નવીદિલ્હી : ૧૭મી લોકસભાની ચૂંટણીના ભાગરૂપે આજે સવારે ૧૨ રાજ્યો અને કેન્દ્ર શાષિત પ્રદેશ પોન્ડીચેરીને આવરી લેતી ૯૫ સીટ પર મતદાનની શાંતિપૂર્ણ રીતે શરૂઆત થઇ હતી. પ્રથમ તબક્કામાં ૧૧મી એપ્રિલના દિવસે ૯૧ સીટ પર મતદાન થયા બાદ આજે બીજા તબક્કામાં વધુ ૯૫ સીટ પર મતદાન થઇ રહ્યુ છે. સવારમાં મતદાનની પ્રક્રિયા શરૂ થયા બાદ શરૂમાં જ મોટી સંખ્યામાં મતદારો મતદાન કરવા માટે બહાર નિકળ્યા હતા. હેમામાલિની, ફારૂખ અબ્દુલ્લા સહિત કુલ ૧૬૩૫ ઉમેદવારોન ભાવિ આજના મતદાનની સાથે જ સીલ થઇ ગયા હતા. કોઇ પણ પ્રકારની અંધાધુંધી ન થાય અને શાંતિપૂર્ણ મતદાન થાય તે માટે તમામ વ્યવસ્થા ચૂંટણી પંચ દ્વારા કરવામાં આવી છે. જમ્મુ કાશ્મીરમાં કેન્દ્રિય સુરક્ષા દળની ૮૦ કંપનીઓ તૈનાત કરવામા આવી છે.
તમિળનાડુની મદુરાઇ સીટ પર રાત્રે આઠ વાગ્યા સુધી મતદાન થનાર છે. તમામ સીટો પર સવારે સાતચ વાગ્યા મતદાનની પ્રક્રિયા શરૂ થયા બાદ હવે સાંજે પાંચ વાગ્યા સુધી મતદાન ચાલનાર છે. જ્યારે છત્તિસગઢમાં નક્સલવાદીગ્રસ્ત કેટલીક સીટ પર સવારે સાત વાગે મતદાન શરૂ થયા બાદ ત્રણ વાગ્યા સુધી મતદાન ચાલનાર છે. ઓરિસ્સાની કેટલીક સીટ પર ચાર વાગ્યા સુધી મતદાન થનાર છે. બીજા તબક્કામાં પણ શાંતિપૂર્ણ રીતે મતદાનને પાર પાડવા માટે ચૂંટણી પંચ દ્વારા તમામ તૈયારી ગઇકાલે બુધવારના દિવસે જ કરી લેવામાં આવી હતી. ચૂંટણી સાથે સંબંધિત તમામ સામગ્રી મતદાન મથકો પર ગઇકાલે જ પહોંચી ગઇ હતી. સુરક્ષા પણ પહેલાથી જ ગોઠવી દેવામાં આવી હતી. મતદાન શરૂ થયા બાદ મતદારોમાં પણ અભૂતપૂર્વ ઉત્સાહ દેખાઇ રહ્યો છે.આજે બીજા તબક્કામાં જે રાજ્યોમાં મતદાન થઇ રહ્યુ છે તે પૈકી તમિળનાડુમાં સૌથી વધારે ૩૮ સીટો પર મતદાન જારી છે.
કર્ણાટકમાં ૧૪, મહારાષ્ટ્રમાં ૧૦, ઉત્તરપ્રદેશમાં આઠ, આસામ, બિહાર અને ઓરિસ્સામાં પાંચ પાંચ સીટો પર મતદાન થઇ રહ્યુ છે. આવી જ રીતે છત્તિસગઢ અને બંગાળમાં ત્રણ ત્રણ સીટ પર મતદાન જારી છે. જમ્મુ કાશ્મીરમાં બે, મણિપુર, ત્રિપુરા અને પોન્ડીચેરીમાં એક એક સીટ પર મતદાન જારી છે. બીજા તબક્કાની ચૂંટણી માટે પ્રચારનો મંગળવારના દિવસે અંત આવ્યો હતો. બીજા તબક્કા માટે ચૂંટણી પહેલા પ્રચારમાં ભાજપ તરફથી વડાપ્રધાન નરેન્દ્ર મોદી, અમિત શાહ, રાજનાથ સિંહ, તેમજ કેન્દ્રિય પ્રધાનોએ જવાબદારી સંભાળી હતી. કોંગ્રેસ તરફથી રાહુલ ગાંધીએ તમામ તાકાત લગાવી દીધી હતી. બીજા તબક્કાની ચૂંટણી માટે આજે મતદાનની શરૂઆત થયા બાદ અનેક મોટા માથાના ભાવિ ઇવીએમમાં સીલ થઇ ગયા હતા. જે દિગ્ગજના ભાવિ ઇવીએમમાં સીલ થઇ ગયા છે તેમાં કેન્દ્રિય પ્રધાન જુઆલ ઓરમ, સદાનંદ ગૌડા, રાધાકૃષ્ણન, પૂર્વ વડાપ્રધાન એચડી દેવગૌડા, કોંગ્રેસના નેતા વિરપ્પા મોઇલી, રાજ બબ્બર, નેશનલ કોન્ફરન્સના પ્રમુખ ફારૂખ અબ્દુલ્લા, ભાજપના હેમા માલિની, ડીએમકેના દયાનિધી મારન, કાનીમોઝી અને એ રાજાનો સમાવેશ થાય છે. ઓરિસ્સામાં લોકસભાની પાંચ સીટોની સાથે ૩૫ વિધાનસભા સીટ માટે પણ મતદાન થઇ રહ્યુ છે. અત્રે ઉલ્લેખનીય છે કે લોકસભા ચૂંટણી માટેના કાર્યક્રમની ચૂંટણી પંચે ૧૦મી માર્ચના દિવસે જાહેરાત કરી દીધી હતી.
