી માત્ર ઇંધણની બચત જ નહીં, પરંતુ એન્જિનનું આયુષ્ય પણ વધે છે. ચાલો જાણીએ એવી 5 અસરકારક ટિપ્સ વિશે.
ટાયરમાં યોગ્ય હવાનું પ્રસેર રાખવું
ટાયરમાં યોગ્ય પ્રેશર ન હોય તો બાઇકના માઇલેજ પર સીધી અસર પડે છે. ઓછા પ્રેશરવાળા ટાયરના કારણે એન્જિનને વધુ મહેનત કરવી પડે છે અને પેટ્રોલ વધુ વપરાય છે. દર અઠવાડિયે ટાયરનું પ્રેશર ચેક કરો અને કંપની દ્વારા સૂચવેલા PSI મુજબ જ રાખો. યોગ્ય પ્રેશરથી માઇલેજમાં 5થી 8 ટકા સુધીનો વધારો થઈ શકે છે અને ટાયરની આયુષ્ય પણ વધે છે.
નિયમિત સર્વિસિંગ અને એર ફિલ્ટર સાફ રાખો
ગંદુ એર ફિલ્ટર એન્જિનમાં હવાનો પ્રવાહ ઘટાડે છે, જેના કારણે વધુ ઇંધણ વપરાય છે. દર 2,000થી 3,000 કિલોમીટર પછી બાઇકનું સર્વિસિંગ કરાવો, સ્પાર્ક પ્લગ ચેક કરાવો અને ચેઇનની યોગ્ય સફાઈ તથા લુબ્રિકેશન કરો. તેનાથી એન્જિન સ્મૂથ ચાલે છે અને માઇલેજમાં સુધારો થાય છે.
સ્મૂથ રીતે બાઇક ચલાવો
અચાનક એક્સેલરેટર આપવું અથવા જોરથી બ્રેક મારવાથી ઇંધણનો બગાડ થાય છે. ધીમે-ધીમે ગિયર બદલો, 50થી 60 કિમી પ્રતિ કલાકની ઇકો સ્પીડમાં બાઇક ચલાવો અને અનાવશ્યક હાઇ સ્પીડથી દૂર રહો. ટ્રાફિકમાં પણ ક્લચનો યોગ્ય ઉપયોગ કરો. આવી સ્મૂથ રાઇડિંગથી 10 ટકા સુધી વધુ માઇલેજ મળી શકે છે.
બાઇક પર અનાવશ્યક વજન ન રાખો
બાઇક પર વધારાનો સામાન, ભારે ટોપ બોક્સ અથવા બિનજરૂરી એક્સેસરીઝ એન્જિન પર વધારાનો ભાર મૂકે છે, જેના કારણે માઇલેજ ઘટે છે. માત્ર જરૂરી સામાન જ રાખો. હળવી બાઇક ઓછા ઇંધણમાં વધુ અંતર કાપી શકે છે.
સારી ગુણવત્તાનું પેટ્રોલ અને યોગ્ય ગિયરનો ઉપયોગ કરો
હંમેશા વિશ્વસનીય પેટ્રોલ પંપ પરથી જ પેટ્રોલ ભરાવો. ઉપરાંત, બાઇકને યોગ્ય ગિયરમાં ચલાવો. ખૂબ નીચા અથવા ખૂબ ઊંચા ગિયરમાં બાઇક ચલાવવાથી એન્જિન પર ભાર પડે છે. એન્જિનને 2,000થી 4,000 RPM વચ્ચે રાખવાથી શ્રેષ્ઠ માઇલેજ મળે છે. આ સરળ ટિપ્સ અપનાવવાથી તમે માત્ર પેટ્રોલના ખર્ચમાં બચત જ નહીં કરો, પરંતુ તમારી મોટરસાઇકલનું એન્જિન પણ લાંબા સમય સુધી સારી સ્થિતિમાં રાખી શકશો.
