ગાંધીનગર: AVC મેન્સ વોલીબોલ કપ 2026માં પ્રથમ વખત બ્રોન્ઝ મેડલ જીતીને ઇતિહાસ રચનારી ભારતીય પુરુષ વોલીબોલ ટીમનું કેન્દ્રીય યુવા બાબતો અને રમતગમત મંત્રી ડૉ. મનસુખ માંડવિયાએ ગાંધીનગરમાં ભવ્ય સન્માન કર્યું હતું. ખેલાડીઓ, કોચિંગ સ્ટાફ અને સહાયક સ્ટાફને અભિનંદન પાઠવતાં તેમણે જણાવ્યું કે આ મેડલ માત્ર એક સિદ્ધિ નથી, પરંતુ ભારતીય વોલીબોલ માટે નવા યુગની શરૂઆત છે.
ડૉ. માંડવિયાએ કહ્યું કે, “આ ઐતિહાસિક સફળતા સાથે વધુ મોટી જવાબદારી અને અપેક્ષાઓ પણ જોડાયેલી છે. કેન્દ્ર સરકારની દરેક રમતગમત નીતિ, રોકાણ અને પહેલનો હેતુ ખેલાડીઓને તેમની સંપૂર્ણ ક્ષમતા સુધી પહોંચાડવાનો અને આંતરરાષ્ટ્રીય મંચ પર સતત સફળતા અપાવવાનો છે.”
તેમણે જણાવ્યું કે પોતાના દેશમાં યોજાયેલી AVC મેન્સ વોલીબોલ કપમાં ભારતે પ્રથમ વખત પોડિયમ પર સ્થાન મેળવી દેશના રમતગમત વિકાસ અને આંતરરાષ્ટ્રીય કક્ષાની ટૂર્નામેન્ટનું સફળ આયોજન કરવાની ક્ષમતા સાબિત કરી છે.
ઐતિહાસિક સિદ્ધિ, પ્રથમ વખત મળ્યો મેડલ
આ વર્ષે પ્રથમ વખત ભારતે AVC મેન્સ વોલીબોલ કપની યજમાની કરી હતી. કેપ્ટન જેરોમ વિનીત ચાર્લ્સના નેતૃત્વમાં અને સર્બિયાના મુખ્ય કોચ ડૉ. ડ્રેગન મિહાઈલોવિચના માર્ગદર્શન હેઠળ ભારતીય ટીમે સમગ્ર ટૂર્નામેન્ટમાં શાનદાર પ્રદર્શન કર્યું હતું. પૂલ સ્ટેજમાં ટીમ અજેય રહી હતી અને બ્રોન્ઝ મેડલ માટેના મુકાબલામાં બહેરીનને 3-1થી હરાવી ભારતના ઇતિહાસનો પ્રથમ AVC મેન્સ વોલીબોલ કપ મેડલ જીત્યો હતો.
રમતગમત ઇકોસિસ્ટમને વધુ મજબૂત બનાવવાનો સંકલ્પ
ડૉ. માંડવિયાએ જણાવ્યું કે મોદી સરકાર લાંબા ગાળાના આયોજન, પ્રતિભાની ઓળખ, સ્પોર્ટ્સ સાયન્સ, એકેડેમી વિકાસ, રમતવીરોના કલ્યાણ અને આંતરરાષ્ટ્રીય એક્સપોઝર પર ભાર મૂકી મજબૂત રમતગમત ઇકોસિસ્ટમ ઉભું કરી રહી છે. તેમણે ઉમેર્યું કે ભારતનું લક્ષ્ય વિવિધ રમતોમાં સતત ઉત્કૃષ્ટતા હાંસલ કરીને વિશ્વના અગ્રણી રમતગમત દેશોમાં સ્થાન મેળવવાનું છે.
દેશના લોકોને સમર્પિત કર્યો મેડલ
ભારતીય ટીમના કેપ્ટન જેરોમ વિનીત ચાર્લ્સે સરકારના સતત સહયોગ બદલ આભાર વ્યક્ત કરતાં કહ્યું કે વિશ્વકક્ષાની સુવિધાઓ, તાલીમ અને રિકવરીની વ્યવસ્થાઓના કારણે ટીમને શ્રેષ્ઠ પ્રદર્શન કરવામાં મદદ મળી છે.
તેમણે કહ્યું કે, “આ ઐતિહાસિક મેડલ માત્ર ખેલાડીઓનો નથી, પરંતુ સમગ્ર દેશના લોકોનો છે. ટૂર્નામેન્ટ દરમિયાન સ્ટેડિયમમાં હાજર રહી અમારો ઉત્સાહ વધારનારા દરેક ચાહકને અમે આ મેડલ સમર્પિત કરીએ છીએ.”
કોચે સરકારના વિઝનની કરી પ્રશંસા
મુખ્ય કોચ ડૉ. ડ્રેગન મિહાઈલોવિચે ભારત સરકારના લાંબા ગાળાના રમતગમત વિઝનની પ્રશંસા કરતાં જણાવ્યું કે રમતગમત માટે કરવામાં આવી રહેલું આયોજન, રોકાણ અને ખેલાડીઓને મળતી આધુનિક સુવિધાઓ ભારતને ભવિષ્યમાં નિયમિત રીતે આંતરરાષ્ટ્રીય સ્પર્ધાઓમાં પોડિયમ સુધી પહોંચાડશે.
વર્લ્ડ રેન્કિંગમાં 18 સ્થાનની છલાંગ
બ્રોન્ઝ મેડલ જીત્યા બાદ ભારતને મહત્વપૂર્ણ FIVB વર્લ્ડ રેન્કિંગ પોઈન્ટ્સ મળ્યા છે. તેના પરિણામે ભારતીય પુરુષ વોલીબોલ ટીમે 18 સ્થાનની જંગી છલાંગ લગાવી છે અને વર્લ્ડ નં. 60 પરથી સીધી વર્લ્ડ નં. 42 પર પહોંચી છે. આ સિદ્ધિથી વૈશ્વિક વોલીબોલમાં ભારતની સ્થિતિ વધુ મજબૂત બની છે.
