બેંગલુરુ: હેલ્મેટ વગર બાઈક ચલાવવું કેટલું જોખમી બની શકે છે તેનો જીવંત દાખલો બેંગલુરુમાં સામે આવ્યો છે. અહીં હેલ્મેટ વિના બાઈક ચલાવી રહેલા એક વ્યક્તિના માથા પર અચાનક સૂકા ઝાડની ડાળી તૂટી પડી હતી. ગંભીર ઈજાના કારણે તે રસ્તા પર જ બેભાન થઈ ગયો અને બાદમાં કોમામાં ચાલ્યો ગયો. આ સમગ્ર ઘટના નજીકમાં લાગેલા CCTV કેમેરામાં કેદ થઈ ગઈ છે.
માહિતી અનુસાર, આ ઘટના બેંગલુરુના રાજાજીનગર વિસ્તારમાં આવેલા રામ મંદિર રોડ પર બની હતી. 52 વર્ષીય સતીશ નામના વ્યક્તિ બાઈક પર કામ પર જઈ રહ્યા હતા. તે દરમિયાન રસ્તા કિનારે આવેલા સૂકા ઝાડની મોટી ડાળી અચાનક તૂટી તેમના માથા પર પડી.
ડાળી વાગતા જ સતીશે બાઈક પરથી નિયંત્રણ ગુમાવ્યું અને રસ્તા પર પટકાયા હતા. ઘટનાને જોઈ આસપાસના લોકો તરત જ તેમની મદદ માટે દોડી આવ્યા, પરંતુ તે સમયે તેઓ બેભાન હાલતમાં હતા. ત્યારબાદ તેમને તાત્કાલિક નજીકની હોસ્પિટલમાં ખસેડવામાં આવ્યા.
Wearing #Helmet [#RoadSafety ] reduces the Risk of Traumatic Brain injury
A 52-yr old man Satish was seriously injured, reportedly slipped into coma, after a dry tree branch fell on his head while he was riding a bike near Ram Mandir Road in Rajajinagar, #Bengaluru , caught in… pic.twitter.com/9iNawC2Wrj
— Surya Reddy (@jsuryareddy) June 26, 2026
બાદમાં વધુ સારવાર માટે તેમને યશવંતપુર સ્થિત મણિપાલ હોસ્પિટલમાં દાખલ કરવામાં આવ્યા, જ્યાં ડૉક્ટરોએ તેમની ઇમરજન્સી સર્જરી કરી હતી. તબીબોના જણાવ્યા મુજબ, માથામાં ગંભીર ઈજા થતાં તેઓ શરૂઆતમાં કોમામાં ચાલ્યા ગયા હતા. જોકે હાલમાં તેમની તબિયતમાં સુધારો થઈ રહ્યો છે અને તેઓ સ્વસ્થ થઈ રહ્યા છે.
આ ઘટના ફરી એકવાર સાબિત કરે છે કે બાઈક ચલાવતી વખતે હેલ્મેટ પહેરવું કેટલું જરૂરી છે. જો સતીશે હેલ્મેટ પહેર્યું હોત તો કદાચ તેમના માથાને ગંભીર ઈજા ન પહોંચી હોત અને તેઓ આટલી ગંભીર સ્થિતિમાં ન પહોંચ્યા હોત.
