આઈપીએલ જેવી ધમાકેદાર ટી20 લીગ 31 મેના રોજ પૂર્ણ થઈ હતી, જેમાં આરસીબીએ ઐતિહાસિક ખિતાબ જીત્યો હતો. બે મહિના સુધી ચાલેલા આ ટૂર્નામેન્ટમાં અનેક રેકોર્ડ્સ બન્યા, પરંતુ આઈપીએલ પૂર્ણ થયા પછી મહિલા ટી20 આંતરરાષ્ટ્રીય ક્રિકેટમાં એવો અનોખો રેકોર્ડ નોંધાયો કે તેને અજાયબી કહેવાય તો પણ ખોટું નહીં ગણાય. આ રેકોર્ડ પુરુષ નહીં પરંતુ મહિલા ટી20 આંતરરાષ્ટ્રીય મેચમાં બન્યો છે. માત્ર 5 બોલમાં ટાર્ગેટ ચેઝ કરીને મેચ પૂરી થઈ ગઈ. સામાન્ય રીતે એક ટી20 મેચ લગભગ 3 થી 4 કલાક ચાલે છે, પરંતુ આ મેચ એક કલાકથી પણ ઓછા સમયમાં પૂરી થઈ ગઈ.
એશિયન ક્રિકેટ કાઉન્સિલ (ACC) મહિલા પ્રીમિયર કપમાં યુએઈ મહિલા ટીમે ઈતિહાસ રચ્યો. સાઉદી અરેબિયા મહિલા ટીમ સામે યુએઈએ માત્ર 5 બોલમાં લક્ષ્ય હાંસલ કરીને 10 વિકેટે જીત મેળવી. આ સાથે ટી20 આંતરરાષ્ટ્રીય ક્રિકેટમાં સૌથી ઝડપી ટાર્ગેટ ચેઝ કરનાર ટીમોની યાદીમાં યુએઈએ ચોથું સ્થાન મેળવ્યું. ટાર્ગેટ એટલો નાનો હતો કે બંને ઓપનરોએ મળીને માત્ર 5 બોલમાં મેચ જીતાડી દીધી.
આ મેચમાં સાઉદી અરેબિયાની મહિલા ટીમ માત્ર 27 રનમાં ઓલઆઉટ થઈ ગઈ. પ્રથમ બેટિંગ કરતી વખતે ટીમની સ્થિતિ એટલી નબળી રહી કે એક પણ બેટર બે આંકડાનો સ્કોર કરી શકી નહીં. ટીમની પાંચ ખેલાડીઓ ખાતું પણ ખોલી શકી નહોતી.
યુએઈ તરફથી ત્રણ બોલરોએ શાનદાર પ્રદર્શન કર્યું. સુરક્ષા કોટ્ટે, હીના અને ઈશાએ 3-3 વિકેટ ઝડપી હતી. તેમના ઘાતક બોલિંગના કારણે સાઉદી અરેબિયાની આખી ટીમ માત્ર 27 રનમાં સમેટાઈ ગઈ.
સાઉદી અરેબિયાની ટીમે શરૂઆતમાં 6 ઓવરમાં માત્ર 3 વિકેટ ગુમાવી હતી અને 10 ઓવરના અંતે 4 વિકેટે 20 રન બનાવ્યા હતા. જોકે ત્યારબાદ યુએઈના બોલરોએ દબાણ વધાર્યું અને સાઉદી ટીમ તાશના પત્તાંની જેમ ધરાશાયી થઈ ગઈ. 28 રનના લક્ષ્યાંકનો પીછો કરવા ઉતરેલી યુએઈ ટીમે માત્ર 5 બોલમાં જ જીત મેળવી અને આખી મેચ એક કલાકથી પણ ઓછા સમયમાં પૂર્ણ થઈ ગઈ.