આની સાથે લોકસભા ચૂંટણી માટેનું રણશિંગુ ફુંકાઈ ગયું હતુ. ચૂંટણી પંચે લોકસભાની કુલ ૫૪૩ સીટો ઉપર સાત તબક્કામાં ચૂંટણી માટેના કાર્યક્રમની જાહેરાત કરી હતી જે સાત તબક્કામાં મતદાન યોજાનાર છે તે પૈકી પ્રથમ તબક્કામાં ૧૧મી એપ્રિલના દિવસે મતદાન થઇ ચુક્યુ છે. આજે બીજા તબક્કામાં મતદાન થઇ રહ્યુ છે. હવે ત્રીજા તબક્કામાં ૨૩મી, ચોથા તબક્કામાં ૨૯મી એપ્રિલના દિવસે મતદાન યોજાશે જ્યારે પાંચમાં તબક્કામાં છઠ્ઠી મે, છઠ્ઠા તબક્કામાં ૧૨મી મે અને ૧૯મી મેના દિવસે સાતમાં તબક્કામાં મતદાન થશે.તમામ તબક્કાની મતગણતરી એક સાથે ૨૩મી મેના દિવસે યોજાશે. આનો મતલબ એ થયો કે, ૧૭મીલોકસભામાં સત્તાની ચાવી કોની પાસે આવશે તે અંગેનો ફેંસલો ૨૩મી મેના દિવસે થશે. પ્રથમ તબક્કામાં ૨૦ રાજ્યોમાં ૯૧ સીટો ઉપર મતદાન થયુ હતુ. બીજા તબક્કામાં ૧૨ રાજ્યોની ૯૫ સીટ પર મતદાન થઇ રહ્યુ છે. ચોથા તબક્કામાં નવ રાજ્યોમાં સાત સીટો ઉપર મતદાન થનાર છે. પાંચમાં તબક્કામાં સાત રાજ્યોની ૫૧ સીટો ઉપર મતદાન યોજાનાર છે.
છઠ્ઠા તબક્કામાં સાત રાજ્યોની ૫૯ સીટો ઉપર મતદાન થશે જ્યારે સાતમા અને અંતિમ તબક્કા માટે આઠ રાજ્યોની ૫૯ સીટ ઉપર મતદાન થશે. આ વખતે તમામ મતદાન મથકો ઉપર વીવીપેટની વ્યવસ્થા કરવામાં આવી હતી. આનાથી વોટરો એ બાબતને જાણી શકે છે કે તેમના મત યોગ્ય ઉમેદવારને પડ્યા છે કે કેમ. આ વખતે ઇવીએમની અનેક સ્તર પર સુરક્ષાની ખાતરી કરવામાં આવી છે.તમામ મતદાન કેન્દ્રો ઉપર આ વખતે સીસીટીવી કેમેરા પહેલાથી જ ગોઠવી દેવામાં આવ્યા છે. જેના મારફતે મતદાન પર નજર રાખવામાં આવી રહી છે. ચૂંટણી પ્રક્રિયાની વિડિયોગ્રાફી કરવામાં આવી રહી છે. સામાન્ય ચૂંટણીમાં આ વખતે કુલ ૯૦ કરોડ મતદારો પોતાના મતાધિકારનો ઉપયોગ કરી રહ્યા છે. રસપ્રદ બાબત એ છે કે, આ પ્રથમ એવી ચૂંટણી છે જ્યારે ૨૧મી સદીમાં જન્મેલા લોકો મતાધિકારનો ઉપયોગ કરી રહ્યા છે. ૨૦૧૪માં ચૂંટણી દરમિયાન આ સદીમાં જન્મેલા લોકોની વય ૧૮ વર્ષની ન હતી. લોકસભાની ચૂંટણીને લઇને મતદારોમાં ભારે ઉત્સાહ દેખાઇ રહ્યો છે. કરોડો મતદારો તેમના મતાધિકારનો ઉપયોગ કરવા માટે સજ્જ દેખાઇ રહ્યા છે. આચારસંહિતાના ભંગ માટે કાર્યવાહી વચ્ચે પ્રચાર દરમિયાન જુદા જુદા ભાગોમાંથી જંગી રોકડ રકમ પણ કબજે કરવામાં આવી હતી.
