અમદાવાદ: દિલ્હી પબ્લિક સ્કૂલ – બોપલની વિદ્યાર્થીની ઋશાનવી જોશીએ એથ્લેટિક્સ ક્ષેત્રે શાનદાર સફળતા મેળવી છે. ગોધરાની શ્રી ગોવિંદ ગુરુ યુનિવર્સિટી ખાતે યોજાયેલી ‘ગુજરાત સ્ટેટ જુનિયર એથ્લેટિક્સ મીટ’ માં ઋશાનવીએ પોતાની પ્રતિભા અને ઝડપનો પરચો આપ્યો હતો. ઋશાનવીએ 100 મીટર અને 200 મીટર દોડમાં પ્રથમ સ્થાન મેળવીને રાજ્ય કક્ષાની આ સ્પર્ધામાં બે ગોલ્ડ મેડલ પોતાના નામે કર્યા છે. તેની જબરદસ્ત સ્પીડ, સતત મહેનત અને મજબૂત મનોબળે તેને આ સિદ્ધિ અપાવવામાં મહત્વની ભૂમિકા ભજવી છે.
આ શાનદાર પ્રદર્શનના આધારે હવે ઋશાનવીને પંજાબના લુધિયાણામાં યોજાનારી નેશનલ યુથ એથ્લેટિક્સ ચેમ્પિયનશિપમાં ગુજરાતનું પ્રતિનિધિત્વ કરવાની તક મળી છે. રાષ્ટ્રીય સ્તરે મળનારો આ અનુભવ તેની રમતગમતની કારકિર્દીમાં મહત્વપૂર્ણ પડાવ સાબિત થશે અને તેને વધુ શીખવાની તથા પોતાની પ્રતિભાને આગળ વધારવાની તક આપશે. ઋશાનવીની આ સફળતા તેની નિયમિત મહેનત, શિસ્ત અને રમત પ્રત્યેના સમર્પણનું પરિણામ છે. તેની સિદ્ધિ DPS – Bopal તેમજ સમગ્ર સ્કૂલ પરિવાર માટે ગૌરવની બાબત બની છે. આ સિદ્ધિ બદલ સ્કૂલ પરિવાર દ્વારા ઋશાનવીને અભિનંદન પાઠવવામાં આવ્યા છે અને આગામી રાષ્ટ્રીય સ્પર્ધામાં તે વધુ ઉત્કૃષ્ટ પ્રદર્શન કરી ગુજરાતનું નામ રોશન કરે તેવી શુભેચ્છાઓ પાઠવવામાં આવી છે.
