ઈરાન હાલ હિજાબ આંદોલનની આગમાં ઝૂલસી રહ્યું છે. સમગ્ર દુનિયા ઈરાનનો અમાનવીય ચહેરો જોઈ રહી છે. વિશ્વ સામે પોતાના દેશની સારી છબી રજૂ કરવાની જગ્યાએ ઈરાનના રાષ્ટ્રપતિ અબ્રાહિમ રાયસી હજુ પણ રૂઢીવાદી વિચારધારામાં બંધાયેલા જોવા મળી રહ્યા છે. ધાર્મિક કટ્ટરતા એવી છે કે તેમણે અમેરિકામાં પહેલેથી નિર્ધારિત પોતાના ઈન્ટરવ્યુને ફક્ત એવા કારણસર રદ્દ કરી નાખ્યો કે તમે વિચારી પણ ન શકો. ઈન્ટરવ્યુ લેનારી મહિલા પત્રકારે હિજાબ પહેરીને સવાલ પૂછવાની તેમની શરતને માનવાનો ઈન્કાર કરી દીધો. મહિલા ન્યૂઝ એંકરે આ ટ્વીટ કરીને આ ઘટના વિશે જણાવ્યું. ક્રિસ્ટિયન અમનપોર નામના ન્યૂઝ એંકર ઈન્ટરનેશનલ ન્યૂઝ ચેનલ CNN માટે કામ કરે છે. તેઓ ઘણા સિનિયર પત્રકાર છે. અમનપોરનો જન્મ બ્રિટનમાં થયો છે. જ્યારે તેમના પિતા ઈરાની છે.
ગુરુવારે સંયુક્ત રાષ્ટ્ર મહાસભાથી અલગ અમેરિકામાં ઈરાની રાષ્ટ્રપતિ અબ્રાહિમ રાયસી સાથે તેમનો એક ઈન્ટરવ્યુ થવાનો હતો. ઈન્ટરવ્યુ પહેલેથી નક્કી હતો અને એક અઠવાડિયાથી તેની તૈયારીઓ ચાલતી હતી. કેમેરા, સ્ટેજ, બધુ તૈયાર હતું. પરંતુ ઈન્ટરવ્યુથી લગભગ અડધા કલાક પહેલા ઈરાની રાષ્ટ્રપતિ રાયસીના એક સહયોગીએ અમનપોરનો સંપર્ક કર્યો અને કહ્યું કે, આ મોહર્રમ અને સફરનો પવિત્ર મહિનો હોવાના કારણે રાષ્ટ્રપતિ ઈચ્છે છે કે તમે ઈન્ટરવ્યુ હિજાબ પહેરીને લો. અમનપોરે તરત એ શરત માનવાનો ઈન્કાર કરી દીધો. ત્યારબાદ ઈરાની રાષ્ટ્રપતિએ ઈન્ટરવ્યુ જ રદ્દ કરી નાખ્યો. ઈન્ટરવ્યું કેન્સલ થયા બાદ ક્રિસ્ટિયન અમનપોરે આ ઘટના અંગે કેટલીક ટ્વીટ કરી. તેમણે લખ્યું કે મે રાષ્ટ્રપતિના સહયોગીની શરત પર વિનમ્રતાથી ના પાડી દીધી અને કહ્યું કે અમે ન્યૂયોર્કમાં છીએ, જ્યાં સ્કાર્ફ એટલે કે હિજાબને લઈને કોઈ કાયદો કે પરંપરા નથી. અમનપોરે કહ્યું કે તેમણે રાષ્ટ્રપતિના સહયોગીને કહ્યું કે મે ઈરાનની બહાર અને ઈરાની રાષ્ટ્રપતિઓના ઈન્ટરવ્યુ લીધા છે અને આજ સુધી તેની જરૂર પડી નથી કે કોઈ રાષ્ટ્રપતિએ હિજાબ પહેરવાની શરત મૂકી નથી. પોતાના અનુભવ વિશે ટ્વીટ કરીને જણાવતા અમનપોરે એક તસવીર પણ શેર કરી છે. જેમાં જ્યાં ઈરાની રાષ્ટ્રપતિનો ઈન્ટરવ્યુ થવાનો હતો તે સેટઅપ પણ દેખાડવામાં આવ્યો છે. ફોટામાં એક ખુરશી પર તે પોતે હિજાબ વગર જોવા મળી રહ્યા છે જ્યારે અન્ય ખુરશી કે જ્યાં અબ્રાહિમ રાયસી હોવા જોઈતા હતા તે ખાલી પડી છે. અત્રે જણાવવાનું કે તાજેતરમાં ૨૨ વર્ષની મહસા અમિનીનું વિવાદિત રીતે મોત થયું હતું. હિજાબ ન પહેરવા પર ઈરાનની મોરલ પોલીસે તેની ધરપકડ કરી અને પોલીસ ટોર્ચરના કારણે તે કોમામાં જતી રહી હતી. લગભગ એક અઠવાડિયા પહેલા તેનું મોત થયું. તેમના મોત બાદથી ઈરાનમાં હિજાબના વિરોધમાં પ્રદર્શન તેજ થયું છે અને હવે તેણે હિંસક સ્વરૂપ લીધુ છે. જેમાં અત્યાર સુધીમાં લગભગ ૩૧ લોકો માર્યા ગયા હોવાના સમાચાર છે.
