અમદાવાદ: ગુજરાતના દક્ષિણ ગુજરાત અને સૌરાષ્ટ્રના કેટલાક વિસ્તારોમાં મેઘરાજાની એન્ટ્રી થતાં ખેડૂતોમાં ખુશીનો માહોલ જોવા મળી રહ્યો છે. જોકે, રાજ્યના ઉત્તર અને મધ્ય ગુજરાત સહિતના અનેક વિસ્તારોમાં હજુ પણ વરસાદે રાહ જોવડાવી છે. વરસાદના અભાવે અનેક જિલ્લાઓમાં ખેતીલાયક જમીન સૂકી પડી છે અને ખેડૂતો વાવણીની રાહ જોઈ રહ્યા છે.
ભારતીય હવામાન વિભાગ (IMD)ના જણાવ્યા અનુસાર રાજ્યમાં 1 જુલાઈ સુધી હવામાનમાં કોઈ મોટો ફેરફાર થવાની શક્યતા નથી, પરંતુ દક્ષિણ ગુજરાત અને સૌરાષ્ટ્રના કેટલાક જિલ્લાઓમાં હળવાથી મધ્યમ વરસાદ ચાલુ રહેવાની સંભાવના વ્યક્ત કરવામાં આવી છે.
આજે ક્યાં પડશે વરસાદ?
હવામાન વિભાગની આગાહી મુજબ 26 જૂનના રોજ પંચમહાલ અને દાહોદ જિલ્લામાં છૂટાછવાયા સ્થળોએ વરસાદ પડી શકે છે. જ્યારે દક્ષિણ ગુજરાતના વડોદરા, છોટાઉદેપુર, નર્મદા, ભરૂચ, સુરત, ડાંગ, તાપી, નવસારી અને વલસાડ જિલ્લામાં તેમજ દમણ અને દાદરા-નગર હવેલીમાં અનેક સ્થળોએ વરસાદની શક્યતા છે. સૌરાષ્ટ્રમાં અમરેલી, ભાવનગર અને ગીર સોમનાથ જિલ્લામાં તેમજ દીવમાં ગાજવીજ સાથે હળવાથી મધ્યમ વરસાદ પડી શકે છે. બીજી તરફ ઉત્તર ગુજરાતના તમામ જિલ્લાઓ તેમજ સૌરાષ્ટ્ર-કચ્છના બાકીના વિસ્તારોમાં હવામાન મુખ્યત્વે શુષ્ક રહેવાની સંભાવના છે.
27 જૂનની આગાહી
27 જૂનના રોજ પણ દક્ષિણ ગુજરાતના નર્મદા, સુરત, ડાંગ, તાપી, નવસારી અને વલસાડ જિલ્લામાં તેમજ દમણ અને દાદરા-નગર હવેલીમાં છૂટાછવાયા સ્થળોએ ગાજવીજ સાથે વરસાદની આગાહી કરવામાં આવી છે. આ ઉપરાંત સૌરાષ્ટ્રના અમરેલી, ભાવનગર, ગીર સોમનાથ અને દીવમાં પણ વરસાદી ઝાપટાં પડી શકે છે. જ્યારે ઉત્તર ગુજરાત અને સૌરાષ્ટ્ર-કચ્છના અન્ય વિસ્તારોમાં હવામાન સૂકું રહેવાની શક્યતા છે.
ખેડૂતોની નજર હવે ચોમાસા પર
રાજ્યના અનેક જિલ્લાઓમાં વરસાદના અભાવે વાવણીનું કામ અટવાયું છે. ખેડૂતો હવે આગામી દિવસોમાં સારા વરસાદની આશા રાખી રહ્યા છે, જેથી ખેતીની કામગીરી ઝડપથી શરૂ થઈ શકે. હવામાન વિભાગની આગાહી મુજબ આગામી થોડા દિવસો દરમિયાન દક્ષિણ ગુજરાત અને સૌરાષ્ટ્રના કેટલાક ભાગોમાં વરસાદી માહોલ યથાવત રહેવાની શક્યતા છે.
