Pakistan Solar Kids Medical Mystery: દુનિયાભરમાં ઘણી એવી વિચિત્ર ઘટનાઓ સામે આવે છે, જેના પર વિશ્વાસ કરવો મુશ્કેલ બની જાય છે. આવી જ એક ઘટના પાકિસ્તાનના બે ભાઈઓની છે, જેમને ‘સોલર કિડ્સ’ તરીકે ઓળખવામાં આવે છે. દાવો કરવામાં આવે છે કે દિવસ દરમિયાન બંને બાળકો સામાન્ય બાળકોની જેમ હસે-રમે છે, દોડે છે અને સંપૂર્ણપણે સક્રિય રહે છે. પરંતુ સૂર્યાસ્ત થતાં જ તેમનું શરીર લગભગ નિષ્ક્રિય થઈ જાય છે. તેઓ ન તો હલનચલન કરી શકે છે, ન બોલી શકે છે અને ન તો આંખો ખોલી કે બંધ કરી શકે છે. આ વિચિત્ર કેસે પાકિસ્તાનના ડૉક્ટરોને પણ આશ્ચર્યમાં મૂકી દીધા છે.
સૂર્યાસ્ત થતાં જ બદલાઈ જાય છે સ્થિતિ
મીડિયા અહેવાલો અનુસાર, સાંજ પડતાં જ બંને ભાઈઓની શારીરિક સ્થિતિ સંપૂર્ણપણે બદલાઈ જાય છે. તેમનું શરીર જાણે કામ કરવાનું બંધ કરી દે છે. તેઓ કોઈપણ પ્રકારની હિલચાલ કરી શકતા નથી અને બોલવાની ક્ષમતા પણ ગુમાવી દે છે.
View this post on Instagram
ડૉક્ટરો શું કહે છે?
ડૉક્ટરોનું માનવું છે કે આ કોઈ દુર્લભ જિનેટિક ન્યુરોલોજિકલ ડિસઓર્ડરનું પરિણામ હોઈ શકે છે. આવી બીમારીઓ શરીરની નર્વસ સિસ્ટમને અસર કરે છે, જેના કારણે શરીરની કાર્યક્ષમતા પર અસર પડે છે. જોકે, આ અનોખી સ્થિતિનું ચોક્કસ કારણ હજુ સુધી શોધી શકાયું નથી.
PIMSના નિષ્ણાતોએ કરી તપાસ
પાકિસ્તાન ઇન્સ્ટિટ્યૂટ ઓફ મેડિકલ સાયન્સિસ (PIMS)ના મેડિસિન વિભાગના પ્રોફેસર જાવેદ અકરમે અગાઉ ‘ધ એસોસિયેટેડ પ્રેસ’ને જણાવ્યું હતું કે આ કેસ તેમના માટે એક મોટો પડકાર છે. તેમણે કહ્યું હતું કે ડૉક્ટરોએ બંને બાળકોના અનેક મેડિકલ ટેસ્ટ કર્યા છે, જેથી જાણી શકાય કે દિવસ દરમિયાન સંપૂર્ણપણે સક્રિય રહેતા બાળકો સૂર્યાસ્ત બાદ શા માટે બોલી શકતા નથી, આંખો ખોલી શકતા નથી અને ખોરાક પણ લઈ શકતા નથી. સરકાર દ્વારા બંને બાળકોને નિઃશુલ્ક સારવાર પણ આપવામાં આવી રહી હોવાનું તેમણે જણાવ્યું હતું.
વિદેશમાં પણ મોકલાયા સેમ્પલ
ડૉક્ટરો દ્વારા બંને ભાઈઓના અનેક પ્રકારના મેડિકલ ટેસ્ટ કરવામાં આવ્યા છે. તેમના લોહીના નમૂનાઓ વધુ તપાસ માટે વિદેશના નિષ્ણાતોને મોકલવામાં આવ્યા છે. આ ઉપરાંત સંશોધકોએ તેમના ગામની માટી અને હવાના નમૂનાઓ પણ એકત્ર કર્યા છે, જેથી કોઈ પર્યાવરણીય કારણ જવાબદાર છે કે નહીં તેની તપાસ થઈ શકે.
બંને બાળકોના પિતા મોહમ્મદ હાશિમ પાકિસ્તાનના બલૂચિસ્તાન પ્રાંતના ક્વેટા નજીકના ગામના રહેવાસી છે. તેઓ અને તેમની પત્ની એકબીજાના સગા (કઝિન) હોવાનું જણાવવામાં આવે છે. તેમના કુલ છ સંતાનોમાંથી બેનું નાની ઉંમરમાં જ અવસાન થઈ ગયું હતું, જ્યારે અન્ય બે બાળકોમાં આ પ્રકારના કોઈ લક્ષણો જોવા મળ્યા નથી.
બાળકોના પિતાનું માનવું છે કે તેમના પુત્રોને સૂર્યપ્રકાશમાંથી ઊર્જા મળે છે, પરંતુ ડૉક્ટરોએ આ દાવાને નકારી કાઢ્યો છે. ડૉક્ટરોનું કહેવું છે કે બંને બાળકો દિવસ દરમિયાન અંધારા રૂમમાં રાખવામાં આવે અથવા બહાર વરસાદ કે તોફાન હોય, ત્યારે પણ સામાન્ય રીતે ચાલી-ફરી શકે છે. એટલે તેમની સ્થિતિનો સીધો સંબંધ સૂર્યપ્રકાશ સાથે હોવાના પૂરતા વૈજ્ઞાનિક પુરાવા નથી.
નોંધ: આ માહિતી સોશિયલ મીડિયા અને વિવિધ મીડિયા અહેવાલોના આધારે રજૂ કરવામાં આવી છે. આ દાવાની સ્વતંત્ર વૈજ્ઞાનિક પુષ્ટિ ઉપલબ્ધ નથી અને આ સ્થિતિનું ચોક્કસ કારણ હજુ સુધી નિશ્ચિત થયું નથી.
