વલસાડ : શ્રી રામકૃષ્ણ વિવેકાનંદ સેવા સમિતિ ટ્રસ્ટ ધરમપુરના ઉપક્રમે આગામી ૧૨મી જાન્યુઆરી, ૨૦૧૮ના રોજ વિશ્વાચાર્ય સ્વામી વિવેકાનંદજીની ૧૫૬ મી જન્મજયંતિના ઉપલક્ષ્યમાં યુવા રેલી તથા યુવાસંમેલનનું આયોજન ઇન્ટરનેશનલ ટેબલ ટેનીસ સ્ટાર નેના જૈસવાલ તથા ગુગલબોય અગત્સ્ય જૈસવાલની વિશેષ ઉપસ્થિતિમાં કરવામાં આવ્યું છે.
તા.૧૨/૧/૧૮ના રોજ સવારે ૭.૪૫ કલાકે સમડીચોક સ્થિત સ્વામી વિવેકાનંદજીની પ્રતિમા ખાતે આયોજીત યુવારેલીમાં ધરમપુર વિસ્તારની શાળાના બાળકો, કોલેજના મિત્રો, શિક્ષકો, વિવિધ મંડળના પ્રતિનિધિઓ સહિત નગરજનો જોડાશે. વિવેકાનંદજીની પ્રતિમાને પુષ્પાંજલિ કર્યા બાદ યુવારેલી નગરના પ્રભુફળિયા, મોટાબજાર, ટાવરરોડ, ગાંધીબાગ, દશોંદી ફળિયા, ડો. હેડગેવારચોક, ગાર્ડન રોડ, એસ.ટી.ડેપો રોડ, જેલ રોડ, થઇ ફરી લક્ષ્મી નારાયણ મંદિર પરિસરમાં પાછી ફરશે. સમગ્ર યુવારેલી દરમિયાન વિવિધ શાળાના નાના-નાના ભૂલકાઓ મહાન પાત્રોના વેશભુષામાં સજ્જ થશે. યુવા રેલી દરમિયાન વિવેકાનંદજી તેમજ ભારતમાતાનો જયઘોષ કરતા-કરતા સમગ્ર વાતાવરણને વિવેકાનંદમય બનાવશે. આ યુવારેલી લક્ષ્મી નારાયણ મંદિરમાં આયોજિત યુવાસંમેલનમાં ફેરવાશે જયાં ઈન્ટરનેશનલ ટેબલ ટેનિસ સ્ટાર નેના જૈસવાલ તથા ગુગલબોય અગત્સ્ય જૈસવાલ સંબોધન કરશે.
