અમદાવાદીઓ ઉનાળામાં ઠંડા પીણાં પીતા પહેલા ચેતી જજો, કેમ કે આ ઠંડા પીણા સ્વાસ્થ્યને નુકસાન પહોંચાડી શકશે. અમદાવાદ શહેરમાં ડુપ્લીકેટ ઠંડા પીણાં બનાવવાના ગેરકાયદેસર ધંધા પર પોલીસે મોટી કાર્યવાહી કરતા આ ચેતવણીભર્યો કિસ્સો સામે આવ્યો છે. પોલીસે હાલ અમદાવાદના વટવા નવાપુરા વિસ્તારમાં સ્થિત એક ફેક્ટરીમાં દરોડા પાડીને નકલી મેંગો પેપ્સીના હજારો પાઉચ સાથે એક આરોપીની ધરપકડ કરી છે. જેની તપાસમાં આરોપી પૈસા કમાવવા લોકોના હેલ્થ સાથે ચેડા કરતો હોવાનું સામે આવ્યું છે.
અમદાવાદ શહેરના વટવા વિસ્તારમાં નકલી ઠંડા પીણાં બનાવતી ફેક્ટરીનો પોલીસે પર્દાફાશ કર્યો છે. પોલીસને મળેલી બાતમીના આધારે નવાપુરા મેદાન નજીકની ગલીમાં રહેણાંક મકાનમાં ચાલતી ફેક્ટરીમાં પોલીસે રેડ પાડી હતી. જેમાં પોલીસને રેડ દરમિયાન સ્થળ પરથી લાજવાબ મેંગો પેપ્સી નામે બનાવવામાં આવતા ડુપ્લીકેટ પાઉચનો મોટો જથ્થો મળી આવ્યો હતો.
તપાસ દરમિયાન પોલીસને અહીંથી કુલ 15,450 નકલી પાઉચ મળી આવ્યા હતા. માત્ર એટલું જ નહીં, સ્થળ પરથી પાઉચ બનાવવાની ત્રણ મશીનો, પાઉચની થેલીઓ અને પેકિંગ માટેના રોલ પણ કબજે કરવામાં આવ્યા છે. પોલીસે આ કાર્યવાહી દરમિયાન અંદાજે 2 લાખ 16 હજારથી વધુનો મુદ્દામાલ જપ્ત કર્યો છે. સાથે જ આ સમગ્ર મામલે નવાપુરા વિસ્તારમાં રહેતા આરોપી મુમતાજઅહેમદ અંસારીની ધરપકડ કરી છે. જે ગેરકાયદેસર રીતે ડુપ્લીકેટ પેપ્સી પાઉચ બનાવી વેચાણ કરતો હોવાનું તપાસમાં સામે આવ્યું છે.
સમગ્ર મામલે અંગે વાત કરતા જે ડિવિઝનના ACP એન. કે. વ્યાસે જણાવ્યું હતું કે, અમદાવાદ શહેરના વટવા વિસ્તારમાં પોલીસે કોપીરાઈટ ભંગનો મોટો ગુનો શોધી કાઢીને પ્રશંસનીય કામગીરી કરી છે. જેમાં વટવા પોલીસ સ્ટેશનની સર્વેલન્સ સ્કવોડ દ્વારા બાતમીના આધારે નવાપુરા મેદાન પાસે આવેલી એક ગલીમાં દરોડો પાડીને ડુપ્લીકેટ ‘લાજવાબ મેંગો પેપ્સી બનાવવાનું નેટવર્ક ઝડપી પાડવામાં આવ્યું છે.
વટવા પોલીસ સ્ટેશનના પોલીસ ઇન્સ્પેક્ટર એસ.કે. કરમના માર્ગદર્શન હેઠળ પી.એસ.આઈ. એ.બી. ગંધા અને તેમની ટીમ પેટ્રોલિંગમાં હતી. આ દરમિયાન મળેલી ચોક્કસ માહિતીને આધારે નવાપુરા મેદાન પાસે આવેલી ગલીમાં એક ગોડાઉન પર દરોડો પાડવામાં આવ્યો હતો. જેમાં તપાસ દરમિયાન ત્યાં જાણીતી બ્રાન્ડના નામે ગેરકાયદેસર રીતે ડુપ્લીકેટ પેપ્સી પાઉચ બનાવવાની પ્રવૃત્તિ ચાલતી હોવાનું બહાર આવ્યું હતું.
